Қўшни
📜Абу Ҳанифа ва унинг этикдўз қўшниси
Абу Ҳанифа Нўъмон ибн Собит раҳимаҳуллоҳнинг этикдўз қўшниси бўлиб, у оёқ кийимларини тикиш ва таъмирлаш билан шуғулланар эди. У билан боғлиқ қисса солиҳ уламо, имомларнинг ўз қўшниларига, айниқса, уларга озор ва ноқулайлик етказганларига қандай муносабатда бўлганларини кўрсатади. Этикдўз кун бўйи ишлар, кечаси эса уйига келар, овқат тайёрлаб, хамр ичар ва қўшиқ айтар эди.
Хатиб Бағдодий бу ҳикояни "Тарихи Бағдод" асарида шундай ривоят қилади: "Абу Ҳанифанинг Куфада бир этикдўз қўшниси бор эди. У кун бўйи ишлар, тун киргач эса уйига қайтар, ўзи билан гўшт олиб келиб пиширар ёки балиқ қовуриб ерди. Кейин эса маст бўлгунча ичиб олар, шундан сўнг баланд овозда: “Мени зое қилишди, қандай йигитни зое қилишди-я...
Мен улар учун оғир кунларда сафни тўлдириб, ёриқни беркитар эдим”, деб қўшиқ айтар эди.
У туни билан қўшиқ айтиб чиқар ва ухлаб қолар эди. Имом Абу Ҳанифа тунлари таҳажжуд намози ўқишга одатланган эдилар. Шунда қўшнининг баланд овози эшитилар ва у зотга ноқулайлик туғдирар эди.
Шунга қарамай, Абу Ҳанифа бир куни қўшнисининг овозини эшитмай қолганида, уни суриштирдилар ва унинг қамалганини билдилар. Эртаси куни эрталаб амирнинг олдига уни озод қилишини сўраб бордилар.
Бағдодий айтади: "Абу Ҳанифа унинг овозини эшитмай қолдилар ва у ҳақида сўроқладилар. Унга: "Бир неча кеча олдин миршаблар уни ушлаб олиб кетишди, ҳозир у маҳбусликда”, дейилди.
Абу Ҳанифа эртасига бомдод намозини ўқиб, хачирига миниб йўлга тушдилар ва амирнинг ҳузурига киришга изн сўрадилар.
Амир: “У зотга рухсат беринглар ва улови билан киритинглар, гиламга етгунча тушишларига йўл қўйманглар”, деди. Шундай қилишди.
Амир у зотга эҳтиром кўрсатди, ўтирган ўрнидан жой берди ва: “Бизга нима ҳожатингиз бор?”деб сўради.
У зот: “Менинг бир этикдўз қўшним бор, уни миршаблар бир неча кеча олдин ушлаб кетишган экан. Уни қўйиб юборишни буюрсангиз”, деди.
Амир "хўп”, деди ва этикдўз билан бирга ўша кечадан то ўша кунгача қамоққа олинганларнинг барчасини озод қилиб юборишга амр қилди.
Этикдўз чиққач, Абу Ҳанифа ундан ўзи куйлаб юрадиган байт ҳақида сўрадилар: "Эй йигит, биз сени ташлаб қўйдикми, зое қилдикми?"
У: "Йўқ, аксинча, муҳофаза қилдингиз ва ғамхўрлик қилдингиз. Қўшничилик ҳаққи-ҳурматига риоя қилганингиз учун Аллоҳ сизни гўзал мукофоти ила мукофотласин", деди.
Бу воқеадан сўнг йигит буткул тавба қилди ва аввалги маст-аласт юриш ва бекорчи қўшиқлар айтишларни ташлади.
@arabicuz
iOS | Android
Instagram | Facebook | Twitter | Tiktok | Youtube
0
Показать ещё
