#جديد
في شهادة أولاد مسلم بن عقيل عليهم السلام
وزن : التجليبه
.
.
يا يمه الولد ما ينحمل يومه
واشلون الولد لو صار بدمومه

أولادي يَيُمه ورحتوا من ايدي
يالشوفة وجهكم بسمتي وعيدي
طــول الليل أنادي آه يوليـــدي
يبراهيم يُمــه اشلــون هالنومـه

يبراهيم يمحمد يَيُمه اشلــون
لتراب الگبر من ايدي اتروحون
بذبحتكم دليلي ذايب ومطعون
من عدكم يَيُمه روحــي محرومه

يم جرف النهر يا هو اللي يحضركم
وامن المــاي يا يُمــه يِطلعكم
ابيا ذنب اللعين ايحز مناحركم
مهضومه عليكم روحي مهضومه

لأبچیكم لَحــد ما تِخْلَــص اسنيني
وأعميــها عليكم بالبچــي عيني
شلي بالعمر من دونها ابنينـي
الراحت بالذبح يا ويلي مظلومه
_____
#فاطمة_كريم
٢٠٢٥ م

https://t.me/qasaidfk128

#جديد
في وداع السيدة زينب عليها السلام لقبر الحسين عليه السلام وعودتها للمدينة
طور : والله حيره حيرتي
.
.
اوداعة الله رايِحه
الفرگه خويه جارِحه
أمشي وبگلبي تظل
مــا تِهيــد النايحه

٢ نبضي يَحسين يِنادي .. نبضي يحسين

اوداعه الله وأظل يمك آنه وِدَّي
ماشيه وباقي النعي يم گبر جدي
ماشيه وما طفت خويه نار وجدي
للمدينه البيها ما ظل أَحَد عندي

اهناك تكبر وحشتك .. من أشمن ريحتك
باقيه بدارك لَچــن .. غايِبه اتظل صورتك

اتدوِّر العين جمالك .. اتدوِّر العين
نبضي يَحسين يِنادي .. نبضي يحسين

أمشي لكن ما خِلص فصل العزيه
وتبقى دمعاتي تهل صبح ومسيه
بگلب زينبكم يظل جرح الرزيه
رايِحــه والملتقى بعــد المنيـــه

بگبري لمن ألتقيك .. بجرح آلامي أجيك
اهناك أنساها الجُروح  .. لو نمت ما بين إديك

ويِهدى لونين يخويه .. يهدى لونين
نبضي يَحسين يِنادي .. نبضي يحسين

أمشي او روحي يبو فاضل حزينه
اشكثر راح أفگد حنانك بالمديــنه
بدمعي راح أُوصِل سلامك للحنينه
اگلها ما گصر ترى وگطعوا ادينــه

الفاگده أربع ولد .. تنتظر يمته نرد
وبالدمه مو بالدمع .. للبواچي تستعد

أم البنين تتاني .. أم البنين
نبضي يَحسين ينادي .. نبضي يحسين

بالمدينــه دُوركم تصبــح مآتــم
عگب ما كانت يخويه دُور هاشم
ثاكِلــه يـم ثاكِلـه تنعــه بهضايــم
ليلى عالأكبر تـنوح ورملـه جاسم

والرباب آ يالرباب .. تنعه ويلي اشچم مصاب
والعليله ذاهِــله .. چم عزيز العدها غاب

فَرَّگ البين شملها .. فَرَّگ البين
نبضي يَحسين ينادي .. نبضي يحسين
___
تمت ببركات مولاتي زينب عليها السلام
#فاطمة_كريم
٢٠٢٥ م

https://t.me/qasaidfk128

▪️فزاعيه▪️

في مصاب اولاد مسلم ع




فوگ ضيم الغاضريه
ضاعوا اولادي امن اديه

——-

ضاعوا اولادي يزهره
والگلب يمه شيصبره
منكسر مليون كسره
يمه زهره اشلون بيه
——-

وين الكاهم يبمه
والگلب غارگ ابهمه
فوگ سهم البين سهمه
اعيوني اعليهم جريه
——-

تاهوا ابليل المصايب
بين عدوان وغرايب
يمه زهره گلبي ذايب
ينوح يمه اليا رزيه
——
وين القاهم ابهيمه
والگلب كاضيه ضيمه
لاكو والي ولا اكو خيمه
منهو ينغر يمه ليه
——
ويلي ياكربله ويلي
بيج ما ينتهي ليلي
بالولي هديتي حيلي
وفوگهم اطفال اليه
——
##بنت_الشمري


#مكتبة بنت الشمري

https://t.me/+INNbAljAHK42MTI8

فزاعيه


في مصاب اولاد مسلم عليهما السلام


ضاعت اطفالي امن اديني
وين ابو الغيره يجيني
——-

گوم ياعباس ليه
ضاعت اطفالي امن اديه
خويه من ينغر عليه
ايدورابهيمه جنيني
—-
من يدورهم يوالي
وانا حال الضيم حالي
منشده ياخويه بالي
خويه واعليكم ونيني
—-
وجهي للعباس اديره
گوم ليّه يبو الغيره
اختك الساعه ابحيره
ضاعوا ابهيمه بنيني
——-
ناموا ابهيمه الغوالي
وضاع كل عزي ودلالي
وضاعوا اوياهم جهالي
ريت عميانه عيوني
——-
يمه اندهكم وانادي
غربه يمه وليل وادي
والاخو نايم سنادي
نوحي الكم وي حنيني
———
#بنت_الشمري

#مكتبة_بنت_الشمري

https://t.me/+INNbAljAHK42MTI8

#الأربعين

▪️فزاعيه▪️

في اربعين الامام الحسين عليه السلام

جينه الكربله يحسين
وجبنا الروس ويانه

جينالك يبو اسكينه
گوم انهض يوالينه
شوف اشسادي اعلينه
من عاشر يملفانه
——-
جبت الروس يالغالي
ويلي ياهضم حالي
من بعدك شمر والي
وينه شايل إلوانه
——-
الغالي يذبح افراگه
جيتك خويه مشتاگه
ابگلبي جمره حراگه
گبرك فكها بيبانه
——
جيتك واسمع اونيني
معميه ترى عيني
كِبرَت بعدك اسنيني
وگلبي تذبح احزانه
——-
اشلونك گلي يامذبوح
بعدك سلوتي هالنوح
ضيمي شوفه ليك ايلوح
وروحي ابهمها غرگانه
——-
خويه گلي اشلونك
اشلون ارجع بلا اضعونك
هاك ادموعي يروونك
اعليك الروح نحلانه
———
#بنت_الشمري


##مكتبة_بنت_الشمري

https://t.me/+INNbAljAHK42MTI8

#جديد
#الأربعين
طور : گرب الخيل لعد باب المخيم
.
.
جينه ننصب عزيتكم يهلنه
اليوم للطف يبو فاضل وصلنه

محد النَزَّل حِمِلنه
آ يخويه وگام إلنه
.
.
جینه يا خوي او شفنه بس گبرکم
من على النوگ يخويه طحنه يمكم

انرش الإگبور ابدمعنه
نبچي اعليكم وننعه
.
.
يم الإحسين تون زينب حزينه
اتگله راسك يخويه جايبينه

من عگب ضيم الخرايب
شفنه أنواع المصايب
.
.
أشكي يمك يخويه چم رزيه
بالخرابه ترى ماتت رقيه

فوگ طشت الراس ماتت
بالغُرب يا خويه راحت
.
.
منحنيه اگصدت كافل خدرها
تبچي من دم على مرقد گمرها

اتگله عگبك يسروني
للسبي خويه خذوني
.
.
آ يعباس يريت اتشوف حالي
اتشوف بالشام يخويه شل جرالي

خويه طبينه الدواوين
وبالطشت لن راس الاحسين
.
.

وتبچي رمله وتنادي آيا جاسم
ابدال عرسك شبع گلبي هضايم

وليلى عالأكبر تنادي
يبني يا سلوة افادي
.
.
والرباب اگعدت واتلولي بالآه
آ يعبدالله يالذابحني فرگاه

يبني عاميني مصابك
گلبي ما يحمل غيابك
___
#فاطمة_كريم
٢٠٢٥ م

https://t.me/qasaidfk128

▪️وزن الفائزي ▪️

في الشوق الى زيارة كربلاء


ضامي دليلي لمرقدك لكني محروم
انظرها زوارك مشت والدمع مسچوم
——-
انظرها زوارك مشت واگليبي مكسور
ابعث سلام اويه الاجا ابدمعي المنثور
روحي يامولاي اشتهت للحضره اتزور
طير اتمناها بجنح من حولك اتحوم
———
آ يالحنين وجمرته ونيران الاشواگ
شوگ الگلب شيْسكّته امرويه الافراگ
كلها اجتك زايره اشحيلة المشتاگ
حلمه يشمن مرقدك ويبث الهموم
——-
مولاي مازرتك جسد واقبلها روحي
عني تزور ويوصلك وني اويه نوحي
تتسله روحي بمجلسك تشفه جروحي
وازيارتك صارت حلم كل سنه مهدوم
———
قلّدت كل زاير الك خطوه اويه خطوه
وادريها شمة مرقدك بس ليّه ادوه
يصبرني نوح امْصايبك والخدمه سلوه
اتمنى يمي مرقدك وازوره كل يوم
———
#بنت_الشمري
٢٠٢٥
#مكتبة_بنت_الشمري

https://t.me/+INNbAljAHK42MTI8

https://youtu.be/asXi1ZcPs9I?si=NpW_5OugKmu22vGi
==========================
بغربه هاليوم تغمِّض يالرضا العين بقلم فاطمة كريم أداء الشبل الحسيني عباس الصالح ليلة ١٧/صفر/١٤٤٧

https://youtu.be/NzWm35io1O0?si=5RjAx7X_kPzMzifs

يا أول حضن يٍتلگه أشواگي ..
طوى دربي وخذاني
لحضرته وگبره
طوى غربة عمر خلصان
بس آهات
وشافاها الجُروح
بنفحته وعطره
تلگاني ..
وخذاني
وعمر ثاني .. اوياه
محى من بالي بيه
امن الألم ذكرى
ويم گبره صرت
چني طفل مولود
تَوَّه .. وفاتح اعيونه
على الفطره
نسيت الهم نسيت الآه
وكل لحظه ابنعيم الگبه
والحضره
ومدري اشلون مدري
دارت الأيام
وفارگته ورِجعت
لغربتي المُره
وذاك الطفل صار
امشيّب وعيناه
اعله دربك شابحه
وتتنطر السفره
ودموع الگلب ما تحچي
بس آهات
وتنادي امن البُعد باللوعه
والحسره
ياليَمك جبتني اهواي يالسلطان
دخيل اكتبني
يا مولاي بس مَره !


#فاطمة_كريم
٢٠٢٥ م

#جديد
#شوق_الزيارة
طور : يا ليلة الحادي عشر ، الشيخ زمان الحسناوي وعدة أطوار أخرى في النعي واللطم .
.
.
بشوگ أربعينك سيدي .. ما أملك المشاعر
يمته أجيلك من بُعد .. وأتعنه گبرك زاير

ما زرتك او لا بالدمع .. إتعنيت إلك مشايه
او لا جيت من درب البُعد .. أستقبل السبايه
أمنيتي ظلت بالگلب .. أمشي واشيل الرايه
ما أبگه وحدي منحرم .. مكسور ليه الخاطر

الليله أربعينك والگلب .. مو يمي يمك رايح
مره على افراگك يِون .. مره اعله جرحك نايح
والله البُعد يا بو علي .. لگلب اليِحبك جارح
وآنه المسيه منحرم .. وچم عام گلبي ناطر

يا ريت يمك هالمسه .. وأنعه على المسبيه
اتعنت من الشام وإجت .. تنصب إلك عزيه
يا ريت وياها أون .. وأبچي على رقيه
وما بينك وبين الگمر .. دلالي يصبح طاير

ما بينكم أنصب عزا .. يا ريت وأبچي اعليكم
وعگب البُعد أحچي بدمع .. اتعنيت زاير لكم
والفرگه تِخْلَص سيدي .. وكل عام أگصد ليكم
تسوى العمر يا بو علي .. بس لحظه وسْط الحاير
____
#فاطمة_كريم
٢٠٢٥ م

https://t.me/qasaidfk128

#جديد
في #شوق_الزيارة
وزن : الفائزي
.
.
مشتاگ أزورك وأعتني للغاضريه
اكتبني زاير أوصلك هاي المسيه

اكتبني زاير أوصلك وأبچي اعله بابك
محروم أجي وابمرقدك أنعه مُصابك
زاير أصير ابلهفتي ألثم تُرابك
وابشوگي أگصد يم كفيل الهاشميه

والله البُعد يا بو علي يحرگ گلبنه
يِجمَعْنه يمته سيدي يمك دربنه
وحده ضريحك ننسى بيه همنه وتعبنه
وفرگاك ما ليها دوا يا بو رقيه

خاطرنه مكسور وجبرنه بس زياره
نتعنه يمته وننظر لذيچ المناره
حلم المحب بس مرقدك يوصل جواره
وعطرك يشمه ودمعته ابخده جريه

يمته ابوسط صحنك عليك ابحرگه نقره
ونذكر مصايب زينبك حسرتها حسره
وتحضرنه ندري ابكربله أمك الزهره
لليوم جمرتها على امصابك سريه

يمته أبو فاضل نزوره بدمعة العين
ونبچي على عينه وعلى گطعة الچفین
ومن گبره نتعنه لضريحك نمشي يحسين
ويمك على اجروح الگمر ننصب عزية

يالرايح الليله لضريحه اذكرنه وياك
وگله يبو سكنه فلا نحملها فرگاك
سلّم عليه وبالنيابه هلها عيناك
وشاركنه بدموعك على عُظم الرزيه
____
#فاطمة_كريم
٢٠٢٥ م

https://t.me/qasaidfk128

#جديد
في شهادة مولانا السلطان علي بن موسى #الرضا عليه السلام
طور : گرب الخيل لعد باب المخيم
.
.

بغربه هاليوم تغمِّض يالرضا العين
بآخر أنفاس تون الجدك احسين

اتنادي ياجدي يمظلوم
الليله أجيلك وآنه مسموم
.
.
بآخر أنفاس على امصابه دمعتك
وعطش گلبه تِذِكْره ابسَمْ چَبِدْتك

اتنادي ظامي آيا جدي
الليله أواسي ابجرح چبدي
.
.
اتنادي يا جدي جرحك ما نسيته
مقتلك لآخر أنفاسي نعيته

مثل يا جدي غُرُبْتك
بكربله أذكر ذَبِحْتك
.
.
بس يجدي ضُلوعي سالمه اليوم
صدري مو بالحوافر تدري مهشوم

آه يا جدي إعله صدرك
ردّوا الخيل اعله ظهرك
.
.
نعشي ينشال يجدي ويدفنوني
ابگبري ابهيده والله اينزلوني

آه يا جدي اعله جسمك
وغُسلك المِن فيض دمك
____
#فاطمة_كريم
٢٠٢٥ م
https://t.me/qasaidfk128

#جديد
لوعة الزهراء عليها السلام ما بين شهادة الإمام الرضا وأربعين الإمام الحسين روحي فداه
طور : منو إلنه ، كرار الكربلائي
https://youtu.be/-cy5edgOQqM?si=upGoH8RGVsTqZtyf
.
.
غريب آيا يمه .. غريب آ يا يمه

إجيتك من گبري يمحبوبي إجيتك
ولکيتك مسموم الچبد يبني لكيتك
وبچيتك صحت آ يالرضا بجرحي وبچيتك
وخذيتك بحضني ومنكسر ضلعي خذيتك

بالغربه يا حبيبي هالليله مسموم
ما لك أهل يَيُمه واتحضْرك اليوم
من أهلك وبنينك يوليدي محروم
عنهم بعيد أو تِگضي هالليله مظلوم

غريب آيا يمه .. غريب آ يا يمه

لأجيمه عليك النوح يا يمه لأجيمه
هضيمه اتروح امن ايدي ابسمك هضيمه
عظيمه يَيُمه احترت والليله عظيمه
أليمه اهواي اجروح واجتمعن أليمه

أنحب إِلك يَيُمه وأتذكر احسين
مثلك غريب أو أهله رجعوا له بونين
مِنِّ اليسر حيارى والدمعه بالعين
وعمْتك غريبه ردت وإخوتها ميتين

غريب آيا يمه .. غريب آ يا يمه

عذابه يا درب السبي وضيمه وعذابه
ومُصابه تدري يالرضا شنهو مُصابه
ترابه رَدَّت ما لگت بس الترابه
النجابه كلها بالگبر ويلي النجابه

ميِّت غريب أشوفك لاچن يَيُمه
بيديني يا حبيبي جسمك أضمَّه
بس جدك اللي غُسله يوليدي دمَّه
أمشي وأجِمْعه بيدي يا يمه لحمه

غريب آيا يمه .. غريب آ يا يمه

أجِمْعه ليل اهدعش كِلَّه بس أجِمْعه
وأسِمْعه راسه اعله الرمح وَنَّه أسِمْعه
يِگطْعه ابيا ذنب الشمر راسه يِگطْعه
ويِتبْعه جسمه ابسحگة الحافر يِتِبْعه

ليوم أربعينه وآنه يا يمه بالبر
أجْمَع مِنِ الترابه جسمه التطشر
مالومه وأنعه ابني ابضلعي التكسر
وانطر يرد عليَّه ضعن التِيَسّر

غريب آيا يمه .. غريب آ يا يمه
__
تمت ببركات مولاتي الزهراء عليها السلام
#فاطمة_كريم
٢٠٢٥ م

https://t.me/qasaidfk128

#جديد
في شوق الزيارة 💔
.
.
صعبه ما تكتبني زاير
صعبه أظل كل عمري ناطر
صعبه أظل بأشواگي حاير
يا أبا عبد الله

صعبه من عگب انتظاري
ميْتبدَّل لي قراري
صعبه يرجع دمعي جاري
يا أبا عبد الله

صعبه حالي مَيْتبدَّل
صعبه ما يحصل إِلي حَل
صعبه أبگه وكلها ترحل
يا أبا عبد الله

صعبه ما أزورك وأجدد
عهدي ويّاك وأردد
ياحُسين إبابك أسجد
يا أبا عبد الله

صعبه والصعبات حلها
بيدك وإنته أهلها
روحي ما وصلت لأملها
يا أبا عبد الله

صعبه أعاتب وأدري إنته
كلشي بعمري كفلته
شوگي بس هالليله گِلته
يا أبا عبد الله

يا زائر كل محروم سيدي 💔
__
#فاطمة_كريم
٢٠٢٥ م

https://t.me/qasaidfk128

في استشهاد الامام المجتبى عليه السلام

طور قرب الخيل لعد باب المخيم
الملا محمد الحجيرات

رابط الطور

https://youtu.be/pNO9mfQG79Y?si=4FrXCuE3HB5OskEY


عميه لعيون يخويه اشلون شفتك
تفذف ادموم يغالي من جبدتك
سمه الله منهو سمك
والله ماينحمل همك

مجبل الموت يوالينه ويبعدك
حان الفراگ تشيل وهم نفگدك
بالطشت الجاري دمك
والله ماينحمل همك

ادري مجروح يخويه احسين گلبه
گلي امنين دواه ووين دربه
خويه خليني اضمك
والله ماينحمل همك


اخضر اللون اشوفه ونوره طافي
يشبح العين اخونه الگلبه دافي
افراگه ياگلبي يِهضمك
والله ماينحمل همك


شايل العود اخونه الماكو مثله
خالي البيت ولا ننطر يردله
بابه محزون ويغمك
والله ماينحمل همك
———-
#بنت_الشمري

#مكتبة_بنت_الشمري

https://t.me/+INNbAljAHK42MTI8

#جديد
في شهادة مولانا الإمام #الحسن المجتبى عليه السلام
فزاعية
.
.
واتلگي المسموم .. آ يالزهره

جاچ الحسن يُمه
وايلوج من سمّه
چبده نزف دمّه
يا يمه متوذره .. آ يالزهره

چم مره يسگونه
السـم ويِأذونــه
لاچن يمحزونــه
مختلف هالمره .. آ يالزهره

ما من سلامه اليوم
ابنچ گضه مسمــوم
وايغسِّلـه المظلــوم
وايشيِّعه الگبره .. آ يالزهره

وابدفنته آلام
تترصده الظِلَّام
يرمون نعشه اسهام
يَمصيبته الكبرى .. آ يالزهره

اتلگيه هالليله
وشوفي انهدم حيله
بالحضن تَچِّيله
يا يمه يالزهره .. آ يالزهره
___
#فاطمة_كريم
٢٠٢٥ م

https://t.me/qasaidfk128

#جديد
في شهادة السبط الأكبر الإمام #الحسن المجتبى عليه السلام
طور : مات الولد مات

كأني بمولاتي زينب تخاطب مولاتي فاطمة روحي فداها
.
.
راح الحسن راح .. راح الحسن راح

يا يمه گومي استقبلي ابنچ قتيل الليله
ما بين اديچ ابهالمسه يا فاطمه تَچِّيله
خليه ابحضنچ يم حسن وابدمعتچ وني له
يا يمه شوفيه .. هالليله داويه
مسموم چبده ومنهدم آ يالزچيه حيله

راح الحسن راح .. راح الحسن راح

مسموم إجاچ وحالته اتفت الصخر يا يمه
چبده تگطع بالطشت ونازف يَيُمه دمّــه
ما من سلامه وللأجل چف الرزيه اتسلمه
واعيونچ اتشوف .. بالچِفَن ملفوف
امن السم ترى ما يفتح اعيونه بعد يا هضمه

راح الحسن راح .. راح الحسن راح

يا يمه هد حيلي الطشت بعيوني حين الشفته
وممدود أخيي شفته وايحاتي على گلب إخته
شفته يِلــوج امن الألـم وهدتني يُمـه وَنْتــه
بعينه الجريه .. خايف عليه
يدريني أشاهد چم طشت باچر إذا فارگته

راح الحسن راح .. راح الحسن راح

ويلي اعله حالچ فاطمه لو شفتي يُمه جسمه
مجروح واتشوفي الچِفَن ناگع يويلي ابدمّه
بسبعين سهم امصوبيها اجنازته يا يُمــه
حتى ابدَفِنْته .. ظلموها جِثْته
عندچ يَيُمه هالمسه يشكي جُروحه وظلمه

راح الحسن راح .. راح الحسن راح
____
تمت ببركات مولاتي زينب روحي فداها
#فاطمة_كريم
٢٠٢٥ م
https://t.me/qasaidfk128

https://youtu.be/I0kbi2yXeJY?si=QocdCcUA4Z_MyGVM
==========================
مولاتي يا رقيه رقيه رقيه بقلم فاطمة كريم أداء الرادود الحسيني عبدالله آل فاران ليلة الخميس٥/صفر/١٤٤٧

#جديد
#نخوة في التوسل بكريم أهل البيت مولانا الإمام #الحسن المجتبى عليه السلام
طور : قرّب الخيل لعد باب المخيم
.
.
أنخه مولاي كريم العتره أنخاه
بابه مفتوح أو ما خاب التعناه
من كرم چفه مددنه
ما يرد هالليله جفنه

بابه مفتوح يصب خير وعطايا
عنه يدفع دخيل اسمه البلايا
نوگف الليله اعله بابه
وبالعجل نسمع جوابه

نخوه مولاي يمفتاح الشدايد
خاطر حسين تحل هاي المقاصد
وابظمه چبده وجُروحه
كل محب اتطيب روحه

بفاطمه نخوه يا باب المكارم
كل مريض ابحاله يا مولاي عالم
مسحه رايد هالمسيه
وعنّه تنزال الأذيــه

نخوه وابزينب الشافت مصايب
الليـله حِلها يمولاي المطـالـب
يا كريم البيت ننخاك
ما يخيب اللي تعناك

سيدي رجوه وابحامي الحميه
ما تظل عدنه هالليله قضيه
رَيِّــح الليله گلبنه
نَــوِّر ابنـورك دربنه

ياللي منك مددنه وكل عطيه
ابخيمتك خلنه دنيا وآخريه
لبابك الليله وفدنه
يالحسن حاشه تردنه
_
تمت ببركات مولاي الإمام الحسن عليه السلام
#فاطمة_كريم
٢٠٢٥ م

https://t.me/qasaidfk128

#جديد
استشهاد الإمام #الحسن المجتبى عليه السلام
طور : منو إلنه ، كرار الكربلائي
https://youtu.be/-cy5edgOQqM?si=upGoH8RGVsTqZtyf
وكأني بالإمام الحسين عليه السلام في وداع أخيه الإمام الحسن عليه السلام 💔
.
.
وداع .. آ يخويه .. وداع آ يخويه

المسيه بينه اشلون يا خويه المسيه
امن إديه رايح يالحسن خويه امن اديه
المنيه اتفرِّگ بينك وبيني المنيه
وخليه دارك من بعد عينك خليه

بعمرك يخويه عمري ياريت أبَدْله
كل ليله دمعي يمك يا خويه أهِلَّه
امصابك هِدَم لي حيلي ولگلبي سَلَّه
وابروحي جمره تسعر يا خويه خَلَّه

وداع .. آ يخويه .. وداع آ يخويه


يمظلوم اشكثر عانيت بالدنيا يمظلوم
والإهموم اعليك اتراكمت يا خويه لهموم
يمسموم چم مره انسگيت السم يمسموم
بسِ اليوم ما منها سلامه ترحل اليــوم

آه اعله چبدك اللي بالسم تکطع
كل گطعه بيها گلبي اوياها تبضَّع
وما أگدر لونينك يا خويه أسمع
امدد يخويه صعبه ومني اتودَّع

وداع .. آ يخويه .. وداع آ يخويه


هالأيام من دورتها يا ويلي هالأيام
بالآلام هالليــله تِـفارگنــه بالآلام
على الهام تنشال ابحزن خويه على الهام
وبالإسهام نعشك ينرمي تالي بالإسهام

أول سهم يصيبك يجرح دليلي
ودفنك يخويه ياخذ من عندي حيلي
بعدك يخويه يصبح حزني خليلي
وللطف أظل أتاني اهناكه تجيلي

وداع .. آ يخويه .. وداع آ يخويه


الصوايح حگها اعليك تتعاله الصوايح
ونوايـح تظل اعليك للـدوم النوايــح
فوادح مُصابك خـلَّـف آلام وفوادح
يرايح يباب الكرم وسفه عنه رايـح

آه لجرح مُصابك يا معدن الجود
اعليك الگلب إمامي هالليله ممرود
بكل العطايا بابك ما لحظه مسدود
وسفه المسيه ترحل واتضمّك إلحود

وداع يا ولينه .. وداع يا ولينه
___
تمت ببركات مولاي الإمام الحسين صلوات الله عليه
#فاطمة_كريم
٢٠٢٥ م

https://t.me/qasaidfk128

#جديد
في التوسل بعزيزة الحسين السيدة رقية عليها السلام
طور : أصل الرزيه ، حيدر البياتي
https://youtu.be/qFDgMi1qM5M?si=85S2Mac9W17Y1L4F
.
.
لو صارت لك قضيه
بس أتوســـل رقيه

يمك تجيلك .. اتبرد دليلك
رقيه
_____
لـو حايــر ابهم .. گلبـك تـألم .. محـد يمـك
اگصد إليها .. اتمد لك إديها .. وتِكشف همك

هاي الحنينه الطاهره باب الكرم
تمطر إديها يالمحب غوث ونِعَم
بالشده تحضر يمك وتشفي الألم

لمن تنخاها بدمعك .. حتماً احسين ايسمعك

يمك تجيلك .. اتبرد دليلك
رقيه
_____
لو رايد الحل .. بيها توسل .. ما تتعذر
هاي الشهيده .. اندفنت وحيده .. عندك تحضر

بحسين إذا تسألها وبگلبه الحنون
ابلحظتها كل شده إلك والله تهون
وكل أمــرك ابحگه ترى كن فيكون

هيّه عزيزة گلبه .. لجله تگضي كل كربه

يمك تجيلك .. اتبرد دليلك
رقيه
__
الشافت مصايب .. بين الخرايب .. اتحس بجروحك
ما تنسه گلبك .. وشنهو اليعذبك .. وماذي روحك

اقسم عليها بفاطمه وذاكه الكسر
مثل الزچیه وداست اهيا عالجمر
بنظرتها گلبك من هُمومــه ينجبر

هِيّـه الشبيهه للزهره .. كل حالك اتغيْره ابنظره

يمك تجيلك .. اتبرد دليلك
رقيه
__
نادي المسيه .. آيا رقيـــه .. يا مــولاتي
ابحگ الغوالي .. نظره اعله حالي .. والحاجاتي

چم حاجه عندي ومنها مكسور الگلب
اگضیت العمــر هَم ومـدامع بس تصب
حايــر اجيتچ وأمري مــولاتي صعــب

بس عندچ لا ما يصعب .. نظره والخاطر زينب

يمك تجيلك .. اتبرد دليلك
رقيه
__
تمت ببركات مولاتي رقية عليها السلام
#فاطمة_كريم
٢٠٢٥ م

https://t.me/qasaidfk128<i>

#جديد
#نخوة لمولاتنا عزيزة الحسين السيدة #رقية عليها السلام
طور : قرب الخيل لعد باب المخيم
.
.

بدمعي أنخاچ دخيلچ يا رقيه
عندي حاجه وگصدتچ هالمسیه
خاطر حسين وغلاته
نخوه وابدمعة بناته

لخاطر حسين نخيتچ يالحنينه
بهمي جيتچ وأريدچ تنظرينه
نظره يا مولاتي نظره
بالگلب تچوينه حسره

بعمتچ زينب او حسرتها أنخاچ
وأدري ما خاب يمولاتي التعناچ
وآنه متعني إجيتچ
بالعقيله اتوسليتچ

گلبي مكسور او عندي والله شده
نخوه باللي العطش ذوّب له چبده
ياللي جرحوها إديها
هالشدايد فرِّجيها

ياللي شفتي معاناة ونوايب
يا رقيه وحگچ گلبي ذايب
نظره هاي الليله لينه
فرجي هالشده علينه
_____
#فاطمة_كريم
٢٠٢٥ م
https://t.me/qasaidfk128

▪️فزاعيه▪️

في دخول الشام



طبت الشام العقيله يبو فاضل
___
طبت الشام ابألمها
كلشي اتشوفه هضمها
امعيّده الشام ابزلمها
وهيّ من همها عليله
——-
طبه تدري اشلون طبه
بالشتيمه والمسبه
دمع ماظل وتصبه
مو دمع دمها تسيله
———
الشام بافراح ومسره
والگلب والله تطرّه
هالظعن كلها تنظره
وآنه للهادي سليله
——
شوف يا كفال حالي
ببابها ننطر ليالي
انشاهد الصار وجرالي
تدري ما ظلت لي حيله
——
لوعتني الشام ناسه
گلوبها حقد ونجاسه
بالحجر ضربوه راسه
ويل حالي آ ويله
——
طبة الديوان طبه
كل گلب النه تشبه
الهادي دلاله تعذبه
وعلي اتفطر دليله
——
اشكثر لوعه لوعونه
موت والله موتونه
بالخرايب گعدونه
وراحت ارقيه نحيله
———
#بنت_الشمري

#مكتبة_بنت_الشمري

https://t.me/+INNbAljAHK42MTI8

#جديد
دخول الشام
شكوى مولاتنا العقيلة عليها السلام للعباس روحي فداه
طور : يا فاطمه يم الحسن ، عمار الكناني
.
.
يا خويه وابواحد صفر .. وگْفوني اباب القهر
وشفت اللي ما صار وجرى .. هضموني خويه يا گمر
.
.
عن حالي شرويلك واگول .. وحال الضعن واخباره
مَـرُّونه يا خـويه بـدرب .. بيه تِكثــر النظّـاره*١
بالنــار آيابا الفضــل  .. اتلگـونه وابْحِجـاره
ولحظه فلا هاد الگلب .. يا خويه تغلي ناره

حالي اعله وادم ما سده .. يا خويه قهرونه العده
فرجه صفينه للخلگ .. ودار ابعكس خويه الدهر
.
.
وگفوني بالباب وشفت .. كل اللي خويه ما جره
واگبالي الروس ابحقد .. يرموها خويه بِحجره*٢
وراس الولي دمه رجع .. عالشيب يا ويلي جره
رِدْتك ابهالموقف تجي .. وتحضر يسبع الگنطره

اتلگوني ابفرحه وطُبول .. ودمعي يبو فاضل همول
ابعين الشماته ينظرون .. ودلالي يا خويه انكسر
.
.
يابا الفضل شحچي بعد .. وشوصفلك اللي شفته
ما ظل هضم ما ظل جرح .. بالشام إلّا اجْرَعته
بالنار ايْضربونه شفت .. وراس العليل احْرِگته
احترگت يخويه اعمامته .. وامگیدها ارگبته

مدري شطَّفِي بهالوضع .. واونينه خويه استمع
وآنه ابحبل متچتفه .. وحالي يبچي للصخر
.
.
الديوان شرويلك بعد .. يا دخلته ويا هضمه
چم ضيم بيه اتحملت .. چم نایبه وچم لچمه
والأصعب اعليه بطشت .. راس أبو اليمه ابدمّه
بشفافه ينكث بالعصا .. ايزيد ودليلي ألِمَّه

هاي المصيبه الما جرت .. وابروحي جمره وجَّرت
ابديوان أطب وآنه الچنت .. مهيوبه بوجود الذخر
__
#فاطمة_كريم
٢٠٢٥ م

*١ قال الراوي : وسار القوم برأس الحسين ونسائه والأسرى من رجاله فلما قربوا من دمشق دنت أم كلثوم من شمر وكان من جملتهم فقالت له : لي إليك حاجة : فقال :
ما حاجتك قالت : إذا دخلت بنا البلد فاحملنا في درب قليل النظارة وتقدم إليهم أن يخرجوا هذه الرؤوس من بين المحامل وينحونا عنها فقد خزينا من كثرة النظر إلينا ونحن في هذه الحال فأمر في جواب سؤالها أن يجعل الرؤوس على الرماح في أوساط المحامل بغيا منه وكفرا وسلك بهم بين النظارة على تلك الصفة حتى أتى بهم باب دمشق فوقفوا على درج باب المسجد الجامع حيث يقام السبي .

*٢ معالي السبطين للمازندراني، ج 2 ص 83)

عن أبي مخنف، قال سهل: و رأيت روشنا عاليا [الرّوشن: هو الرف أو الشرفة] فيه خمس نسوة و معهن عجوز محدودبة الظهر. فلما صارت بإزاء رأس الحسين (عليه السلام) و ثبت العجوز و أخذت حجرا و ضربت به ثنايا الحسين (عليه السلام).

فلما رأى علي بن الحسين (عليه السلام) ذلك دعا عليها، و قال: اللّه‌م عجّل بهلاكها و هلاك من معها. فما استتم دعاءه حتى سقط الروشن، فسقطن بأجمعهن، فهلكن و هلك تحته خلق كثير.

موسوعة كربلاء من ص ٣٢٠ إلى ص ٣٥١
بحار الأنوار ج ٤٥

https://t.me/qasaidfk128

#جديد
دخول الشام
#فزاعية
.
.
يا طبة الشامات .. هدَّت حيلي

وابابها اوگفنه
وكل الأذى شفنه
كل الهضم ضگنه
بوابة الساعات .. هدَّت حيلي

چم يوم خلونه
عالباب وگفونه
حتى يزينونه
واتعيِّد الشمّات .. هدَّت حيلي

ولمن دخلنا اشلون
تترصد إلنه اعيون
واعلينه ايأشرون
وتگتلنه هالنظرات .. هدَّت حيلي

بفرحه تلگونه
بحجاره ضربونه
وبالنار حرگونه
ما تنعد الهضمات .. هدَّت حيلي

ضيم الخرابه اجروح
تاخذ يويلي الروح
وممنوع حتى النوح
نجري الدمع سكتات .. هدَّت حيلي

يا طبة الديوان
تچوي الگلب نيران
شفنه الهضم ألوان
واللچمه عاللچمات .. هدَّت حيلي
____
#فاطمة_كريم
٢٠٢٥ م
https://t.me/qasaidfk128

#جديد
#هوسات دخول الشام
طور : سحگته الخياله
.
.
الشام الشام ما بيهم أبد نخوه
ابهاي الساعة تدري عازة الخوه
ايتِصَفْح اوجوهنه خويه الما يسوه

( اشلون عالبيبان .. علويات توگف )


شحچیلك يخويه وبالحچي ششرح
والديوان تدري ابدخلته تذبح
كلشي الشفته بيه يابا الفضل يجرح

( دخلة الديوان .. هدّت گلب زينب )


چم مره متت مِنِّ اللي شاهدّته
راسك بالطشت بعيوني من شفته
يزيد ابخيزرانه يلعب ابشِفْته

( يحرگ ابگلبي .. راسك من يِضربه )
____
#فاطمة_كريم
٢٠٢٥ م
https://t.me/qasaidfk128

في استشهاد السيده رقيه عليها السلام
طور
گلبي مات اليريدك
للملا جبار الحريشاوي

https://youtu.be/Zfe-GXeA038?si=7YqfZFfuBxkeIiYE





اليا مصيبه ماتت رقيه

اتصيح ياهو خضب الشيبه ابدماك
——-
طفله ثَلْث اسنين هيَّ اميسره وسوده المتون
السوط طابع چفه بيها امجرحه حتى الجفون
امن العطش والجوع والله ذابله منها العيون
امورمه الاقدام وگلبها ورّم ابكثر الشجون
اتريد ابوها الغالي يجيها
اتصيح وينه امن الالم جيبوه اليه
_____

امدلله بوْجوده چانت والفرح بالدنيا عام
امعلمه يناغيها هوّ وابحضن شوگه تنام
الها جم ليله يتيمه وفارگت حضن السلام
شوك والجمر وعطشها وبعده يوليها اللئام
وين غايب بويه يغالي
بعدك اتلوعنه لوعه وما مثلها
——-
الابو خيمه لبناته ايعيشن ابفيه ابامان
والحنين احضانه جنه تشيل كل هم الزمان
شوفني هم اعرفتني وشوف من حولي المكان
فزت وصوته ينادي گومي لن حان الاوان
هذا حده عمرج يبابا
گافي اشبعتي يبويه امنل هضيمه
———
صاحت اتريده ابوها اتريد هالليله الحنين
غايب ومايدري بيها من دهر لو جم سنين
بالطشت جابوه راسه امخضب وشِبعت ونين
آ يغالي منهو خضب راسك وشج الجبين
شهگه شِهگت واعليه طاحت
صاح اخوها عمه ماتت هلبنيه
——
#بنت_الشمري
٢٠٢٥

#مكتبة_بنت_الشمري

https://t.me/+INNbAljAHK42MTI8

#جديد
المصيبة العظمى #دخول_الشام
#هوسات طور : سحگته الخياله
.
.

يا دخلة الشام ويا مصايبها
ما تنعد وحگ راسك نوايبها
وشفنه من اهلها كل عجايبها

( فرجه خلونه .. بالبيبان نوگف )


ثلث تيام وگْفونه على البيبان
حتى ايزينوها وتدخل النسوان
وشفنه امن الشماته والهضم ألوان

( آه يالساعات .. من عدها اشلگینه )


عجوز اهناك خويه للگلب سَلَّت
راسك بالحجاره بالحقد ضِربَت
ودمك سال خويه وشيبتك خَضْبَت

( بالحجر راسك .. چم مره تخضَّب )


أصعب موقف اعليه أطب ديوان
وآنه زينب وبت حجة الرحمان
تتفرج عليه زمرة الطغيان

( خويه واگبالي .. راسك يضربونه )
___
#فاطمة_كريم
٢٠٢٥ م

https://t.me/qasaidfk128

https://youtu.be/0gSscaLTCys?si=k13qa__kyhyWFk1e
==========================
نخوه يا شبان هاشم طالبين بقلم فاطمة كريم أداء الشبل الرادود عباس الصالح العشرة الثالثة ٢٨/محرم/١٤٤٧