#تراث

زينب لفت یا عباس ما تنهض تلگاها
وشوف اشحالها الفرگاك وتتفگد أيتاماها
ــــــــــــــــــــــــــــــــــــــ
زينب لفت ليك اليوم یا عباس شچایه
تنادي من يدليني أعلى راعي السيف والرايه
يعمه يا على السجاد أخذني للمسنايه

اريدن للولي اتعنه
ونصب على الگبر حنه
وخبره ابيا بلد چنه

و حجيله اعلی اهالی الشام يبني وهضم بلواها
ــــــــــــــــــــــــــــــــــــــ
يوم الى وصلنه الشام ريته ايشوفنه أبعينه
من طلعت اهاليها او غدت تتفرج اعلينه
وحنه اتهل مدامعنه وعلى الهزل امچتفينه

والتمت علينه الناس
وحنه امهبطين الراس
ريته ايشوفها العباس

لمن يبچن اخواته وهي تضحگ علی ابچاها
ــــــــــــــــــــــــــــــــــــــ
لحد یا گمر عدنان چه ترضه لهذا الحد
شفت الموت بعيوني ومن الموت والله ازيد
اطب ايزيد ديوانه وعليه ايگوم يتنشد

يگلي وتهل مني العين
يزينب وشسبب تبجين
اخوچ حسين عنچ وين

اوين الليث أبو فاضل عز هاشم وعلياها
ــــــــــــــــــــــــــــــــــــــ
يزينب ما تحاچینه اشجابج لعد هلديوان
چاوین اخوتچ عنچ وبو فاضل گمر عدنان
گلتله ابكربلا تمت ضحايه اموسده التربان

وجينه المجلسك يسره
حسره نجر بثر حسره
تجري ادموعنه عبره

وهای الحرم تتباچه یبن هند اعلى ولياها
ــــــــــــــــــــــــــــــــــــــ
يخويه من سمع حچيي مني گام يتشافه
راس حسین بین ایده ويهتف فرح بسلافه
شال العود بيمينه وگام ايوسم اشفافه

گلتله وتهل مني العين
ريض يا يزيد الحين
لا تضرب ثنايه حسين

هذا مهجة الزهره وسلوان النبي طاها
ــــــــــــــــــــــــــــــــــــــ
ريته ايشوفنه الهادي یبن هند اعلى هالحاله
تضرب رأس ابو اليمه وليه تتفكر اطفاله
وانته اعلى التخت جاعد ويمك موچبه اعياله

وسفه والوسف شيفيد
صار الثار يومه ابعيد
لابد يوم الك ييزيد

توگف بالحشر ويا ويحكم باري اسماها
ــــــــــــــــــــــــــــــــــــــ
شحچيلك يبو فاضل ابهظم الى سده علينه
شرحه ايطول يالوالي وليك اليوم رديه
انهض یا گمر هاشم لعد الـوطن ودينه

انهض او وديني الهلى
وباري ابيمينك محملي
هیهات اروح ابلا ولی
ودمعي على اخدودي يهلى
ــــــــــــــــــــــــــــــــــــــ
ما اسدر لعد طيبه حرمه فاجده الوليان
وشوف اهل الشماته هناك يا عباس والعدوان
شگولن لليناشدني عنك يا گمر عدنان

شنهو العذر يابو الفضل
من تگطع احبال الوصل
یا من لعد اختك عگل
عگبك ذليله اشلون اظل

ويثرب چیف اطب ليها ودارك موحشه الگاها

الشاعر المرحوم
السيد عبد الحسين الشرع


#اللهم_عجل_لوليك_الفرج

من سدو الماي عالفاطمية

#تراث

من سدوا الماي  عالفاطميه
وكل مرضعه تصيح  يبني شبيديّه
گلب الرضيع من العطش وجر لهيبه
والله شمصيبه ... تصبح الغريبه
ــــــــــــــــــــــــــــــــــــــ
اه يا نيران حسرة گلب عبدالله حرگتني
ذوّبت شحمة عيوني وأثرت بيه وعمتني
شلون حسرة گلب يابس حرِگت دمي ويبستني

لو چان إلي قوة گلب
واعصاب قوة من الصلب
چا جرن  بدموعي التصب
وبونينه الطفل فتني

بالمهد ويلوع حيرني أمره
والطفل لومات گلبي شيصبره
مايقبل النوم ويون  ونّه عجيبه
والله شمصيبه ... تصبح الغريبه
ــــــــــــــــــــــــــــــــــــــ
جودي ياعيون الرباب وخلي عبراتج يجودن
والگلوب السايلات النوح خليهن يعودن
نوحن على الطفل نوحن لاتسترن لاتهودن

والگلب لو وش نّمه
 تبگى العيون مورّمه
بدال الدمع تنزف دمه
والهموم شمايزودن

يتهدم الحيل  وانهدم حيلي
ومن ثگل الهموم مانمت ليلي
عالگبل مِيحانه انفطم وفطمته النيبه
والله شمصيبه ... تصبح الغريبه
ــــــــــــــــــــــــــــــــــــــ
هالله هالله شلون شح الماي بخيام ابو اليمه
عمت عيني على الرضيع المن ضماه احترگ دمه
وامه متدوهنه وكل ساع تنحني فوگه وتشمه

وتصيح يا نعم المضن
 دگات گلبك فترن
لا ماي عندي لا لبن
والعطش ناره مضرمه

وشبيدي عالماي عبدالله يبني
من شفتك تلوج گلبي لسبني
ولا گطره منه بالخيم يحصل واجيبه
والله شمصيبه ... تصبح الغريبه
ــــــــــــــــــــــــــــــــــــــ
اتبنت الموقف الحره وشافت الحاله خطيرة
تناولت جود الكفلها وإعتنت له مستجيره
واتعثر عالمصيبه واتعكز عالبصيره

صاحت بعين الغانمه
بالخيم حاله مألمه
أطفال  ماردها الضمه
 والمراضع مستحيره

رب الوفـه صاح والصيحه خطره
لا يهمچ الماي  شما يصعب امره
لو صاير بسابع سمه بالسيف اجيبه
والله شمصيبه ... تصبح الغريبه
ــــــــــــــــــــــــــــــــــــــ
حنى ضلوع الوفه لزينب واستلم جوده وتچنه
خفگت  الرايه على راسه وخفگت اگلوب المحنه
حمل وتسيطر بشاطي العلگمي وماشرب منه

هيهات  يتهنه بشرب
 ويتروه من ماي العذب
والطفل گلبه ملتهب
وبالرضاعه ما تهنه

مشرف على الموت وكل چاره ماله
والمرضعه تلوج وتبچي على حاله
والطفل شيفيده الثدي لو جف حليبه
والله شمصيبه ... تصبح الغريبه
ــــــــــــــــــــــــــــــــــــــ
وظلت عيون العقيله شابحه لخيمة وليها
وتصد لاطفال ابو اليمه لا نفس لا روح بيها
والرباب تصوط عنها وترجع وتصفج بديها

مايوسه ما عدها أمل
حست بعباس إنچتل
وعبدالله يبراله الاجل
والمرامي مصوبيها

عالنبل والزان معرض وريده
من شال الحسين  عبدالله بيده
وينتضر نبله حرمله بنحره تصيبه
والله شمصيبه ... تصبح الغريبه
ــــــــــــــــــــــــــــــــــــــ
طوگ من نور الشهاده للرضيع مفصليله
ومن أجور التضحيات بدم وريده مسجليله
مرضعه بدار لحضانه بالجنان معينيله

سبحان رب الأكرمه
لهذا الرضيع وسلمه
بيد  الشفيعه فاطمه
 وللجنان تزينيله

وحلفة اسقبال  ينصب له عمه
وبدموع العيون ينغسل دمه
وشاهدو سكان الخلد حاله غريبه
والله شمصيبه ... تصبح الغريبه


الشاعر المرحوم
الحاج مهدي الاموي الكربلائي


#اللهم_عجل_لوليك_الفرج

#تراث (افصلك مصايب هل سفر)💔


ابْهَالأرض خيل الأعادي جسم اخيّي داسته
يا نزول الغاضريّه خبّروني ابحفرته
ــــــــــــــــــــــــــــــــــــــ
ابهالأرض عبّاس گطعوا اچفوفه او طاح العلم
ابهالأرض شيخ العشيره استخرجوا گلبه ابْسَهم
ابهالأرض هجموا علينا او شتّتونا امْن الخيم
والولي مرمي او عينه اتشوف حالة نسوته
ــــــــــــــــــــــــــــــــــــــ
لاح گبر حسين ليها وانذهل منها الگلب
وصرخت او خرّت على گبره او مدامعها تصب
وصاحت اگعد شوف متني اشْحَل عليه امْن الضّرب
وانظر السجّاد من بعدك اشْصارت حالته
ــــــــــــــــــــــــــــــــــــــ
لو تشوفه يوم شدّوا الجامعه او گيد الثّگيل
وحطّوا ابْرجله سلاسل او هو يَبْن امي عليل
فوگ ناگه امهزّله والدّرب يَبْن امّي طويل
يفت گلبي من يضربونه اُو يجذب ونّته
ــــــــــــــــــــــــــــــــــــــ
وحالنا يحسين حال اگشر على ذيچ الهزل
هاي متعوّگ جَمَلها وذيچ طاح الها طفل
وذيچ شال الظّعن عنها او تركض ابتالي الزّمل
والضّرب من غير فاصل ولگلوب امفتّته
ــــــــــــــــــــــــــــــــــــــ
لو رِدِت يحسين افصّل لك مصايب هالسّفر 😭
يوم ما يمكن أعدّد يا شهيد او لا شهر
ذاب جسمي امْن السّرا وانعمت عيني امْن السّهر
هضمني ابن زياد يَبن امّي او شهرني ابْكوفته
ــــــــــــــــــــــــــــــــــــــ
خويه چم سوگ ادخلتها او چم مدينه او چم بلد
وجيت بيتامك على گبرك ولا ليّه جلد
وتدري بركوب الجمل ينحل يخويه للجسد
وين ابو فاضل كفيلي وصّلوني الحفرته
ــــــــــــــــــــــــــــــــــــــ
گامت اتصب الدّمع وايتامها اوياها تدور
للشّريعه گاصده اتدوّر أبو فرجه الغيور
واوگعت فوگ الگبر والگلب بحزانه يفور
صاحت اگعد يا كفيل اللي طلعت ابذمّته


الشاعر المرحوم الملا عطية الجمري


#اللهم_عجل_لوليك_الفرج

#تراث ميمر

ضعن الفواطم يحسين
طب كربلا حاديها
ــــــــــــــــــــــــــــــــــــــ
من اليسر ردن بنات الهادي
الطف كربلا اورجنت ابحنها الوادي
اوعالگبر زينب اوچبت واتنادي

يحسين من كثر ابچاي
عيني نشف جاريها
ــــــــــــــــــــــــــــــــــــــ
يبن أمي من خليتك اعلى الغبره
دم طبره من جسمك يكت ابطبره
بالله الچتل يحسين هين أمره

لاچن يبـو اليمه ليش
لچفوفك امگطعيها ؟
ــــــــــــــــــــــــــــــــــــــ
الجمّال گص چفك الخاتم الخاتم ناله
والطمع غره اوهاي سوء أعماله
لاچن يخويه اشرادت الخياله

يبن أمي لضلوعك ليش
بالحافر امهشميها ؟
ــــــــــــــــــــــــــــــــــــــ
يحسين ما مسلم إلحن الحالك
سهم المثلث جرَّه من دلالك
يبن أمي أدري بالسهم چتالك

اوذاك السهم مسجـي إسموم
والچبدتك ماذيها
ــــــــــــــــــــــــــــــــــــــ
ضامي الگلب يحسين ذبحوك الگوم
اوظليت من شرب الميه محروم
امن الماي هل صح لك غسل يا مظلوم

لو جثتك يا مظلوم
من دمك مغسليها ؟
ــــــــــــــــــــــــــــــــــــــ
يبن أمي ما تگعد تشاهد حالي
ابجمر المصايب منمرد دلالي
زينب أنا المحد يشوف اخيالي

عگب الخـدر للشامات
أمشي ابيسر تاليها
ــــــــــــــــــــــــــــــــــــــ
يحسين يوم اللي مشه حادينه
اعله المعركه اعله اجسومكم مرينه
ردنه الموادع ما حصل بيدينه

يبن أمي واگلوب الـگوم
خوف او رحم مابيها
ــــــــــــــــــــــــــــــــــــــ
يبن أمي ما تدري شنو الأذانه
اوشنهو الهظمنه اوشنهو البچانه
وگفونه بين ايدين ابن مرجانه

بحبـال من إيد الإيد
لطفالك امچتفيها
ــــــــــــــــــــــــــــــــــــــ
واللي جرح گلبي جرح ما يلتام
الشام آه الشام من طبة الشام
الحال الأرامل من أصد والأيتام

تكسر الخـاطر وابنار
گلبي يهيج إعليها
ــــــــــــــــــــــــــــــــــــــ
يحسين والثگل حنيني او نوحي
شاهدت عيني امصاب مارد روحي
ونة عليلك لچم بيها اجروحي

من كثرة الشامت گام
ونْة الگلب يخفيها
ــــــــــــــــــــــــــــــــــــــ
يخفي ونينه لاچن ابروحه ايجود
ما يجزع او راضي ابقضاء المعبود
إيصد اليتاماك اودمع عينه ايجود

تبچي اعله حـاله الأيتام
والونته اتنابيها

الشاعر المرحوم
الشيخ كاظم المنظور الكربلائي

(373)
#اللهم_عجل_لوليك_الفرج

#تراث

(موشح)

جـيـنـه نـنشد كربلا مضيعينها
بـيـهـا زيـنب گالوا ميسرينها
ــــــــــــــــــــــــــــــــــــــــــــــ
يـسـروهـا ولا لـها واحد فزع
شـال حادي ضعونها بساع وگطع
جـيـنه ننشد وين ابو فاضل وگع
مـا تـدلـونـه الـشريعه وينها
ــــــــــــــــــــــــــــــــــــــــــــــ
بـس اشـوفـه والعتب مني يزود
وادري ابو فاضل على النخوه يجود
عذره حگه يگول مگطوع لزنود
وحـال مـلـك الموت بينه وبينها
ــــــــــــــــــــــــــــــــــــــــــــــ
جـيـنـه ننشد كربلا عليها نعتب
انگول هـاي رجـال وتدور الغلب
حـرمـه زينب بيش مطلوبه بذنب
فـوگ چـتـل حسين ومسلبينها
ــــــــــــــــــــــــــــــــــــــــــــــ
ارد انـشـدچ كـربلا عن النزيل
شـلون ضعن الحرم شال بلا دليل
انچــان گلـتيلي يعاونها العليل
بـالـمـرض مشدوه وينه و وينها
ــــــــــــــــــــــــــــــــــــــــــــــ
ارد انـشدچ هم صدگ بالشام عيد
وحطوا بطشت الذهب راس الشهيد
ومـن نـشـد زينب بديوانه يزيد
گاعـده لـو واگفـه مـخـلينها
ــــــــــــــــــــــــــــــــــــــــــــــ
جـيـنـه ننشد عالعليل من انوله
فـوگ ضعف المرض هالبلوى إبتله
لـيـش مـا غـاصت بهلها كربله
مـن گطـع بالسيف راس حسينها
ــــــــــــــــــــــــــــــــــــــــــــــ
جـيـنـه ننشد كربلا وزين العباد
الروس شالوها وبگت بس الأجساد
شلون جسمك سيدي من المرض باد
مـا حـصل واحد حظى بتجفينها
ــــــــــــــــــــــــــــــــــــــــــــــ
جـيـنـه ننشد كربلا عن العيال
شـلون گلي بلا ولي هالظعن شال
خـلـوا الـسبعين من غير الأطفال
مـذبـحـه ويلي ولا مـسجينها
ــــــــــــــــــــــــــــــــــــــــــــــ
جـيـنـه ننشد كربلا والدمع زاد
بـيـهـا أميه گظت بحسين المراد
كـربلا عليها بچـت سبع الشداد
ويـن شـيـعـتها شسبب ناسينها


الشاعر المرحوم
الملا زاير

#اللهم_عجل_لوليك_الفرج

#تراث
رجوع ضعن الحسين يوم الاربعين

زينب يخوتي صاحت اجينه من اليسر جينه
ما تدرونه ابيا حال رحنه وبيش ردينه
ــــــــــــــــــــــــــــــــــــــ
ما تدورنه ابيا حال رحنه وبـيش اجيناكم
مـا والله علينه يهون على التربان عفناكم
بكت بكلوبنا حسره مشينه ولا دفناكم

ومـن الشام اجينـه اليوم
مضلومات للمضلوم
حله بعيون اخوتي النوم

واحنـه وكفت الـديوان بالشام او جرت بينـه
ــــــــــــــــــــــــــــــــــــــ
وصلت الشام مسبيه عسـاني لا وصلت الشام
الزلم ويه النسه طلعـت تتفـرج علـى الايتـام
جمـع ضـلام والنسوان تتراجف مـن الضـلام

ولا واحد من اخوتنـه
يحظر ويشوف حالتنه
بالديوان وگفتنه

يهل الشرف والغيره تاذيكم وتاذينه
ــــــــــــــــــــــــــــــــــــــ
ردتكـم يخوتي بالشام تحظرون وتشوفونه
بالديوان يالوليان والشمات هضمونه
وكل واحد من المجلـس علينـه شـابحه عيونه

وينادون يخت حسين
وين اولاد عمي وين
يزينب ليش ما تحچين

ننشد عـن اخـوچ حسـين وحمـاي الظعـن وينـه
ــــــــــــــــــــــــــــــــــــــ
ذيج السا صحت يحسـين العمر لا طالت ايامـه
يخويـه الشـام هد حيلي ودعاني الليل ما نامه
علـى يزيد الـرجس طبيـت وراسـك چـان جـدامـه

ويضرب راسك اكبالي
وهــيج نار دلالـي
صـحت لا تظرب الـوالي

عسـه شلت يمينك ليش تـظرب راس والينـه
ــــــــــــــــــــــــــــــــــــــ
يزيد ومـن سمـع حجيـي نهض سب والدي وسبني
بذاك المجلس الميشوم كام يريد يظربني
عمـت عيني الـدهر لشام عكب حسـين دولـبني

وعگب الخدر ذاك الفات
لني بمجلس الشـمات
يعود النه الدهر هيهات

وتعود اخوتي وبالخير تتعمر نوادينه
ــــــــــــــــــــــــــــــــــــــ
هم تعود الي يحسين حي وتعـود ايامك
انت السيد الجانت تحب الوادم اجدامك
امس واحد من أهـل الشام يتضرج على يتامك

وچانت يالولي نيته
بتك تخدم ابيته
حرمه وكمت رديته

وبجيت وصحت ، بالديوان خويه حسـين ذلينه
ــــــــــــــــــــــــــــــــــــــ
هذا الشام يبن امي مصايب بي شـفـت كثره
شوغه اشد من شوغه وجمـرة أشـد مـن جمـرة
مصايب كصـن ضلوعي وحك ضلع امك وكسـره

وهسا يالولي جيتك
بعيالك وأهـل بيتك
يبن أمي تمنيتك

عـدل وتشوف حالتنه ونحاچيك وتحـاچينـه
ــــــــــــــــــــــــــــــــــــــ
جيناك وتمنيناك حـي وتشوفنه بعينـاك
اوتشـوف اشلون يتهاون على كـبرك نساوينك
متكلـي يخويه شحال بـين أعيالـك وبينـك

ماني اختك المضلومه
وعيالـك المهضـومه
نمـت عـنهم فرد نومـه

شكول أنسـيـت يبن امي عـزيـزة كلبـك سـكينه
ــــــــــــــــــــــــــــــــــــــ
لا والله اعتذر ما كول اخـوي حسين ينسـانه
اخـوي الشـرف والغيره وحفـظ الـخـدر مـن شـانـه
لا چـن صـار ذاك الصـار وبهالحـال خلانـه

اخـوي ومـا لـوه جيـده
وللذل مـا يمد ايده
يخسه العدو وتهديده

اخـوي بمهجتـه ضـحه وبعيالـه لجـل دينـه


الحاج المرحوم مُعين السباك

#اللهم_عجل_لوليك_الفرج

#تراث

أصبحت مستشفى للإسلام وادي كربله
والطبيب احسين للناس شبل عقد الوله
يامظلوم حسين .. يامظلوم حسين
ــــــــــــــــــــــــــــــــــــــ
اشلون مستشفى أبو اليمه صبح وادي الطفوف
حكمه الناس و دواها و بيها عرش الله يطوف
ياسفيه الراي أگصد كربله و جرب وشوف
والتمسك بيها يبره و طيب ايرد الهله
ــــــــــــــــــــــــــــــــــــــ
والطبيب اللي يداوي الناس لو عارض عرض
لابد ينشده اعلى علته و لابد ايجس النبض
تربة احسين أبو اليمه مرهم الكل المرض
والدوه مجاني عنده و يربح اليگصد هله
ــــــــــــــــــــــــــــــــــــــ
الله خص حسين بثلاثه خصال وشرفه
مستجاب الدعه ابگبته لو دعه الداعي ولفه
و جعل من نسله الآيمه وتربته بيها الشفه
ومرمهم المالوم هيه ويحل دوم المشكله
ــــــــــــــــــــــــــــــــــــــ
تلگه زوار أبو اليمه اوجوها تزهي وتنور
 إبشر ابغفران ذنبك يالموالي والسرور
لولفه الزاير وطب الگبر ابو اليمه
حسين من داخل الشباچ يگله يا هله
ــــــــــــــــــــــــــــــــــــــ
إنظر الگبر أبو اليمه شلون نوره مرتفع
عاين المأتم و شاهد هالقناديل التشع
ماثبت هالدين إلا حسين والعشرة وسبع
وابدمه نحرة بنى الدين وسبي العايله

الشيخ المرحوم ياسين الكوفي

(372)
#اللهم_عجل_لوليك_الفرج

#تراث مفجع

للأربعين

گبر احسين دارت بيه صوبين
ما تتفرزن الوحده امن الثنين
ــــــــــــــــــــــــــــــــــــــ
فرد طيحه اعلى گبر احسين طاحن
حنين ام الفصيل اعليه ناحن
اشلون اصوات عد الگبر صاحن
يراعى هالگبر جتك مساچين
ــــــــــــــــــــــــــــــــــــــ
بچت زينب او حنت والوت الجيد
يخوي احسين جينا لك امن ابعيد
من الشامات خوي اگطعت هالبيد
گصدنا كربلا او جيناك عانين
ــــــــــــــــــــــــــــــــــــــ
يخويه احسين لو ينچشف گبرك
لَحب اللحد واتمدد ابكترك
اشبيدي ردت عمري دون عمرك
وانته اللي تچفني يلحسين
ــــــــــــــــــــــــــــــــــــــ
بچت سكنه او نادت رخصيني
اريد احچي او يه ابوي او نور عيني
اشو حال الگبر بينه او بيني
بچت نادة يعمه احچي اشمتحچين
ــــــــــــــــــــــــــــــــــــــ
هوت سكنه اعلى كبر احسين تشچى
يبويه الما چنت ترضه امن ابچی
علمني شگل للناس شحچي
لو گالو يسكنه والدلچ وين
ــــــــــــــــــــــــــــــــــــــ
يبوبه ما تطر الگبر عنك
على ثاني كتر خليني منك
اشم نحرك يبويه واوسدنك
هاي امناة كلبي لو گضه البين
ــــــــــــــــــــــــــــــــــــــ
حنت بالبچه او حنن اوياها
لن سجادها للگبر جاها
گامت زينب اتلگت حماهـا
يعمه ماشبعنه امن البچه زين
ــــــــــــــــــــــــــــــــــــــ
يعمه النا گبر ودينه يمه
چفيلي البذل روحه لبو اليمه
اخذها اوراح بيها الگبر عمه
گلها هذا گبره اشبعد تردين
ــــــــــــــــــــــــــــــــــــــ
حنن يم گبر عباس حنه
يا عباس بالله دگعد النه
لا ترضه يضمك لحد عنه
تضمك گاع ما چنه امحسبين
ــــــــــــــــــــــــــــــــــــــ
يا عباس طير اللحد عنك
يخويه والحرم كلهن لفنك
امن الشامات يا خويه اعتننك
يبذلنلك بقايا ادموع العين

محمد حسن دكسن

(371)
#اللهم_عجل_لوليك_الفرج

#تـراث

مَلكْتُم فؤاداً ليسَ يدخلُه العذلُ
فَذِكْرُ سواكم كلّما مَرَّ لا يَحْلُو

يؤنَبني في حُبّكمْ كلُّ فارغٍ
ولي بهواكم عَنْ ملامَتهم شغلُ

وماذا عَسَى تُجْدي الملامةُ في الهوى
لِمَنْ لا له في الحُبِّ لُبٌّ ولا عَقلُ

لَئِنْ فَرضوا مِنّي السلوَّ جهالةً
فحبكُم عندي هو الفرضُ والنَّقْلُ

أأسْلو ولا صبغ المشيبِ بعارِضي
يلوحُ ولا صبغُ الشبيبة مُنحَلَ

ولَو في سواكم أهلَ بيت محمدٍ
غرامي لكَانَ العَدْلُ عندي هو الْعَدْلُ

حَملتُ هواكمْ في زمان شَبيبتي
وقد كنتُ طِفلاً والغرامُ بكم طِفلُ

فيا عاذلي في حُبّ آل محمدٍ
رويدكَ إنّي عنهمُ قطّ لا أسْلوا

أأسلُو هوى قومٍ قَضَى باجْتبائِهمْ
وتَفْضيلهمْ بينَ الورى العقلُ والنّقلُ

أُولئِكّ بناءُ النبيّ محمدٍ
فقل ما تشا فيهم فإنّكَ لا تغلوا

فروعٌ تَسامتْ أصلُها سيّد الورى
وحَيْدَرةٌ يا حبّذا الفرعُ والأَصلْ

تَفَانَوا على إظهار دينِ أبيهمُ
كراماً ولا جبنٌ لديهمْ ولا بخلْ

إلى الله أشكو عُصْبةً قد تَحاملوا
عليهمْ ودانُوا بالأَباطيل واعْتَلّوا

يرومون إطفاءً لأَنْوارِ فَضْلِهمْ
وما بَرحتْ أَنوارُ فضلِهمُ تَعلُو

وهُمْ أَنكروا في شأنِه بَعْدَ أحمدٍ
مِنَ النصّ أمراً لَيس يُنكرهُ العقلُ

وقد نوَّه المختار طه بِذكْرِهِ
وقالَ لهم هذا الخليفة والأَهْلُ

وَوَلاّهُ في يوم الغدير ولايةً
على الخلقِ طرّاً ما لَه أبداً عَزلُ

ونصَّ عليه بالإمامة دونهم
ولو لم يكن نصَّاً لقدَّمه الفضلُ

أليسَ أخاهُ والمُواسي بنفسِهِ
إذا ما الْتقى يَومَ الوغَى الخَيْل والرجلُ

أما كانَ أدناهُمْ إليه قرابةً
وأكثرهمْ عِلماً إذا عَظُمَ الجِهلُ

أما كانَ أوفاهمْ إذا قال ذمّةً
وأعظمُهم حلْماً إذا زَلّتِ النَّعْلُ

وأفصَحَهُمُ عند التلاحي وخيرَهم
نَوالاً إذا ما شِيمَ نائلُه الجَزْلُ

يحجَونَ أنصارَ الإِلهِ بأنّنا
قرابتُهُ مِنّا بهِ اتّصَلَ لحبلُ

وهَلْ كانتِ الأَصحاب أدْنَى قرابةً
وأقربَ رِحْماً لَو عَقلتُم أم الأهلُ

وهُمْ أخذوا بعدَ النبيّ محمدٍ
من ابنتِيهِ ما كانَ أنْحلَها قبلُ

تَمالوا علَيْها غَاصِبين لِحَقِّها
وقالوا معاذ الله أن تورثَ الرسْل

وحكمهُم لا شك في ذاكَ باطِلٌ
وكيفَ يصحّ الفرعُ والأصل مُختَلّ

أليسَ أمير المؤمنين هو الّذِي
لَه دونهم في ذلِك العقدُ والحل

وهُمْ قتلوا مِن آل أحمد سَادةً
كراماً بهم يُسْتدفعُ الضرّ والأزلُ

سَقوا كلَّ أرضٍ من دماء رقابهم
وشِيعتِهم حتّى ارتوى الحزن والسَّهلُ

فَصَبراً بني المختار إنّ أَمَامَنا
لموقفُ عدلٍ عندَهُ يقعُ الفَضْلُ

وعندي لِمَنْ عاداكمُ نَصْلُ مقولٍ
إذَا ما انْبرى يوماً يحاذرهُ النَّصْلُ


للشاعر الراحل
حسن بن علي بن جابر
الهبل اليمني

(370)
#اللهم_عجل_لوليك_الفرج

#تـراث

حين راس حسين ويه الجسم أمسه ابحفرته
انعطف واحد على الثاني وگام يشچي حالته
ــــــــــــــــــــــــــــــــــــــ
عن لسان الحال أبيِّن خبر عن راس الحسين
من تلاگه اويا الجسم بالگبر يوم الاربعين
حين شاف الجسم راسه انعطف وأبداله الحنين

واظهر الصوت من النحر
يا راس بن سيد البشر
عگبك علي تدري اشصدر

لعبت الخيل اعله صدري وبالحوافر رضته
ــــــــــــــــــــــــــــــــــــــ
وبالشمر تخبر بيوم اللي على صدري اعتله
وافرزك عني يراس حسين بن عقد الوله
وارفعك عالرمح وآنه بگيت مرمي بالفله

دمي من جروحي يكت
ومن دم وريدي اتغلست
بذاري الوطيه اتچفنت

الراس ناده النوب اخبرك حالي وأجرت دمعته
ــــــــــــــــــــــــــــــــــــــ
اهنا يجسمي انچان ذاري الريح سوالك چفن
راسك ابديرة الكوفه ابطن تنور انسجن
ابهاي تشهد لي الحواري النزلت إويا أُم الحسن

بهودج النور إمن السمه
يا جسم و أُمي فاطمه
منها المدامع ساجمه

ومأتم بدار ( الخولّه ) على مصابي نصبته
ــــــــــــــــــــــــــــــــــــــ
الجسم ناده إهنا يراسي من الضمه چبدي إنفطر
وسهم المثلث ابگلبي مضه او مطلاعه الظهر
وما بگه مفصل صحيح اوعظم سالم ما إنكسر

وتعلم الجمّـال اشصنع
بالخــاتم إغتر وطمع
وبخنجره الچفي گطع

حتى ثوب اللي عليه آل أُميه سلبته
ــــــــــــــــــــــــــــــــــــــ
اموذر ابحد المواضي امهشم ابحافر الخيل
ومن بني( سد) لعد دفني اگصدت وتعين العليل
بين اديها تشيل مني كتر والثاني يميل

لمن بنى سد شاهدت
حالي على مصابي جرت
ومن علي السجاد انشدت

هالشهيد اشچان ذنبه وطاحنيها الجثته
ــــــــــــــــــــــــــــــــــــــ
الراس ناده إهنا يجسمي إيهون البحالك سدر
لاچن اللي جره ابحالي يفسر الصم الصخر
آنه باريت العيال الدرب كله ابها لسفر

وآنه المشيت اويا لظعن
وإجرعت چاسات المحن
وانظر خواتي اتلوعن

بالعصه وشفت العليل الطوگ ولَّم رگبته
ــــــــــــــــــــــــــــــــــــــ
يا جسم واللي هظمني وخله دمعي يكت حمر
من شفت متن إختي من السوط صاير بي أثر
وكل عصى اللوعت زينب لچمت اصواب الحجر

وعيني على اطفالي ترب
ودمعـي عليها منسچب
آنه أنضرب من تنضرب

والطفل من يضربونه يستجير إبعمته
ــــــــــــــــــــــــــــــــــــــ
وشفت بالكوفه مصايب لاچن الأعظم الشام
مدري الفرجة الوادم أصد لو أرعه الايتام
شفت بالمجلس حريمي واجفه بين اللئام

وزينب الحرة امچتفه
امهبطه الراس او واجفه
إبحيرت بنات المصطفى

وگام بن هند ايتخطه ايعرف زينب رادته
ــــــــــــــــــــــــــــــــــــــ
ولعد حال الحرم دمعي سال وآنه اعله السنان
وبالطشت لمن هدوني لعد عباد الأوثان
وحطني اگباله وبيده لزم عود الخيزران

وبشفتي لساع الوسم
البالخيزرانـه منرسـم
جاوبني بالله يا جسم

إمصابك أعظم لو إمصابي ؟ وياهو أعظم غصته
ــــــــــــــــــــــــــــــــــــــ
الجسم ناده ابهالمصيبه كل مصيبه هونت
لاچن اخبرني اعيالك كلها وياك ارجعت ؟
لو بعد منها يبو السجاد بالشام اعگبت

نـاداه يتيمه اتعـگبت
موعدله لاچنها گضت
ماتت غصر من شاهدت

ثغري من الوسط أزرگ هوت فوگه او شمته

الشاعر المرحوم
الشيخ كاظم المنظور الكربلائي

(366)
#اللهم_عجل_لوليك_الفرج

#تـراث

زينب ردت أمن الشام تنشد عن اهاليها
تشجي اتريد للوليان ظيم الي سده عليها
ــــــــــــــــــــــــــــــــــــــ
صاحت يا علي السجاد وتهل الدمع عبره
يبني جسم أبوك حسين گلی ابیا کتر گبره
ارد اگعد وسولفله ابكل الي سده وجره

واسچب دمعة اعيوني
و اراوي للولي امتوني
عنه ابيوم مشوني

واخبره ابناگتي الهزله ويا هــو الي يباريها
ــــــــــــــــــــــــــــــــــــــ
دلاها اعلی گبر حسین لاچن على الگبر طاحت
گامت على الوجه تلطم وسالت عينها وصاحت
خواتك من عگب عيناك يبن امي ابيسر راحت

ردت ليك تشچيلك
وتتصارخ مـداليـلك
يبو السجاد شحچيلك

يوم الوصلوها الشام والوادم لفت ليها
ــــــــــــــــــــــــــــــــــــــ
لگينه الناس ملتمه زلم يحسين ونساوين
تدگ بدفوف يين أمي وكلها ابچتلك امعيدين
من شافوا ضعنه اگبل دارو على الضعن صوبين

تعاين گامت علينه
وكلها اتشمتت بينه
وسجادك امگيدينه

وطفالك يبو السجاد على الهزل امچتفيها
ــــــــــــــــــــــــــــــــــــــ
ظلينه ثلث ساعات والوادم علينه اصفوف
كلها امعيده ابچتلك يحسين وتدگ بدفوف
وطفالك على الهزل تب$ي وترجف امن الخوف

وبناتك يبو اليمه
عليها الناس ملتمه
هاي اتصيح يا عمه

وذيچ اتعاين اعلى الناس وتدور اليحاميها
ــــــــــــــــــــــــــــــــــــــ
ذل الصابته بالشام مثله ما سده ولا صار
فوگ الهزل بين الناس تتصارخ ازغار اکبار
احنه المصطفى جدنه وابونه الي يحامي الجار

على الهزله يرچبونه
وسبي الكفر يسبونه
خوارج من يسمونه

روحي اتشوع بين امي وود الموت يلفيها
ــــــــــــــــــــــــــــــــــــــ
يعمه الحرم من تنظام تشچي الهظم للوليان
وتخبرها ابمصابيها وهيه اموسده التربان
ما تسمع يماي العين يمك حنت النسوان

ترید اگبور ولیاها
يمها اتزید ابچاها
وتسولف هظم ممشاها

اشحال التـرد مهظومه وتبچي لعد واليها
ــــــــــــــــــــــــــــــــــــــ
شحچيلك بعد يحسين ودري بالشرح يكثر
چبدي امن الهظيمه ذاب يا مظلوم وتفطر
يخويه الـيـوم من الشام لحماك الضعن سدر

انهض يبن حامي الضعن
ليك الفواطم عودن
ومـن الهـظـم يتصارخن
يردن يردن للوطن
ــــــــــــــــــــــــــــــــــــــ
ما تنهض يبو السجاد وتردنه الوطن جدنه
ما نمشي لعد طيبه وليها نطب وحدنه
گـلي اشتعتذر يحسين لليلفى ويناشدنه

ويـن الهـواشـم گـوضت
وألچن ابهل ذله رضت
وأیام هیبتچن مضت
ولحرم تتصارخ لفت

گلى اشتعتذر يحسين من عدها وتحاجيها

الشاعر المرحوم
السيد عبد الحسين الشرع

(365)

#اللهم_عجل_لوليك_الفرج

#تراث

طفله من يتامه الغاضريه
بالشامات وافتها المنيه
شبت راس الحسين .. والزينب سبتها
ــــــــــــــــــــــــــــــــــــــ
طالعت تاريخ عملة كربلا واندهش نوعي
وسهم من گوس الـمصايب صابني وخيط ضلوعي
ومن دما نحور الضحايه غدت تتواگد دموعي

وشفت الضحايه موزعه
والروس منها مگطعه
وشفت الـحسين ومصرعه
إندهش وضعي وزاد روعي

وگلبي ظل يحوم على الأرامل
ونار الخيم تتواگد مشاعل
واحترگت صواوين .. والزينب سبتها
ــــــــــــــــــــــــــــــــــــــ
چني ويا الضعن ساري من تصدى السبي الكوفه
مررونه على المعاره وشفت بيها شلون شوفه
هذا مسحول المفاصل وذاك المگطعه چفوفه

والـجثث عريه مخدره
وحالة ودايع فاطمه
نشفت من جسمي الدمه
وگلبي عالسجاد خوفه

مكسور الگلب والجسم ناحل
من الجامعه وثگل السلاسل
ومگيد المتنين .. والزينب سبتها
ــــــــــــــــــــــــــــــــــــــ
سايرت سبي الحريم وروحي مسبيه لسبيها
حرم مسبيه وغريبه وبالسياط ملوعيها
شدة الكوفه نستها الشام من بين عليها

چاوين سبع الگنطره
ويشوف بالشام إشجره
وعيال عنده ميسره
وبالخرابه منزليها

ومن ضرب العصي صارت علامه
بمتون الأرامل واليتامى
وتشاجف بالإيدين .. والزينب سبتها
ــــــــــــــــــــــــــــــــــــــ
فزت من النوم طفله والگلب مجمور يلهب
تشوط نوبه على اليتامه ونوبه تتعلگ بزينب
تصيح ابويه حسين وينه گلبي لفراگه تعطب

يا عمه شفته بنومتي
وانمرد چبده الحالتي
وانكسر گلبه الغربتي
وبمصيبتنه تصوّب

عمه وصدر ابويه مكسرينه
وليش بدم وريده مغسلينه
والتربان تچفين .. والزينب سبتها
ــــــــــــــــــــــــــــــــــــــ
هيجت نار الگلوب الچامنه بيها عللها
وخلت عيون الفواطم دمعة الغربه تهلها
ورجنت الشام اليساره وبالنحب لمصاب اهلها

صاح ابن هند على الخدم
شمروع گلوب الحرم
صيوان عزتها إنهدم
خل تنوح الدهر خلها

نادوه اليتيمه تريد أبوها
وبالنوج اليساره يساعدوها
وفاضت دمعة العين .. والزينب سبتها
ــــــــــــــــــــــــــــــــــــــ
صاح يا غلمان هذا الراس ودوه للتريده
وخل تجر لمصابه ونه وتنحب الحزة وريده
وخل تشوف الخيزرانه اشسوت بثغره وتچيده

الله الله اشعمل
والراس لعياله انحمل
وخيم على الطفله الأجل
وراحت الطفله شهيده

وغمضت عالطشت عين اليتيمه
وصاحت يالعلي والله شمصيبه
وارتجت الكونين .. والزينب سبتها
ــــــــــــــــــــــــــــــــــــــ
إنحنت مفجوعه زينب على الطفله وگلبتها
مالگت روح بجسمها وعلى القبله مددتها
والمصيبه على المغسل صاحت اللي غسلتها

مسمومه طفلـتكم گضت
نادوها من تيسرت
بالخيزران تلوعت
والسياط الـوسمتها

ومصرع هاليتيمه على اليتامه
مثل مصرع حسين وعمامه
وأثر عالخواتين .. والزينب سبتها

الشاعر المرحوم
كاظم منظور الكربلائي

#اللهم_عجل_لوليك_الفرج

#تراث

مولاتي رقية روحي فداها 😭

فـــزت تــنـادي او صـوتـها ايـبـيد
صــم الـصـخر و ايــذوب الـحـديد

اريـــدن أبـــوي الـضـيـغيم الـحـيد
جــــم دوب يـــا عــمـه الـمـواعـيد

و الــتــمــن اعــلـيـهـا الـمـفـاجـيـد  
كـلـمـا  يـسـمـعونها الـبـجـه ايـزيـد

لــمـن  بـجـاهـن صـــار لـــه ويــد
او وصـلت الـصيحه المجلس يزيد

نـشـدهم اشـصـاير حــادث اجـديـد
اســمـع  بــواجـي ايــزلـزل الـبـيـد

گــالــولــه  خـــدامـــه و الــعــبـيـد
طـفـلـة احـسـيـن الـعـودهـا اتـريـد

گــلــهـم  بــجــاهـا بـــعــد شـيـفـيـد
راووهــــا  راســـه بـلـچن اتـهـيـد

جــابـوه  او شـافـتـهم امـــن ابـعـيد 
صــاحـت هــلـه ابـراسـك يـلـعميد

يــهــلال عــزنــه ابـلـيـلة الـعـمـيد  
لــيــش اقـطـعـت بـيـنـه يـصـنـديد

او عـفتني ويـناس الـموش اجـاويد  
  كــلــسـا  يـضـربـونـي الـمـمـاريـد

شــبـگت  عــلـيـه او دارت الإيـــد 
لاچن  ذلـيـلـه او لاويـــه الـجـيـد

ســاعـه بـگـت و الـنـفـس تــرديـد
صــاح الـعـليل او صـيـحته اتـجيد
مـاتت يـا عـمه اخـتي اعله الوريد


الشاعر المرحوم
السيد عبد الحسين الشرع


#اللهم_عجل_لوليك_الفرج

#تراث

باليسر زينب عالحـرم ظلها
ردّت بالعيال وإبروس أهلها
وإتصيح هاذي كربله چا وين أهلنه
إبحامـي الضعينه من يـدلينه
ــــــــــــــــــــــــــــــــــــــ
فرفرت عالظعن روحي من وصل للغاضريه
ريت ماي العمه إبعيني ولا تشوف الفاطميه
إبكل گلب جمرة أحزان وكل ضلع حدره شجيه

إشحال التروح إميسره
ما نظل بعد إمخدره
وإتظل غريبه إمحيره
وإـّحوفها المنيه

نسمع إبزينب لاچن يهالناس
إمن اليسر ردت تلطم عله الراس
وتصيح جينه إمن اليسر وين الكفلنه
إيحامـي الضعينه من يـدلينه
ــــــــــــــــــــــــــــــــــــــ
هالله هالله إشلون وگفه وگفت إبدار المخيم
صدت إبعين المصيبه وشاهدت خدر المهدم
إو چنها تتصور النار وخيمه عالخيمه إتلايم

صـاحت ومدمعها سجم
إبيـا دار أنزل هالحرم
چا وين حراس الخيم
إو وين البخدري توزم

دار الخيم هاي چانت زهيه
شو مظلمه اليوم يهل الحميه
ما تغمض إعيون الحرم موحش نزلنه
إبحامـي الضعينه من يـدلينه
ــــــــــــــــــــــــــــــــــــــ
إشلون لوجت گلب صارت بين الگبور ومحنّه
هاي إلتنادي يالأكبر يا شباب إلما تهنه
إو ذيچ تصرخ آ يجاسم معرس وبالدم تحنه

إو هاي إلتدور عالطفل
وإتصيح والمدمع يهل
عطشان يبني وتنچتل
والشرب محروم منه

گوس الذي صاب نحرك رماني
وإبناظري طاح سهمه وعماني
ظليت أنوحن وأنتحب وأجذب الونه
إبحامـي الضعينه من يـدلينه
ــــــــــــــــــــــــــــــــــــــ
إحضنت گبر حسين زينب تلثم إترابه وتشمه
خويه خليتك رميه إو جسمك إمغسل إبدمه
إمگطع إبحد المواضي إو حرت بيه إشلون ألمّه

فجـارنه إصواب الحجر
چتفنه بحبال الدهر
إو سهم المثلث بألأثر
مرد لب إحشاك سمه

من عگب عيناك ما نمت ليلي
والكوفه والشام هدمت حيلي
راسك عله راس الرمح يبره الظعَّنه
إبحامـي الضعينه من يـدلينه
ــــــــــــــــــــــــــــــــــــــ
إو چني إبزينب إتنادي يا ربات الخدر گومن
إوياي نمشي للشريعه إو يم گبر عباس حومن
وإحچن الصاير علينه إو لا تعتبن لا تلومن

عباس ما يحمل عتب
من گطع إلچفوف السبب
يسرونه والعز إنسلب
وإبضعيف الصوت حنن

عالشاطي عفناه غصباً علينه
وإنخبره بالصار من عگب عينه
چي ما حضرنه إنـودعه إو نعتذر منه
إبحامـي الضعينه من يـدلينه
ــــــــــــــــــــــــــــــــــــــ
يالطحت من عتب سكنه إو گطعت جسمك إلغيره
إبطيحتك دهري سباني وأجفي ديره وأطب ديره
صابني سهم إلبعينك إو يبس إبگلبي نميره

ألله يصواب العمد
صوبني والعز إنفگد
لا ظل أخو إو لا ظل ولد
إولاعمام إو لا عشيره

من عگب عيناك دهري ولاني
يا خويه ظليت آني وزماني
إو لا ظل حميم إو لا حمه إلبيه إنتچنه
إبحامـي الضعينه من يـدلينه

الشاعر المرحوم
الشيخ كاظم المنظور الكربلائي

(364)
#اللهم_عجل_لوليك_الفرج

#تراث
مولاتي العقيلة تخاطب مولاي الحسين روحي فداهما


لايرضا الگلب ينسه و لا ترضه لعيون اتنام
ولا طيفك يفارگني و لا تنسيني الايام
وحشه تاكل ابروحي و دمع ما ينگطع سجام
وونين أهلك يذوبني ويهزني من الايتام اصياح
ــــــــــــــــــــــــــــــــــــــ
#إنچان اتريدني أنسه و أبطل النوح وونيني
إخذ ذكراك من گلبي و إخذ صورتك من عيني
أيام الچنت وياك أناغيك وتناغيني
اشبيدي عايشه وياي من ذيچ الايام اشباح
ــــــــــــــــــــــــــــــــــــــ
عمر ما فارگيتك بيه تذكر يوم احنه اصغار
من حضن أمنه الزهره الجوانح حيدر الكرار
عيني اتبحر ابوجهك وروحي اوياك ليل انهار
بسماتك بعيني نور و صوتك بالسمع صداح
ــــــــــــــــــــــــــــــــــــــ
يا ثغر الرضعت اوياه الخوه من ثدايا امي
ويا وجهه العله ملگاه يزول و ينجلي همي
ويا جسم الذي برداه ريحة والدي وعمي
و يا عشرة عمر راحت و كل عمري عگبها راح
ــــــــــــــــــــــــــــــــــــــ
يا تالي هلي يحسين ما تنشد بعد عني
يا ضيها الذي بالعين يصبيها وگع مني
لا غير لهدوم السود و لا يضحك بعد سني
إنچان إنته رحت يحسين حزنك بالگلب ماراح
ــــــــــــــــــــــــــــــــــــــ
جنت من أبچي ما تقبل تنشف اعيوني من اتسيل
وعن الحر تظلل لي و صوب الشمس ليه اتميل
گلي اشلون ياخويه أشوفك عالرمال أجتيل
ولا أگدر أظلل لك وجسمك بس سمر وارماح

الشاعر المرحوم
الدكتور الشيخ أحمد الوائلي

#اللهم_عجل_لوليك_الفرج

#تراث

يزوار إنحبوا وإبچوا عليه
بنت حسين أنه واسمي رقيه
ــــــــــــــــــــــــــــــــــــــ
يزوار إنحبوا وإبچوا إلحالي
وذكروا عزتي واخدري ودلالي
أنه بنت النبي من بيت عالي
جدي المصطفى خير البريه
ــــــــــــــــــــــــــــــــــــــ
جدي المصطفى سيد الكونين
اوجدي المرتضى والد السبطين
والعم  الحسن والوالد حسين اوجدتي فاطمة زهره الزچيه
ــــــــــــــــــــــــــــــــــــــ
احنه إلي نشأنه وتربينه
ابمدينة جدنه الهادي نبينه
وين الشام وين ارض المدينه
 عدونه ماعرف حرمت نبينه
ــــــــــــــــــــــــــــــــــــــ
عدانه عن حرم جدنه إبعدونه
وعن تربت وطنه شردونه
ذبحو كل هلي وإحنه سبونه
هظم مر أعله عماتي وعليه
ــــــــــــــــــــــــــــــــــــــ
يوم الغاب أبويه حسين عني
والله كل بچه والنوح فني
منه اتيتمت من زغر سني
 يسموني العده ياخارجيه
ــــــــــــــــــــــــــــــــــــــ
وحين النزلونه بالخرايب
شفت طيف الإبو لن عني غايب
وجابوا رأسه ابطشت النوايب
اويه رأسه جابولي المنيه

الشاعر المرحوم
الخطيب الشيخ هادي الكربلائي

(363)
#اللهم_عجل_لوليك_الفرج

#تراث

(عگيلي)

نامت عينك سهرت عيني
ــــــــــــــــــــــــــــــــــــــ
عباس اتناديك ابحسره
زينب زينب هاي الكبره
هاي أم الأخوه المنتظره
واحد منكم حتىٰ اتخبره

اتناديك اگعدلي اوحاجيني *** نامت عينك سهرت عيني
ــــــــــــــــــــــــــــــــــــــ
جفنك نام أبسهم الرامي
اوجفني سهران بألامي
حرگو ياعباس اخيامي
اوإنشدني أشصار بأيامي

أخلافك ياخويه أميسريني *** نامت عينك سهرت عيني
ــــــــــــــــــــــــــــــــــــــــ
حگك ما تدري اولو تدري
ما جان اعليه الهم يجري
لا ذيج الهيبه اولا خدري
اتبدل خويه اخلافك دهري

كل يوم امصاب ايراويني ***نامت عينك سهرت عيني
ــــــــــــــــــــــــــــــــــــــ
أنه الجنت أبهيبة حيدر
وابهيبتكم خدري امسور
أتغير ذاك الحال أتغير
من جان أمفكر أتيسر

اوجتالك عگبك يوليني *** نامت عينك سهرت عيني
ــــــــــــــــــــــــــــــــــــــ
أنه التدري الوادم بيه
ما شبحت كل عين اعليه
لني مسلوبه اومسبيه
اوعين الشامت تنظر ليه

خويه ابديوان أمخليني *** نامت عينك سهرت عيني
ــــــــــــــــــــــــــــــــــــــ
يعرض راس حسين أگبالي
اومتشمت ياخويه ابحالي
حرمه أكباله اوراح الوالي
أه امن الدنيه شهالتالي

ضليت أذكر ذيج أسنيني *** نامت عينك سهرت عيني
ــــــــــــــــــــــــــــــــــــــ
أتعود أسنيني أبذيچ أسنينك
هيهات أتعود انته وينك
الدمعه ابعيني السهم ابعينك
هيهات اتردلك چفينك

واتعود اردود اتباريني *** نامت عينك سهرت عيني
ــــــــــــــــــــــــــــــــــــــ
اچفوف الرفعت راية هاشم
اوبيها الجود اوذاك الصارم
راحت تالي اتشوف الوادم
أتعذب بچفوف الظالم

ماشاف اچفوف اتحاميني *** نامت عينك سهرت عيني

الشاعر المرحوم
الشيخ عبد الحسين ابو شبع

(362)
#اللهم_عجل_لوليك_الفرج

#تراث #نعي

لعند الشام من لاحت علايم
حنت زينب او باجي الفواطم
شافن من بُعد لمة الوادم
او عليها الحزن بغيومه تلملم

ونت زينب و گامت تنادي
علیک اقسم ابجدنه النبي الهادي
عنه الروس طلعها يحادي
او على اضعون الحرم خلها اتجدم

يحادي هاليساره اعطف عليها
او لا تمشي بطريج العام بيها
ترانه الشام بس ما نصل ليها
علينه الناس من كل كتر تلتم

يحادي عاين الهاي الروايه
لفت و تريد تتلگه السبايه
علينه اهون وحگ الله المنايه
او من عدها الشماته اصعب او اعظم

يحادي عاين الحال اليساره
بیش امن الخلگ هاي انتواره
خاف اعلى الضعينه اتصير داره
وارامل عالمهازل تصرخ او يتم


طب للشام ظعن اليسر مصباح
والمبشر لعند ايزيدها راح
صعد فوگ الگصر مطرب او مرتاح
او من شاف الضعن كام ايتبسم

صارت عالضعينه الوادم أصفوف
امحنيه أچفوفها وادگ بلدفوف
او زین اعبادها بالحبل مچتوف
تهل عينه أو يتمنه المحتم

يشوف أهل الشماته اتشوف العيال
وهيه اعلى الهزل مجتوفه بلحبال
گصد يمه سهل و الدمع همال
حب ایده او على السجاد سلم

تفكر له السهل والحيل بايد
يصح عندک یگله ثوب زايد
الحديد الرگبتي يا سهل چايد
جرحها او گام منها ينضح الدم

من طوگ الحديد ايسيل دمي
و عاين للحرم و يزود همي
عسن يا ريت لا ولدتني أمي
او يراني ايزيد بالذله الموسم

عگب ما سكن هضل الناس والويد
او گضت بيهم الوادم فرحة العيد
خذوا كل اليساره المجلس ايزيد
وهو اعلى التخت وبها النصر مغرم

ابراسه التاج و بها النصر فرحان
ويمه جاعد أعلى التخت مروان
لمن عاين الذلة النسوان
گام النغل بأسلافه ايترنم

صاح الرأس وينه أو حين شافه
هتف بالثار و تذکر اسلافه
شال العود و يجلب شفافه
أو يضرب گام من عنده المبسم

الشاعر المرحوم
السيد عبد الحسين الشرع


#اللهم_عجل_لوليك_الفرج

#أبوذية

الكلب شاجر على ابن امي وداوي
تضعضع ونـهــدم حيـلـي وداوي
لا مجــروح حته اگـعـد وداوي
ولا غايب واگـول اتعـود اليه

للمرحوم
عبد الامير الفتلاوي

#اللهم_عجل_لوليك_الفرج

#تراث #نعي

لمولاي زين العابدين روحي فداه

حزني يبو حمزه تری مو لجل الفراگ
كُلٍ من العالم لعد کـاس الفنا ضـاگ
صاير اببالي اوگوف عماتي بالاسواگ
حسرى وتالى طببوها للدوواين

مو چلمه هاي وتنسي وعن خاطري اتروح
او هيه الذي خلت ابگلبي اهموم واجروح
سبي النسه وشوفة ابوي احسين مطروح
فوگ الثرى وابلا دفن ما تنسه اسنين

تدري يبو حمزة امن اجينه البلدة الشام
مر بینه یوم اگشر و شد من كل الايام
اگبال وجهي راس ابوي وروس الاعمام
وروس اخوتي ابصف اليتامه ايسار ويمين


محمد سعيد المنصوري

#اللهم_عجل_لوليك_الفرج

#تراث

لسيدي ومولاي الإمام
زين العابدين صلوات الله عليه

گلبي يَـبو حمزه تراهُو اتـفتّت اوذاب
مثل المصيبه اللّي دهتني محد انصاب

ذيج لَقمار اللّي ابمنازلنا يزهون
و الليل كلّه امْن لعباده ما يفترون
سبعه وعشره فارگتهم كلهم اغصون
ابفرد ساعه وسّدوهم حر التراب

لوشفت جسم اللّي على المسناة مطروح   
وذاك  الشّباب اللّي صباح العرس مذبوح
لو شـفت لَكبر ما لمتني ابكثرة النوح
ما خلت النا كربلا شـيخٍ ولا شاب

ابعيني نظرت حسين بيده الطّفل منحور
وامّه الرّباب اتعاينه وادمومه اتفور
وگلوبنا فتها ابونينه وعينه ادور
وكلما طلع منّا بدر بالمعركه غاب

ومصيبة اللي هيّجت حزني عليه
عاينت صدر حسين تحت الأعوجيه
وحرگو خيمنا وركبوا زينب مَطيه 
شَحْجي يَبوحمزه وشعدد من مصايب

گلّه يَشبل المصطفى ورب السياده
صار الچتل ليكم يهَل هالبيت عاده
وانتو كرامتكم من الله الشهاده
امعوّد على كثر المصايب يبن لنجاب

گلّه يبو حمزه حشاي ابنار ملهوب
لا زاد يهنا لي ولا اتهنّي ابمشروب
تشهير عمّاتي يَبو حمزه بلدروب 
نحّل ترى عظامي ولذيذ العيش ماطاب

ما نكّست راسي لَجِل ذبح الصّناديد 
ما قصّروا بالغاضريّه زلزلوا البيد
نكّس الراسي ادخول زينب مجلس ايزيد
حسره ومن نوح اليتامى راسها شاب

الشاعر المرحوم ملا عطية الجمري

(361)

#اللهم_عجل_لوليك_الفرج

#تراث

روحي اعله اخوتي زايد ولمها
مشيت ولا حصل بيـدي ولمها
بگيـت ارعــه ابيتاماهـا ولمها
وشاجف لليضربوها بديه


هاشم من وگع بالطف علمها
ابحال الحرم ما واحد علمها
چم طفله الغدت تصرخ علمها
وامها اتجول بأرض الغاضريه

الشاعر المرحوم
السيد عبد الحسين الشرع

#اللهم_عجل_لوليك_الفرج

#تراث

کل الآه والويلاه للسجاد والگيـده
فوگ الحدّه البرجليه فوگ الغلـّة البيده
ــــــــــــــــــــــــــــــــــــــ
فوگ الغلة البيده فوگ الگيد البساگـه
فوگ الهظم فوگ الذل والمر الذي ضــاگـه
راسه امچشف او معلول واميسر عله النــاگــه
طـوگ الجامعه ماذيه ذاك الطـوگ المچيده
ــــــــــــــــــــــــــــــــــــــ
اوغير الطوگ المچيده شنهو الحنّت اظلوعه
يوم اتوجهو للشام صارت للحرم لوعه
الميت بالگبر دارس يفز من نومته اويوعه
طوح بيهم الحادي امن الكوفه اوگطع بـيـده
ــــــــــــــــــــــــــــــــــــــ
ظعن بيد الغرب غرب اوكل حي اومصر داسه
اوطفل الصـاح يا بويه چعب الرمح صك راسه
وأُم الفاجده مولود هاي اشلون تتناسه
سکته تهل مدمعها اوعن أصواتها امهيده
ــــــــــــــــــــــــــــــــــــــ
تهيد اللي تره راسه اوظل ابكربله جسمه
من مرت عليه شافت امغير حالته اورسمه
أم الولد راحتها تعـلـي أصـواتـهـا بســمه
يبني اهناه تتردد ابعالي الصوت وتعيده

الشاعر المرحوم
الشيخ عبد الأمير الفتلاوي

(360)

#اللهم_عجل_لوليك_الفرج

#تراث

جابر مادريت شصار بالطف ونواحيه
وماتدري بخدر زينب راح ومشت مسبيه
ــــــــــــــــــــــــــــــــــــــ
يجابر من دهتنه الخيل ريتك حاضر بهدار
تعين  مودعت حيدر مابين النهب والنار
من خيمه لعد خيمه تلم بيتامها وتندار

ونوب اللي ترد ردود
عَليه ولعد حالي تعود
وانا ابحجر الأجل ممدود

اعالج ونزع ابروحي البشدات مبليه
ــــــــــــــــــــــــــــــــــــــ
يجابر كربله هاذي بصوت الحزن ناديها
وانشدها وتسولفلك علينه وشنذبح بيها
وخوفي اعليك لاتنصاب من تسمع محاجيها

لاجن كوون تتورع
لاتفزع ولا تجزع
كلبك خاف يتگطع

مثل الدهر من گطعت علي الاكبر مواضيه
ــــــــــــــــــــــــــــــــــــــ
يجابر لاتنشادها تصيبك كربلا بسهام
وتطفي شمعة وجودك مثل شمعة عرس جسام
وخوفي يندهش حالك وتصرخ صرخت الايتام

من جارة عليها الگوم
 مثل زينب تظل تحوم
نوبـه اتعثر نوبه تگوم

وتتحير بهالوادي وتنصاب بمراميه
ــــــــــــــــــــــــــــــــــــــ
يجابر حن على حالي وناشد كربلا وياي
شلها  ويه الطفل عتبه وماتسجيه شربة ماي
جمرة عطش عبدالله تشب وتنطفي بحشاي

خوفي بالنحر تنصاب
مثل نحر الرضيع صواب
گبل حرمله وهالنِشـاب

يجابر شفت نشابه بدم الطفل مطليه
ــــــــــــــــــــــــــــــــــــــ
يجابر ورد اسـولف لك وخايف يندهش نوعك
وسهم  العلگمي يرميك ودم تتغير ادموعك
والخيط اضلوع حـسين خوفي يخيط ضلوعك

بس بنوح ساعدني 
يجابر لاتناشدني
اعلى بويه حسين تضهدني

اجانـه المهر ومخضب ابدم جروح راعيه
ــــــــــــــــــــــــــــــــــــــ
يجابر والدرب كله عالناگه جنت طروح
ثگل الگيد ضاهدني وماردني ثجيل النوح
تغيب  الروح من جسمي والجسمي ترد الروح

يجابر سلمت امري 
 لله ومدرع بصبري
ومن نوحي انكسر ظهري

يجابر لو ردت آثار شوف اضلوعي محنيه
ــــــــــــــــــــــــــــــــــــــ
يجابر بعد جور الشام وسهامه تفكس العين
خايف  تنرمي بيها وتصبر ما الك تمكين
تشاهد زينب بديوان واحنه امگيدين

ولامسلم اليدخل له
 ولاواحد من المله
يصد ليزيد ويكله

اشـفاف الجان يلثمهـا محمد ليش مدميه

الشاعر المرحوم
كاظم منضور الكربلائي

#اللهم_عجل_لوليك_الفرج