Лента постов канала የነቢያት መንገድ | طريق الأنبياء (@path_of_the

ሀልዎተ ኢሥላም (ቅድመ ሙሐመድ 'ﷺ' )
...
የክርስቲያን አቃቢያን መታወቂያ ላይ የ አደጋ ጊዜ መውጫ ተብለው ከሰፈሩ ጥያቄዎች አንዱ ይህ "ቅድመ ሙሐመድ 'ﷺ' ባሉ ታሪካዊ ማስረጃዎች የእስልምና መኖር ሊረጋገጥ ይችላልን?" የተሰኘው ጥያቄ ነው ...ጥያቄውም እንደ ጥያቄ በአድማጩ ማህበረሰብ ላይ በተንሰራፋበት አውድ ተገቢውን መልስ ከማቅረብ አኳያ በኛ በኩል ካሉ አካላት ግልጽ እና አመርቂ እይታ ባለመመልከቴ ይህቺን መጣጥፍ አሰፍር ዘንድ ወደድሁ።

የፍጥረተ አለሙ አስገኚ እኛ የሰው ልጆችን ሲፈጥር እሱን ለመገዛት የተመራን በመሆን ውስጥ ቃል የተገባልንን ገነት እንድናገኝ በሚል አላማ እንደሆነ በተከበረ ቃሉ አበክሮ ይነግረናል። (51፥56፣2፥21) ወደዚህች ምድር ሲያመጣንም እሱን ለመታዘዝም ሆነ ለማመፅ ከሚያበቃን የምርጫ ነፃነት “Free Will” ጋር ሲሆን ለፍጡራኑ ካለው ውዴታ በተነሳ ለገዛ ምርጫችን ሳይተወን በመልካም የሚያዙ በመጥፎ የሚያስጠነቅቁ ነብያትና መልዕክተኞችን ሲልክ ቆይቶ የነዚሁ ማገባደጃ እና ማብቂያ በማድረግ ነብዩ ሙሐመድን 'ﷺ' ከተከበረው ቃሉ ጋር ለአለም ልኳቸዋል። ይህ ነብያት የተላኩበት ለብቸኛው አምላክ እጅ የመስጠት (የመታዘዝ፣የመገዛት) መንገድ በዓረቢኛ የቃል አጠቃቀም ውስጥ ኢሥላም "اسلام" ተብሎ ሲጠራ የዚህ መንገድ አስኳል እና ምሰሶ የሆነው የአንድ እና ብቸኛ አምላክ አስተምህሮ "Monotheism" የነብያቱ መሠረታዊ አጀንዳ መሆኑን ጠቋሚ የሆኑ ዘርፈ ብዙ መረጃዎች ቢኖሩም በነዚህ መረጃዎች ላይ እንደ አንድ አርዕስት ለመመለስ በማሰብ በዛሬው ነጥብ ላይ አንዳንድ አስፈላጊ ግምገማዎችን እንቃኝ …

ዘርፈ ብዙ መሣሪያዎችን በመጠቀም ስለ አላፊ ክስተቶች የሚያትት የጥናት ዘርፍ "ታሪክ" ተብሎ ሲጠራ በዘርፉ ላይ ጥናት የሚያደርጉ ምሁራን ደግሞ "ታሪካውያን" በሚል የማዕረግ ስም እንጠራቸዋለን። ሴኩላር ዘርፉ ቀላል የማይባሉ ክስተቶችን እውነታነት እንዳረጋገጠልን ሁሉ ታሪካውያኑ በተለያየ ጊዜ ውስጥ ከማስረጃ ውስንነት አንፃር በአንዳንድ ክስተቶች ውስጥ ዝምታን መምረጣቸው የክስተቱን ህልውና ሙሉ ለሙሉ ጥያቄ ውስጥ የሚያስገባ (አለመከሰቱን፣አለመኖሩን) እንደማያመላክት ያስገነዘቡን ዘርፈ ብዙ ታሪካዊ ክስተቶች ለቁጥር አታካች ናቸው ለምሳሌ፦ በአያሌ የብሉይ ኪዳን ጥቅሶች ውስጥ ሰፍረው የምናገኛቸው ኬጥያውያን "Hittites" 'ሁጎ ዊንክለር' በተሰኘ ጀርመናዊ አርኪዮሎጂስት የመሪነት ውጥን በ 20 ክ/ዘመን ህልውናቸውን ስነ ቅርስ እስኪያረጋግጠው ድረስ ከታሪካውያኑ ዘንድ የነበረው ግምገማ ከአፈ ታሪክ የዘለለ አልነበረም ይለናል 'Dr. Ira M. Price' :-

“The Hittites are often mentioned in the Old Testament. Otherwise they were a forgotten people until the second half of the nineteenth century. The lack of extra-biblical testimony to their existence led some scholars about a half-century ago to deny their historicity.” [¹]

…
በሌላ አቅጣጫ አብዝሀኛው ማህበረሰብ ኢ-ርቱዕ "Secondary" ለምንለው እንደ ታሪክ መጻሕፍት ያሉ የምንጭ አይነቶች ተጋላጭ ከመሆኑ ጋር "history is written by the winners" እንዲል 'Napoleon Bonaparte' የታሪክ ምሁራን እና ጸሐፍት ምንጮች እንኳ አሸናፊ እንደሆነው አካል ፍላጎት ሲቀረፁ እና ሲረቁ የሚስተዋልበት አጋጣሚ እጅጉን ሰፊ ነው። 'Edward H. Carr' "What Is History?" በተሰኘ መጽሐፉ ላይ “Study the historian before you begin to study the facts.” [²] ሲል ያሳሰበን በዚሁ ስሌት እና ቀመር አይደለምን?

ለዚህ ነጥብ ማሳያ በመሆን ከሚቀርቡ ቁጥር ስፍር ከሌላቸው ማስረጃዎች መካከል ቤ/ክርስቲያን አንዷ ነች! ከጥንታዊቷ ቤ/ክርስቲያን ተቃራኒ አቅጣጫ ቆመዋል ተብለው በመታመን ምንፍቅና "Heretics" በሚል የአመለካከት መደብ ውስጥ የተካተቱ አካላት እንደ ምሳሌ መጥቀስ ይቻላል! "የነገረ አበው አባት" በመባል የሚታወቀው 'ቅዱስ አውሳብዮስ ዘ ቂሳሪያ' ስራ የሆነው "Church History" የተሰኘ መጽሐፍ (VIII) መቅድም ላይ እንዲህ ከማለቱ ጋር፦

“But we shall introduce into this history ...only those events which may be useful first to ourselves and afterwards to posterity.”

ይበልጡኑ ከ2 ተኛው እስከ 5ተኛው ክ/ዘመን ባለው የክርስትና ታሪካዊ ዳራ ውስጥ አያሌ በክርስትና ጎራ ስር ምድብነት የነበራቸው አንጃዎች እንደነበሩና ጠንከር ባለ ግብግብ ውስጥ በመግባት አንዱ አንዱን ሲያዳክም እና ሲጥል በዘለቀበት ፍልሚያ ውስጥ የአሸናፊነቱን ቦታ የያዘችው አካል "Proto Orthodox" በተቃራኒ የአመለካከት አቅጣጫ ላይ ቆመዋል ብላ ያመነችባቸውን አካላት ሄተሮዶክስ "Heterodox" በሚል ቅፅል በመቀፀል ቀላል የማይባል ጥፋትን ከማድረስ አልፎ ለዚህ ጥቃት ተጋላጭ የሆኑትን አካላት ታሪክ እንደመሰላት አድርጋ ከፃፈችው ከራሷ ከድል አድራጊዋ ቤ/ክርስቲያን የመረጃ ምንጮች እንድናገኝ እንዳደረገች 'Bart D. Ehrman' የተሰኘ አሜሪካዊ የአዲስ ኪዳን ምሁር "The Lost Christianities" በተሰኘ መጽሐፉ የመጀመሪያ ምዕራፍ ላይ በሰፊው ያትትልናል ... [³]
…
በማህበራዊ ፖለቲካዊ አውድ የሚወሰነው ታሪክ ዝምታ "Historical Silence" ቅድመ ሙሐመድ 'ﷺ' የእስልምናን ህልውና ውድቅ የሚያደርግ ማሳያ አድርጎ ማቅረቡ "argumuntum ad ignoratium" በተሰኘ ህፀፅ ውስጥ መመደቡን በማስያዝ እስልምና በታሪክ ምንድን ነው? ቢሉ የታሪክ እና ታሪካውያኑስ ምንድን ናቸው? በማለት መጠይቃችንን እያሰፈርን ስነ ቅርፃዊ ግምገማው የብዙሃኑን የህልውና ጥያቄ በቅጡ እንኳ ካለመመለሱ አልፎ ምድራችን በምትገኝበት አውድ የዚህ አለም እግዜሮች ስለ ሁኔታው ዝምታን መምረጣቸው …የትርክት ሀሰትነት አለመረጋገጥ እውነት እንደማያደርገው የትርክት እውነታነት አለመረጋገጥ ሀሰት አያደርገውምና በጊዜ ውስጥ ስለነበረው ጊዜ አሳላፊ ከሆነው ጌታ ቃል (ቁርዓን) ግንዛቤ ስር አርዕስቶቻችንን በማስጠለል የዛሬዋን መጣጥፍ እናገባድዳለን።

“ለእናንተ ከሃይማኖት ያንን በእርሱ ኑሕን ያዘዘበትን ደነገገላችሁ፡፡ ያንንም ወዳንተ ያወረድነውን ያንንም በእርሱ ኢብራሂምን ሙሳንና ዒሳንም ያዘዝንበትን ሃይማኖትን በትክክል አቋቁሙ በእርሱም አትለያዩ ማለትን (ደነገግን)።”
— Surah Ash Shuara 42:13

__
ማጣቀሻዎች፦

[1] Ira M. Price, The Monuments and the Old Testament (1909), pp. 75–6

[2] Edward H. Carr, What is History? (1961), p. 26

[3] Bart D. Ehrman, The Lost Christianities (2003), Ch. 1

...
Written By: Akhi Ahmed Respond
https://t.me/ahmedrespond