*{{ گـلـبـي تـهـجـاك }}*

1/
گلبي تهجاك.... بصوت الينعاك

يالأسمك فزز لي اوجاعي
تهجيته بروحي و بأسماعي
يا حسن اكتبها و بدموعي
يحسين اقراك

سيّرني وياك... دمعة بذكراك

دمعة تبلّل رسم حروفك
يالمُغني الكل خير چفوفك
جاي اطلب إحسانك و انتَ
الحسن و انخاك

انتَ الكرم راعيّه
و جايك أنا بهالـنيّة
گلبي اجعله حسينية
و مأتم للنوح

ماي الوجه بديته
و چفي الك مديته
ميت أنا و أحييته
بحزن المذبوح

ماي الـ بوجهي على بابك كله بديته بسبيلك
بالقليل اقنع و أنا ادري الدنيا اصغر من قليلك
عازتي لعطفك رحمتك هيّ جابتني لمضيفك
يالحسن و اعظم عطيّة من ادگ بابك و اجيلك

رزقك هذا . وگفتي ببابك و الدموع الجرن
*{صلى اللهُ. عليكَ يا مولاي أيها الحسن}*

2/
أصل الإحسان.... لإسمك تبيان

و يا عنوان اللي يحد وصفك؟
إحسانك لو رقّة چفك
لو غيض عيونك لو سلمك؟
محيّر الاذهان

يالـبالوجدان ...   روح وريحان

دموع  انطيني و كلشي اسلبني
و احسبني شرايد تحسبني
لو خيط بخيمة صيوانك
مو شرط انسان

يمطر نِعم ميزابك
و الحب عطاء اعتابك
رزقك لليـدگ بابك
غربة عاشور

وَ ثوب الخدم تفصاله
من ايد الحسن و افضاله
الرايد كسر لو جاله
يرجع مكسور

سلمت نيتي بچفوفك و الگلب يمك تركته
ما اريد يجرحه غيرك عالحُسين اجرحني انت
و ياحُسن عاقبتي كونك يالحسن تلزم أديَّ
و بأسمك اتلگاه محرم و الجفن بأسمك دمعته

صارت عادة ... كل محرم دمعتي تصيح بشجن
*{صلى اللهُ. عليكَ يا مولاي أيها الحسن}*
3/
  املي و رجواي... يم بابك جاي

جيتك لازم باب مضيفك
مو ضيفك خَدّام لضيفك
و ياخدمة التكتب لي اياها
قابل مولاي

بديني و دنياي ... خيرك ويّاي

و كل دمعة على حسين ابچيها
لابد خيرك الگاه بيها
الغيره البچتني على حسينك
من زادك هاي

يا واهب لـكل خادم
حزن و دمع حب دايم
يمخلّي بالـطف جاسم
يتحنى دموم

يالمجتبى و انت اولى
بأسمك عزانه نطب له
و انت الگلت ما مثله 
يوم الطف يوم


يا كريم الگد عطائك خاطر اتعناه و اسأله؟
و يا هو يترسني ضياع على الغريب الضاعوا اهله
آنا سائل دمع جايك و انت اعلم بالاريده
يالحسن بإسمك اريدن مجلس حسينك ادخل له

تتكفلني ... بالسنين الجايه مثل اللي مضن
*{صلى اللهُ... عليكَ يا مولاي أيها الحسن}*

*{{جروح:منتظر الجنابي}}*

➖➖➖➖➖
لسماع قصيدة ((گلبي تهجاك)):
https://t.me/MajalesAlKhaqani/2872

رابط المشاهدة على اليوتيوب:
https://youtu.be/0lzoP3Cx_Us

قناة القصائد المكتوبة للملا محمد باقر الخاقاني:
https://t.me/latmiyyatalkhakani
بالتعاون مع:
https://t.me/AlAbaratAlHosainiya

*{{ قومي الى البقيع }}*


يا فاطمٌ قومي إلى البقيعِ
بالسمِّ ماتَ وارثُ الشفيعِ
الأرضُ تبكي والسما ...واويلاهْ
تحيي عليهِ المأتما...واويلاهْ


١/يا فاطمٌ من بعد جحْدِ النَّصِّ في خمِّ
لا فرقَ عند الدمعِ بينَ النَّثرِ والنَّظْمِ
قد جاءَ دورُ المجتبى للقَهْرِ والظُّلمِ
نبكيهِ حالَ السمِّ يدعُو " آهِ يا أمي "!

فالصَّومُ يبكي سيِّدَ الصِّيامِ
إفطارُهُ بالسُّمِّ لا الطعامِ
أحداقُهُ سالتْ دما...واويلاهْ
تُحيي عليهِ المأتما...واويلاهْ

٢/لَمْ يكفِهمْ مسمارُ ثاراتٍ وأضغانِ
كلاَّ ولا دفْعٌ وإضرامٌ لنيرانِ
بالأمسِ رضُّوا منكِ ضِلعَ الدينِ والشانِ
واليومَ حقدا كسَّروا ضلعَ الهُدى الثاني !

حُزْناً عليهِ ردَّدَ الجنينُ :
للمجتبى فلْيعتلِ الأنينُ
ركنُ المعالي هُدِّما...واويلاهْ
تُحيي عليهِ المأتما...واويلاهْ


٣/تبَّا لها سبعينَ سهماً تُمطرُ النعشا
أمْ يا تُرى سبعينَ جُرحاً تُثخِنُ العرشا ؟!
تاللهِ لو عباسُ فيهمْ حرَّكَ الرِّمشا
لاجتاحهُمْ بالموتِ يبدو وحدَهُ جيشا

لوْ سيفُ عباسٍ بهمْ يلوحُ
لأصبحَ البغلُ لها ينوحُ
لكنَّ أمراً حُتِّما...واويلاهْ
تُحيي عليهِ المأتما...واويلاهْ


٤/تقويمُ رُزءِ المجتبى قلبَ السَّما كاسِرْ
يعني بأنَّ الوقتَ يدنو من ضُحى العاشرْ
فيهِ ينادي الكونُ صبِّي دمعَكِ الماطرْ :
يا فاطمٌ هذا حسينٌ رضَّهُ الحافِرْ

(يا فاطمهْ قومي إلى الطفوفِ)
(هذا حسينٌ طعمةُ السيوفِ)
وأختهُ ترجو العمى...واويلاهْ
تُحيي عليهِ المأتما...واويلاهْ


٥/أليومَ أضحى يندبُ القُرآنُ قُرْآنَهْ
في الطشتِ يرنو "لؤلؤاً" لونُ الدِّما زانَهْ
ما حالُهُ لما يرى للطَّفِّ أحزانَهْ
أواهُ "فالمرجانُ" يُهدى لابنِ مَرْجانهْ !

من بعدها الرأسُ القطيعُ يذهَبْ
لشامهمْ بالخيزرانِ يُضرَبْ
يبكي نساهُ كالإما...واويلاهْ
تُحيي عليهِ المأتما...واويلاهْ

*{{جروح: علي عسيلي العاملي}}*

➖➖➖➖➖
لسماع قصيدة ((قومي إلى البقيع)):
https://t.me/MajalesAlKhaqani/2871

رابط المشاهدة على اليوتيوب:
https://youtu.be/V1hcvr0Wf9U

قناة القصائد المكتوبة للملا محمد باقر الخاقاني:
https://t.me/latmiyyatalkhakani
بالتعاون مع:
https://t.me/AlAbaratAlHosainiya

*{{ أمنـــ مواسي ـــية }}*

1/
أمنية مواسي للظعون ،، يبچي بگلب حار ،، و للباري رافع أيده
آخر محرم هذا كون ،، من غير أبو الثار ،، و على الله مو بعيدة

عاشور أيامه إنگضن ،،  و الهضمة كتّاله
جانا السبي و إبن الحسن ،، ما بين هلاله
و بيرغ اميرات الظعن ،، ما رجع شيّاله

يا ربي ادعي بجاه النور ،، البعيونه
و بجاه الظامي المنحور ،، و ظعونه
لا تجعلني من الينسون ،، ثاراته
و اجعل هذا آخر عاشور ،، من دونه

بجاه الزهرة ،، و اليبچيها من دم
يا ربي إجعل ،، هذا آخر محرم
بدون ابن الحسن

2/
دين المواسي الانتظار  ،، للخدره منهوب ،، و يبچي لعظم مصابه
و فورة عزاء يحديها ثار  ،، للثوبه مسلوب ،، و للناگة و الخرابة

متغرّب و جرح اليسر ،، عايش بوجدانه
إفرغ عليه يا رب صبر ،، المحترگ صيوانه
ندعي لظهوره و ننتظر ،، و نبچي على أحزانه

يرد باذن الله و نتلگاه ،، و نتبعه
و نحف بيه و نصلي وياه ،، كل جمعة
هُمه اللي يشوفونه بعيد ،، بس احنا
نشوفه اقرب من اه يحسين ،، للدمعة

يعود و اوّل ،، همه يسوّي مأتم
يا ربي إجعل ،، هذا آخر محرم
بدون ابن الحسن


3/
باللي تندبه على الجمال ،، و مهدّمة الحيل ،، عجل فرج ولينا
تدريه بچى دم عالحبال ،، بالضحى و بالليل ،، وبعدها تجري عينه

يماشيها من درب لدرب ،، و الروس جدامه
و ينادي يا مشيّ الغرب ،، و يدگ على الهامه
و ما زالت عيونه تصب ،، لليسر و ايامه

ظعن اهله المتسلّب شال ،، و ينطره
و يبچي على البيديها حبال ،، كل عمره
و بس هوَّ اليندلهن وين ،،  هالليلة
مدري بيا گاع ويا حال ،، شيصبره

يمتى الغايب،، شمل ظعونه يلتم
يا ربي إجعل ،، هذا آخر محرم
بدون ابن الحسن


4/
عن جده أخرتّه الدهور  ،، بدمعنا اليسيل ،، ندعي الله و بحضوره
لخاطر ظعن عمته اليدور  ،، فوگ المهازيل ،، عجّل لها ظهوره

يا رب بحق غربة علي ،، السجاد عالناگة
و گيد السبي البيه مبتلي ،، بمتونه و بساگه
عجّل فرج آخر ولي ،، و الهضمه حرّاگة

سلبوا من ظعونه خيام ،، بالهدّه
كل يوم على الناگة بعام ،، يتعدى
يارب يرد راعي الثار ،، لعماته
و ياخذ حگه من اهل الشام ،، و يرده

غير المهدي،، ما ينفعها مرهم
يا ربي إجعل ،، هذا آخر محرم
بدون ابن الحسن

5/
بهاي الليالي المؤلمات ،، نتمنى و تصير ،، يرد لنا بالسلامة
راعي الامانة الـ عالفرات ،، ياخذها و يغير ،، و يلحگ ظعن عمامه

بجاه الظعون البالفلا ،، يا رب اخذ بيده
ثار اللي محّد غسّله ،، و دم منحر وليده
و ثار المشن من كربلا ،، من الخيم للبيده

بجاه متون العلويات ،، المجروحة
و كل صرخة إگبال الشمّات ،، مذبوحة
عجّل طلعة راعي الثار ،، و طفيها
نار خيامه المحترگات ،، من روحه

ما اظن تطفى ،، ناره و جرحه ينضم
يا ربي إجعل ،، هذا آخر محرم
بدون ابن الحسن

*{{جروح: أحمد الهلباوي}}*

➖➖➖➖➖
لسماع قصيدة ((أمنية مواسي)):
https://t.me/MajalesAlKhaqani/2866

رابط المشاهدة على اليوتيوب:
https://youtu.be/V1hcvr0Wf9U

قناة القصائد المكتوبة للملا محمد باقر الخاقاني:
https://t.me/latmiyyatalkhakani
بالتعاون مع:
https://t.me/AlAbaratAlHosainiya

*{{ الــ من يمك ــحد }}*

1/
من يمك لحد . ماكو حد يمك
من عندك امشي . والتقي بأسمك
كل اتجاهاتي لگيتك
شما تيهت يحضني بيتك
بيتك مخيم . والعطش رسمك

گلبي نجاته من يحن
والعطش حزن . والرزق معاناته
رحمه يشوفك الگلب
يمشي الك درب . كلهن اتجاهاته

گلبي بلا حزن ابد ما يهتدي
يالحزنك وطن ويقرر مولدي
من يبدي النعي أنه وياه ابتدي

بلقائك قرر الميعاد
دمع عيني يبو السجاد
2/
جلّت قدرتك . يذهل إحسانك
يالغيرتني . بدمعة احزانك
ساكن حجر والروح هيمه
راويتني مولاي خيمه
واتحركتلك . جايك أنسانك

يا صاحب المنّه عَليّ
يالترست أديّ . ودگ حنينه وجداني
چان الگلب ذابل رزع
وبي غصن طلع . من مدامع احزاني

بدمعه اعله الخيم شفت دلالي حيّ
مو شيّ ينذكر وصرت هسه انه شيّ
عرفت ابچي الك وعرفت الطم اديّ

الك شكري اعله هالإيجاد
ودمع عيني يبو السجاد

3/
يموت الحياء . ويشتم اخبارك
أنته الكرامه . اتلوذ با اكتارك
كل الصفات الحَسنه منك
وتتفايض اعله الشال حزنك
تاج الزمان . اتراب زوارك

كلشي ارتبط بيك ابأسم
اتقدس ومهم . وانحفظله تقديره
من ضَيّ خلودك انخلق
عالم الألق . بخدمتك تعابيره

شگد خدام الك من تضوي نجم
بخلودك سيدي بقه الهم اسم
لان عن خدمتك ما زَلوّ جدِم

وأنه بالخدمه ردّت امراد
دمع عيني يبو السجاد
4/
نورك عجيبه . ويخترق نورك
كل ضلمه بيه . وتخظّر ازهورك
كلما بچيتك ياابو الاكبر
اطيب النفوس وكلشي يخضّر
يعني رحمتي . امصاب عاشورك

عاشورك وذاك اللهب
صار الي سبب . بدمعه يغفر ذنوبي
شبچيك يا دمعه تصب
يا حزن گلب . يوالمك يمحبوبي

يادمعه التهل على گد الألم
يالعندك جرح و اجه فوگاه سهم
وشما تلتفت ولا رف العلم

على الراح وبعد ماعاد
دمع عيني يبو السجاد

*{{جروح: السيد مرتضى الياسري}}*

➖➖➖➖➖
لسماع قصيدة (( من يمك الحد )):
https://t.me/MajalesAlKhaqani/2341

رابط المشاهدة على اليوتيوب:
https://youtu.be/XYv8xtjQXMU

قناة القصائد المكتوبة للملا محمد باقر الخاقاني:
https://t.me/latmiyyatalkhakani
بالتعاون مع:
https://t.me/AlAbaratAlHosainiya

*{{ بــ كافلني ليش ــكربله }}*

كافلني ليش بكربلا .. وحيدة تخلّيني

1/
آنا العقيلة الـ عالخلكَ متعلّية بخدري
عيني على سبع الكَنطرة المتكفّل بأمري
تحالِفن خدري وشيمته وعمره ويَ عمري
يا صبر يحمل فركَته تهدّم ركن صبري
لو صُبر كَلبي بيا عذر .. أكَطع دمع عيني
2/
شَأنسى حَميتك خوّتك وكَفاتك و جودك
لو سهَم عينك يالكَمر لو كَطعت زنودك
أفتخر جِنت على العرب و الفخر بوجودك
هم يغلط حساب الدهر و لزينب يعودك
وِتورّد بماي الوفا .. وي عمرك سنيني
3/
صارت سلوتي بفركَتك بس أحسب جروحي
و كل عمري أخلصنّه بَچي و ما أرحم بروحي
عباس حِزني و لوعِتي عباس كل نوحي
لو تنسى حتّى أم الولد ما انسى مذبوحي
حال الحتف يا ابا الفضل .. ما بينك و بيني
4/
الله يعين الفاجِدَة مثلك يابو الغيرة
من ديرة دولبها الوكت بعْدك لأشر ديرة
التنكَطع جفّينه غدر عنده معاذيره
لٰچن الدلّلها بُقت مهضومة وبحيرة
يا ريت آنا تكَطّعن .. يسْراي و يميني
5/
يا ريت تِنظر حالِتِي يا كافل ظعوني
و شلون عنّك باليسر عمداً ينشدوني
يشتموني و اسمَع شَتمتي و بس تهمل عيوني
لليوم نيشان الضرب يا خويه بمتوني
شما أذكر مصاب اليسر .. يا خويه ياذيني
6/
شما أذكر مصاب اليسر تخنكَني العَبرة
ما جنّي بنت المرتضى و والدتي الزهرة
مَكسور كَلبي من الهَضم و الكسر شيجبره
لو يدري كَايد ناكَتي بالصار و اليجرى
لو يدري من يوم الوكَع .. ما بطّل ونيني
7/
لو يدري من يوم الهون عالمَشرعة چفوفه
و لو يدري إخته بيا وضع من طبّت الكوفة
لو يدري مجبورة رحت لو بيدي ما اعوفه
لو عَدل حمّاي الظعن و الحالي إيشوفه
شلّي بحياتي من بعد .. عباس و حسيني


*{{جروح: أبو علي الناصري}}*

➖➖➖➖➖
لسماع قصيدة ((كافلني ليش بكربله)):
https://t.me/MajalesAlKhaqani/2867

رابط المشاهدة على اليوتيوب:
https://youtu.be/Pd7VbfCfqtk

قناة القصائد المكتوبة للملا محمد باقر الخاقاني:
https://t.me/latmiyyatalkhakani
بالتعاون مع:
https://t.me/AlAbaratAlHosainiya