....تابع.....

( راح بدون نقاش على الحوض.. وأنا عاوزة أمسك نفسي أعجنها وأأدبها.. إيه إللي أنا عملته تاني ولسة بعمله ده؟؟
فجأة تذكرت ذكر الله.. قعدت أستغفر.. وأحوقل.. ولا إله إلا أنت سبحانك إني كنت من الظالمين وأعوذ بالله من الشيطان الرجيم..)

👈 وهو راجع من عند الحوض لأوضته.. ندهت عليه بهدوء بعد ما القلب اطمأن بذكر الله ونار الغضب اتطفت بحول الله وقوته:
-بلال.. تعالى.. اقعد هنا جنبي.. أنا آسفة.. أنا غلطت.. إنت صح وأنا غلط..
(بدأ يعيط من التأثر)

-معلش.. ما تزعلش نفسك.. حقك عليا.. هات راسك أبوسها.. إنت صح وأنا غلط.. أنا شيطاني غلبني.. وكلنا بنغلَط.. بس مش صح نكمل في الغلط.. بس أنا عاوزة أقولك إن السبب كان إنك بتجنني كل ليلة، من كتر ما إنت بقيت كل ما تدخل السرير تخرج بأي حِجة، فمجرد ما شوفتك بدأ الغضب والغيظ يركبني.. وأنا أصلا -زي ما إنت عارف- نومي صعب حاليا، وكمان لما بَتخض وأتفزع في نومي بيبقى أصعب وممكن أفضل صاحية وقت أطول بسبب الشد العصبي، ولما حد بيخطف حد من بدايات نومه بيفقد أعصابه شوية وبيكون غير متزن، عشان كده من السُّنة الحكيمة بردو إن ما نصحيش حد من نومه ونقلقه.. بس أنا ما قدِرتش الصراحة أنيمك مظلوم وأنام وأنا ظالماك وأنا خلاص روحي هتبقى بين يدي الله وأنا نايمة، إزاي ممكن أستنى للصبح وممكن الصبح ما يطلعش عليا وأقابل ربنا بذنب زي ده.. إزاي؟
(بيعيط لسة من التأثر وأنا بطبطب عليه..)

-خلاص ما تزعلش نفسك.. سامحني.. إنت صح إنك بتحب السُّنة وبتطبقها وبتحرص عليها وبتطبق إللي بتتعلمه حاليافي المنظومات.. إوعَي توقف، حتى لو انت افتكرت ده تاني بعد ما تخش سريرك قوم عادي، ده #حقك عند ربنا.. بس بالله عليك: قوم بهدوء من غير ما تزعج حد واجتهد قبل النوم إنك تخلص كل ده عشان ما تِقلقش نوم حد.. وأنا ربنا يعفو عني هجتهد ما أعملش كده تاني ونجتهد نغضَب لله فقط زي ما اتعلمنا، وما نغضبش لأنفسنا ولما نضعف نستعين بالله ونصحح.. بس إنت كمان هتجتهد تبطل تتلاعب في الأمر ده عشان الأخلاق النبوية بردو إنك ترحم أهل بيتك.. روح يالا اغسل وشك ونام..
------

🚂🚂🚂 #الشاهد:
◀️إللي فاكر إن حياتنا مثالية ومافيهاش أخطاء مُخجِلة كأمهات عشان بنربي تربية إسلامية = محتاج يفهم إن كلنا بشر، وكلنا أكيد بيصدر مننا انحرافات في التطبيق تغلبنا فيها أنفسنا أو جهلنا أحيانا وبنغضب لأنفسنا..

◀️لكن إللي هيميزك عن أي أم بتغلط، هو إنصافك لرعيتك من نفسك، وإقامة العدل حتى لو على حسابك إنتي شخصيا {يا أيها الذين آمنوا كونوا قوامين بالقسط شهداء لله ولو على أنفسكم أو الوالدين والأقربين}.. {يا أيها الذين آمنوا كونوا قوامين لله شهداء بالقسط ولا يجرمنكم شنآن قوم على ألا تعدلوا.. اعدلوا هو أقرب للتقوى}... زي ما قلنا كتير في #لقطات_تربوية زي "ليس لك من الأمر شيء"/ وزي "أكتر صفتين تملكي بيهم قلب ولادك: العدل والصدق"/ و زي "هما مش ملايكة.. ولا إحنا".. وغيرها..

◀️ ده غيض من فيض الأخطاء البشرية الطبيعية إللي كلنا بنقع فيها كأمهات..
◀️ أهم حاجة يكون الغالب عندك هو الاستقامة على المبدأ ما استطعتِ، مش الأصل عندك هو الزلل فيه.. ويكون الغالب هو غضبك لله مش لنفسك..
◀️ وتكوني قدوة في الرجوع للحق والإنصاف والصدق وعدم التناقض..
◀️ وتجاهدي نفسك دايما تنجحي في امتحان {إنما أموالكم وأولادكم فتنة.. والله عنده أجر عظيم}.

✅ انصفيهم من نفسك قبل ما تنتصفي منهم لنفسك..
✅ غالبي هواكي وغلّبي مراد الله ومرضاته على أي شيء ما استطعتِ..
✅ ومن يتقِ الله يجعل له مخرجا ويرزقه من حيث لا يحتسب..
✅ إن الله يحب التوابين.. إنه كان للأوابين غفورا..
✅ وأما من خاف مقام ربه ونهى النفس عن الهوى فإن الجنة هي المأوى...
✅ إلا مَن ظَلم ثم بَدّل حُسْنًا بعد سوءٍ فإني غفور رحيم..

...اصبري وسددي وقاربي وأبشري...

#تحديث:
منشور التفاصيل والاشتراك في دورة المتون والمنظومات :
https://m.facebook.com/story.php?story_fbid=2773708589562110&id=100007689874839&fs=0&focus_composer=0

#حكايات_الأخلاق
#حكايات_العبادات
#حكايات_السنة
#حكايات_القدوة
#أسماءمحمدلبيب
أمةالله-عفا الله عنها وعنكم

المقالة رقم 275


16- #حكاياتي_مع_مشاريع_حياتي
#حكاياتي_مع_مشاريع_حياتي
#تعديل_السلوك_بمنظومات_الأطفال
#تعديل_السلوك_بالسنة_النبوية
#تعديل_السلوك_بالقدوة

كل البيت نام خلاص أخيرا الحمد لله.. فاضل سلمان (13 سنة) فقط بيعمل حاجة وهينام.. طفيت النور ماعدا الوناسة.. غمضت عيني.... بدأت أزحف على السِّنة (بدايات النوم) وأوشكت على دخول عالم الأحلام والنوم العميق.. فجأة سمعت سلمان- بيقول بصوت شبه الفحيح الهامس: "إيه! عاوز إيه؟!".. فتحت عيني مخضوضة: لقيت بلال -7 سنين- واقف في الضلمة قدامنا.. اتخضيت..!
-فيه إيه تاني يا بلال؟؟ إيه إللي قومك تاني؟؟
-على اليمينِ طاهرًا نَم باكرًا || وكن لأذكار المنامِ ذاكرًا..
نسيت أتوضا يا ماما :/

(ده بيت من منظومة أحسن الأخلاق للشيخ عامر بهجت، منظومة كده جميلة جدا زي تحفة الأطفال، وبلال بفضل الله مشترك في دورة لحفظها ودراستها، فالبيت الشعري ده من ساعة ما هو حفظه وهو داخل دماغه أوي دونًا عن بقية الأبيات الخاصة بالآداب والأخلاق! وقبل النوم بيجتهد إنه يطبقه، حماسة البدايات المعروفة للجميع.. فواضح إنه النهاردة نِسي.. فقام من سريره.. ولما لقاني بدأت أغضب قال البيت الشعري ده عشان يهدّيني ويذكّرني بفرحتي بيه وبالنية الجميلة في اتباع الآداب النبوية وكده.. أنا طبعًا كأم مسلمة طبيعية المفروض أفرح بده -وفعلا بفرح بيه وبظهر له فخري ده عادةً لما يفتكر ده قبل ما يخش سريره... بس لإن نومي صعب جدا أصلا في الفترة الحالية (اضطرابات نوم) ولإن بلال كمان -(كعادة كتير من الأطفال في السن ده من مشاغبات إن ما كانش كل الأطفال)- كل ليلة لازم يعمل حركات زي دي وبعد ما يدخل سريره كل مرة لازم يخرج كذا مرة بحجة معينة مصطنعة كل مرة تقطع حبل أفكاري لو بشتغل أو تصحيني لو نايمة أو تضايق اخواته معاه في الأوضة...إلخ (أكيد كلكم مريتوا بده في المرحلة دي تقريبا)، فحطيت قواعد إن قبل ما تنام يا بلال تخلص كل شيء (تشرب بؤ المية/ تلبس شرابك إللي عاوزه/ تتمم على لعبك إللي هتحشك ...إلخ) وبمجرد ما تخش السرير مافيش طلبات ولا خروج إلا للضرورات: تدخل الحمام/ مناخيرك بتنزف/ مناخيرك مضايقاك وعاوز تنضفها/...إلخ) وإلا هيبقى فيه عقاب تاني يوم.. وطبعا كان بيتلاعب بحقوق الضرورات دي بردو ساعات وتعب أعصاب معتاد، وكنت بظبط العملية وأكظم غيظي وأتغافل أد ما أقدر.. فلما عمل كده النهاردة، وللأسف بسبب التراكمات دي = شيطاني غلبني.

== بس كنت في صراع مرير:
1-هل أمنعه من تطبيق الأدب النبوي ده النهاردة، وإللي بدأ يحبه ويتعلق بيه، وأكسر المرادي افتخاري بيه في النقطة دي وفي اعتزازه بالمنظومات الشرعية دي، عشان أعلمه الأدب في مسألة التلاعب بالخروج من السرير إللي بتزعجنا جدا كل شوية
2-والا أخليه يطبّق الأدب النبوي ده وأنفجر أنا داخليا من كظم الغيظ على كره، ويبقى انتصر هو عليا وكسر كلامي؟ ثم إن هوايا ميّال جدا إني أنيمه زعلان الصراحة (بعقاب) مع إني ضد ده جدا وبتجنبه قبل النوم، لكن كنت عاوزة أتأكد إنه اتأثر فعلا بشكل فعال وحاسم! (كل ده حديث نفس، وكلنا جوانا نفس أمارة ونفس لوامة).

👈 طبعا بدون تفكير وبحول الله وقوته: حسمت الصراع لصالح الدين لإني ما أقدرش أتحمل في صحيفتي انتصارًا لهوايا على حساب الدين في قلب ابني، ما أقدرش أتحمل إني أمنعه من أمر زي ده (سنة نبوية) مهما كان السبب أو التلاعُب بتاعه ومراوغات الأطفال المعروفة، بس طبعا إحنا بشر مش ملايكة.. والهوى غلاب.. فما قدرتش في نفس الوقت أعدّي الموقف من غير ما أنفّس عن غيظي بالمرة ولو حاجة بسيطة و أضايقه زي ما ضايقنا وغلبنا.

👈 فزعقت للأسف وهددته:
-أنا حقيقي مش لاقية كلام أقوله.. انت بجد بتهرج..!
اتفضل... بس آخر مرة تعملها! .. قلت لك قبل كده إن قبل النوم تكون مخلص كل حاجة..
ومجرد ما تدخل السرير إياك تخرج! ومفيش فايدة لحد دلوقتي.
اتفضل على الحوض اتوضا ونام!
(ومن جوايا ببكت في نفسي.. إيه إللي أنا بعمله ده!! ده بدل ما أسقف له وأشجعه!؟!
صراع رهيب بتمر بيه الأمهات كتير أنا متأكدة..!).

👈 وفي وسط غيظي من نفسي ولسة هو رايح على الحوض، أخوه سلمان بدأ يبان غيظه هو كمان بسبب إني سمحتله يتوضا بدل ما أعلمه الأدب وأمنعه لإن هو معتقد تماما إن اخوه بيتلاعب بحقوقه كعادته اليومية عشان يخرج من السرير (لإنه أكيد كان طفل زيه في المرحلة دي وبيعمل غالبا نفس المراوغات)، فهو شايف إني كده سمحت له يمَشِّي كلامه عليا -مش أكتر- ويخدعني.. فقال لبلال بغيظ:
-بالمناسبة يا بلال بردو! رضا الله في رضا الوالد على فكرة!

👈لقيت بلال وقف فكر.. ثم لف ورجع رايح على الأوضة وهو مكسور كده ومستسلم..
قلت له:
-إيه! رايح فين يا بلال؟!
-خلاص يا ماما.. مش مهم.. هنام خلاص😖.
-لا والله أبدا لا يمكن خلاص.. إنسَى طبعا.. بعد إيه! .. أنا قلت اتفضل اتوضا خلاص والموضوع خلص، يبقى اتفضل وخلاص.

.....يتبع....

المقالة رقم 274

15- #حكاياتي_مع_مشاريع_حياتي
#تعديل_السلوك_بالأحاديث_النبوية
#حكايات_الأخلاق
#حكايات_الأحاديث

➖ ماما بصي كده.. تعرفي تخمني مين بيمشي كده وبيتكلم كده؟ (ووقف يقلد مشية وطريقة كلام معينة).

➖ إنت كده بتقلد فلان؟

➖ بالظبط.. هههه... حتى إنتي خدتي بالك. بيمشي كده ويتكلم كده بالظبط.. صح؟

➖ آيوة بس ده غلط إللي إنت عملته ده والنبي ﷺ بيكره كده..

➖ ليه؟ أنا بحكي بس إللي بيعمله.. مش قصدي حاجة يعني وآآ ا ا ..

➖ لأ.. إنت قلّدته في طريقته.. وكمان ضحكت بعدها.. ده كده حاجتين غلط مش حاجة واحدة..

➖ مش قصدي أضحك عليه أو أتريق والله.. أنا بقلده بس..

➖ النبي ﷺ نهى عن تقليد الناس ومحاكاة حركاتهم ابتداءً بالطريقة دي.
والذنب بيكون أشد لو الأمر على سبيل الضحك أو إضحاك الناس لإن كده بيبقى كمان سخرية وغيبة..
تقول أمنا عائشة إنها في مرة قلدت طريقة إنسان معين قدام النبي ﷺ، فنهاها عن ده وقال: "ما أُحِبُّ أني حَكيْتُ إنسانًا –يعني حاكيت وقلدتُ إنسان معين- وأن لي كذا وكذا" –يعني حتى لو هاخد على ده فلوس كتير.. عشان يبين ﷺ شدة كراهته للفعل ده، والكراهة بتكون أشد لو التقليد فيه سخرية وانتقاص من الشخص..

➖ طب يا ماما مش النبي ﷺ في مرة كان فيه حد من الصحابة خبَّط على باب بيته، فالنبي ﷺ سأل: مين على الباب؟ فالرجل قال: أنا.. فالنبي ﷺ قال من ورا الباب في استياء: أنا! أنا!.. مش ده كده تقليد للرجل؟

➖ لأ طبعا.. النبي ﷺ هنا بيستنكر الكلمة نفسها فقط ومش بيقلد حد، وكمان قالها وهو خارج لسيدنا جابر -الرجل إللي كان بيخبط على الباب- يعني قالها قدامه وهو خارج مش كإنه بيتهكم عليه من وراه..
يقول سيدنا جابر بن عبد الله: "استأذنتُ على النبي ﷺ.
فقال: مَن هذا؟ فقلتُ: أَنَا..
فخرج النبي ﷺ وهو يقول: أَنَا.. أَنَا... كأنه كَرِهها..*1
يعني تكرارها ده "أنا! أنا!" ده عشان يبين استنكاره لها ﷺ وكراهته للكلمة ومدى إبهامها وبُعدَها عن توضيح هوية مَن بالباب..
مش محاكاة وتقليد لسيدنا جابر في حد ذاته في أسلوب ولا في حركات ولا في مشية ولا كده.. مجرد ترديد للكلمة في سياقها فقط لبيان نكارتها والتنبيه على الخطأ..

1*بالجمع بين روايات الحديث في الصحيحين، والشرح في التعليقات.
https://www.facebook.com/permalink.php?story_fbid=2711353832464253&id=100007689874839

#أسماءمحمدلبيب
أمةالله-عفا الله عنها

المقالة رقم 273

14- #حكاياتي_مع_مشاريع_حياتي
#تعديل_السلوك_بالقرآن_حفظا_وفهما
#حكايات_القرآن
#حكايات_الأخلاق

(ابني بلال..٧ سنين)

-ماما.. فيه أولاد قابلتهم النهاردة في المراجيح بيقولولي ((إنت بتتلفّت في الصلاة😑)) قلت لهم ((والله مش بتلفّت😳)).. قالوا ((والله إنك بتتلفّت😑)).

-طب هما ليه قالوا كده؟

-مش عارف! مع إنهم ما شافونيش أصلا في الصلاة.. إحنا مش بنصلي هناك، إحنا بنروح المراجيح بالليل خالص بعد ما بنكون صلينا جنب البيت أصلا.

-طب ليه عملوا كده!؟.. مع إني بشوفك فعلا لما بتصلي في البيت مابقيتش بتتلفت زي زمان لما كنت لسة صغير.. ربنا يثبتك ويهديهم.. عارف تقول لهم إيه المرة الجاية لو شوفتهم تاني أو لو حد غيرهم عمل معاك كده، بيكذّبك وانت صادق وهو ما شافكش أصلا..؟

-آه أقول لهم إيه؟

-قول لهم: بيني وبينكم يوم القيامة عند ربنا.. إنتوا حلفتوا.. وأنا حلفت.. والملائكة كتبت.. وربنا سمع.. هنشوف يوم القيامة مين إللي حلف بالله كذب ومين إللي صدق.. وهاخد حقي هناك إن شاء الله..

-ماشي👍

-كمان اسألهم سؤال بالعقل كده: [[انتوا شوفتوني وأنا بصلّي🙄؟؟ تحلفوا ليه على حاجة ماشوفتوهاش وبقول لكم إنها ما حصلتش 🙄؟]]..

-آه.. عملوا زي إللي ربنا قال عنهم {ويحلفون على الكذب وهم يعلمون}..😑
-فعلا ماشاء الله عليك.. شطور..

===

❓قعدت أعصر دماغي جابها منين دي كده سبحان الله؟ أكيد سمعها من القرآن اللي بنشغله مثلا في البيت وعجبته فلزقت في دماغه؟ والا يكون شافها في الكرتون الجديد؟..

ثم عرفت جابها منين:
== من سورة #المجادلة.. إللي بفضل الله هو وأي طفل زيه في سنه -غالبا- وصل لها وبيحفظ فيها وبيراجعها ضمن الأجزاء التلاتة الأخيرة من القرآن.
وسألته وقال أيوة عرفها منها.

العجيب إني عمري ما شرحت له معناها..
لكنه #القرآن_العربي_المبين يا سادة..
إللي بيخترق القلوب مباشرة بوضوح ألفاظه وسهولة معانيه وقربها من واقع حياتنا على مر العصور، و #بيؤسس في النفوس #تلقائيا #القيم #والعقائد #والأخلاق #والخير #والشر، بأقل وأبسط فَهم عندنا للعربية، على بلاغته وفصاحته سبحان الله!..

====

🎯🎯 عرفتوا ليه بنقول حفّظوهم القرآن من سن ٣ سنين حتى لو مش فاهمين منه لسة حاجة؟ لإن كثرة تكرار ألفاظ "القرآن العربي المبين" على قلوبهم بيسرّع في تكوين شبكة مفردات اللغة في عقلهم وبيعجّل بفهمهم للمعاني تلقائيا مع الوقت وبالتكرار والممارسة الحياتية العملية وحواراتنا العامة معاهم..

🎯🎯 عرفتوا ليه كتبت مقال ((#الفول_المدشوش)) إللي قلنا فيه نحفّظ ولادنا القرآن من أول ما يبدأوا ينطقوا؟

🎯🎯 عرفتوا ليه بنأكد على الجملة #العبقرية إللي بتقول ((علم ابنك القرآن = والقرآن سيعلمه كل شيئ))؟

حفظوا ولادكم القرآن واثبتوا على مشروع العمر وعلى القبض فيه على الجمر..
"تاج الكرامة" يستحق..
و "اقرأ وارقَ" تستحق..
وصحبة "الكرام البررة" تستحق..

📢📢 ياريت تكتبوا في التعليقات عن تجاربكم مع ولادكم في ده وتشجعوا الأمهات على المشوار .. واقروا التعليقات مليانة قصص زي دي جميلة:👇👇

https://www.facebook.com/asma.mhmd.lbyb/posts/pfbid02vDzoAiLCf6Pj1pjZ7zXT8fWjyWht2N3FTikK2MvCBbDGkYjXajUSR7KhXUC1cLqml

✍️✍️ مقال الفول المدشوش:
https://t.me/rabayany_altarbeya_belwahyayn/467

#تعديل_السلوك_بالقرآن
#أسماءمحمدلبيب
أمةالله-عفا الله عنها

المقالة رقم 272

13- #حكاياتي_مع_مشاريع_حياتي
#حكايات_الأحاديث_النبوية
#حكايات_الأذكار
#حكايات_القرآن
#غرس_السلوك_بأدوات_التعليم_النبوي
#حكاية "13"

-يا ولاد... اجمعوا هنا..
-خير يا ماما؟
-هقرأ عليكم ثلث القرآن زي ما النبي ﷺ عمل مع الصحابة في قعدة واحدة..
-👀.. هتقري تلته بجد؟
-آه بجد.. ثلثه..
-قصدك قل هو الله أحد يعني؟
-شاطرين..
-هي فعلا ثلث القرآن بجد يا ماما؟!
-أيوة.. النبي ﷺ في مرة قال للصحابة: احشُدوا.. اجمعوا الناس هنا هقرأ عليكم ثلث القرآن.. فالصحابة حشدوا عدد وجم، والنبي ﷺ خرج من حجرته وقرأ عليهم قل هو الله أحد، ثم دخل حجرته تاني.. فالصحابة فضلوا منتظرينه يطلع تاني ﷺ لإنهم مستنيين بقى لسة إنه يكمل كمية أد ٢٠٠ صفحة مثلا من حجم مصحفنا في زماننا..! فلما سابهم قالوا لنفسهم: أكيد الوحي جاء للنبي بأمور طارئة وشوية هيرجع يكمل ثلث القرآن زي ما قال لنا☝️..

النبي ﷺ خرج لهم ولما لقاهم لسة قاعدين عرف على طول هما بيفكروا في إيه فقال لهم: أنا قلت لكم إني هقرأ عليكم ثلث القرآن.. وخلاص خلصت.. ((قل هو الله أحد)) تعدل ثلث القرآن..

والقصة يا ولاد في صحيح مسلم على فكرة..

-سبحان الله يعني ده حقيقة فعلا.. أنا كنت عارف المعلومة دي بس فعلا ما كنتش مستوعبها جامد بالشكل ده..

-شوفتوا النبي ﷺ بيعلم الصحابة إزاي بطرق تعليم متنوعة وجميلة ومؤثرة إزاي؟ متخيلين إحساسهم يوميها كان عامل إزاي بالاكتشاف المدهش ده؟

#الإدهاش و #الإبهار من أعظم وأعمق وأبلغ وسائل التربية والتعليم النبوية..

-فعلا موقف ما يتنسيش.. يا بختهم..

-فعلا.. يا بختهم..

#أسماءمحمدلبيب
أمةالله-عفا الله عنها

المقالة رقم 269

#حكاياتي_مع_مشاريع_حياتي
#حكايات_القدوة
#إكساب_السلوك_بالقدوة
#حكاية "10"

واحنا في المحل بنشتري طلبات البيت، لقيت بلال ابني -٦سنين- جايبلي علبة صابون غسيل سائل مرسوم عليه صورة واحدة ست متشخبط عليها بقلم جاف أزرق.

ما فهمتش قصده ايه؟

لقيته مطلع قلم جاف من جيبه وبيقول لي:

-أنا اللي خبيتها.. ايه رأيك فيا بقى 😌..

-.........!!

طبعا كنت محتارة أقول له كده غلط والا كده صح لإن بالفعل هو شايفني طول الوقت بظلل أي صورة لا ترضي الله في أي كتاب مثلا عندنا أو منتج بنشتريه لنفسنا، فهيبقى تناقض مني لو قلت له (إللي إنت عملته ده غلط) لإنه بيقتدي بيا..!

بس في لحظة ربنا ألهمني وحسمت أمري وقلت له:

-شاطر إنك بتخبي صورة البنات وتغير الحاجة إللي ما ترضيش ربنا، بس المرة الجاية الأفضل من كده انك تروح لصاحب المحل تنصحه هو يعمل كدة بنفسه.. ولو ده صعب، يبقى تقلب المنتج على ظهره وتمشي..

------

إزاي ممكن بعون الله وحده نغرس عفة البصر في الأطفال من صغرهم؟ = بالقدوة وشوية إجراءات، تلاقوها في المقالين دول:

t.me/rabayany_altarbeya_belwahyayn/326

t.me/rabayany_altarbeya_belwahyayn/330


#أسماءمحمدلبيب
أمةالله-عفا الله عنها

-وبناءً عليه☝🏻:

✍🏻✍🏻أكتر ولد فيكم كلكم إنتم وصحابكم، هلاقيه في الأيام دي مجمع الولاد وراه على التراويح كقدوة ليهم في الخير والطاعة والبر:

✔️ تروايح كاملة من أولها لآخرها
✔️ ولو تعبان يقعد
✔️ولو تعبان من الصلاة يقرأ بعينه قرآن ورا الإمام وهو قاعد في مكانه جنب الصفوف
❌ إنما ما يخرجش من الجامع ويسيب الصلاة ويلعب
❌ و مش أصحابه هما إللي واخدينه وراهم في اللعب طول الوقت، لأ..
✔️ والتهجد في العشرة الأواخر كمان يكون كدة

==== أكمل: أكتر واحد هنلاقيه كده:
هيبقى له مكافأة كبيرة في العيد إن شاء الله.. بلغوا أصحابكم بقى عشان كلكم داخلين السباق🎊🎈🎁..

-طب وانتي هتشوفينا هناك إزاي يا ماما 👀🤔؟
-ليا طرقي الخاصة ما تقلقوش👌🏻...

والمخلص = كده كده ربنا هيقِر عينه بالثواب والجزاء حتى لو ماحدش فينا عرف يتابع أو يشوف هو عمل إيه بالظبط ويكافؤه على شطارته.. فخلوها لله كده كده عشان ما تقلقوش أبدا إن شاء الله..

#التاريخ أعمار الأولاد كانت ٩ و ١٢ تقريبا..
#أسماءمحمدلبيب
أمةالله-عفاالله عنها

المقالة رقم 268


#حكاياتي_مع_مشاريع_حياتي
#حكايات_العبادات
#تعديل_السلوك_بالعبادات
#تعديل_السلوك_بشهر_رمضان
#حكاية "9"

((ونفس القصة نقلناها لكم ضمن ملزمة العيال والصيام: #العيال_ورمضان 3، تحت عنوان:
⁉️إزاي نحقق أجواء تنافس بينهم على التراويح والقرآن ونخليهم ما يزوغوش من الطاعات؟))

-يا ولاد.. فاكرين لما قلت لكم إن الركعة في الحرم ب١٠٠ ألف ركعة؟.. تخيلوا لو واحد دفع فلوس كتييير و تِعب جامد في التحضير والسفر والأوراق وووإلخ عشان يعرف يروح يركع في الحرم شوية ويرجع بعدها لبلده، و أول ما وِصل الحرم راح قاعد كده وفتح موبايله يلعب عليه..

هتقولوا عليه إيه؟ مجنون طبعا..

صح؟..طب ليه؟ عشان ده هما كام يوم وهيمشي ويرجع بلده ويقعد يبكي على اشتياقه للحرم وتفويته لكل دقيقة هناك، فالطبيعي إنه كان يأجل اللعب ده لبعد ما يرجع بلده، ده دافع فلوس كتير أوي وواخد أجازة ومجهز شنط وعامل مجهود كبير أوي عشان يروح! صح؟

-آه طبعا...!

-كذلك #رمضان يا ولاد، وبالذات العشرة الأواخر! الحسنة في رمضان مضاعفة، وكمان ال آااا ..

-ماما؟ هو اللعب في رمضان حرام..؟!

-لا طبعا مش حرام... لكن السؤال الصح هنا مش هو ده.. السؤال الصح هنا هو: هل إللي يلعب في التوقيت ده يبقى عاقل والا يبقى مجنون؟ هل يستحق يلقب بـ ((راجل)) و ((مسؤول)) -سواء بنت أو ولد- والا لسة ((طفل)) قالب الجد كله لعب؟

-اممممم

-طيب هسألكم سؤال تاني: لو في نص نهار رمضان يا ولاد، جالكم شخص وقال لكم: اشربوا كوباية مية، هتقولوا له إيه؟
-لأ طبعا إحنا صايمين 🙀.. إزاي يعني😸😸 ..

-طيب لو قال لكم: اشربوا بؤ مية واحد كدة بس👌🏻 ، مش هيجرى حاجة خالص، وكملوا صيامكم عادي بعدها ، هتقولوا له إيه؟؟

-إزاي يعني يا ماما يقول كده !، الصيام كده هيبوظ كله بالبؤ الصغير ده أصلا ويضيع اليوم كله علينا عشان خاطر فتفوتة مية..

-جميل... طيب لو قال لكم: أومال هتشربوا إمتى يا ولاد بس دانتوا عطشانين؟!! هتقولوا له إيه؟..

-هنقول له: ده هي ساعات قليلة والمغرب هيأذن ونشرب يا عمو إن شاء الله..

-بالظبط كدة 👌🏻، هتشربوا وترتووا وتبقوا أخدتوا الحُسنَيَيْن: الثواب والمية... وهو ده إللي عاوزة أوصله لكم -مع الفارق الشرعي في الحكم طبعا يا ولاد- ألا وهو سؤالي: اشمعنى لما بنقول لكم ((ده مش وقت لعب في الليالي العزيزة القليلة جدا دي)) بتستغربوا!؟

-... 👀...

-أيوة نلعب ونروّح عن نفسنا عشان القلوب بتحتاج ده عشان تكمل عبادة وإنجازات وأعمال البر بنشاط وووإلخ..
لكن 👈🏻:

✔️نعمل دة كترويح بين العبادات والإنجازات وأعمال البر

✔️ و نعمله بنيّة ناخد عليها أجر عبادة

✔️ ونعمله بتركيز إن الترويح ما يزيدش عن القدر المطلوب لتجديد النشاط..

❌ مش نبقى قالبين الليل لعب والنهار لعب والجَد لعب، وبين اللعب واللعب بنعمل عبادات..!

وياريتنا بنعمل العبادات حتى دي بطمأنينة كمان وإتقان ونشاط، لأ للأسف أحيانا بنقلد المنافقين {وإذا قاموا إلى الصلاة قاموا كُسَالَى يراءُون الناس ولا يذكرون الله إلا قليلا}...

إحنا بندي اللعب حقه طول الشهور، ندي العبادة بقى حقها في الشهر القصير ده، والليالي المعدودة دي، لإنها محطة مهمة جدا لتمرين عضلات التقوى والعبادة وترويض النفس والتخفف من الدنيا والتجهز للجنة، موسم تمارين يعني ما يتفوتش، للسنة كلها.. وبينتهي بسرعة مش بيطوّل..

-معاكي حق يا ماما... طيب بعد صلاة العشاء، أول لما بتبدأ التراويح، صحابنا بيبقوا بيلعبوا برة الجامع وبيقولوا لنا نروح نلعب معاهم، نعمل إيه؟

-قولوا لهم ((تعالوا إنتوا صلوا معانا التراويح الأول، وبعد الصلاة كده كده هنلعب زي كل مرة إن شاء الله)).. لو ما رضيوش، صلوا لوحدكم إنتوا وهتحصّلوهم بعد الصلاة في اللعب وتبقوا زي بعض في النهاية بتلعبوا ومبسوطين زيكم زيهم...

بس الفرق👌🏻: صحائفكم إنتوا هتكون أثقل بالحسنات، فهتبقوا مبسوطين أكتر إن شاء الله..

-ماشي بس طبعا انتي عارفة إن أكيد هما هيبقوا كدة أخدوا نصيبنا في اللعب ولعبوا أكتر مننا.. بس مش مهم طبعا الثواب أهم بقى 🫥..

-هسألك سؤال: إللي أكلوا وشربوا جنبكم دول وانتوا صايمين إللي اتكلمنا عنهم من شوية = هل أخدوا نصيبكم لما شربوا؟ هل فاتكم رزق الأكل والشرب؟ إطلاقا ☝🏻.. حصّلتوهم بعد شوية وبقيتوا كلكم واكلين وشاربين وشبعانين زي بعض...

بس الفرق مرة تانية:

إن إنتوا هتبقوا أعلى عند ربنا بإذن الله.. {هم درجات عند الله}، {منكم من يريد الدنيا ومنكم من يريد الاخرة..}.. فاختاروا أي سباق هو الأهم إنكم تاخدوا فيه النصيب الأكبر.. لازم هتستغنى عن شيء قصاد شيء.. محدش بياخد كل حاجة.. محدش بياخد الدرجات العلى في الجنة من غير تضحيات بدرجات متع في الدنيا.. فخد بالك: {بل تؤثرون الحياة الدنيا.. والآخرة خير وأبقى.. }

-حاضر 👍🏻..

🔸من يتابعون تلخيصي لمجالس سورة البقرة للدكتور فريد الأنصاري رحمة الله عليه ، يجدون الجزء الجديد هنا في هذا الرابط 👇
https://t.me/samarebrahim32/1333

#سمر_إبراهيم