#قصص_القرآن_للأطفال

🔦 قصة المائدة

🌸 كان ياما كان وما يحلى الكلام
إلا بذكر النبي .... محمد عليه الصلاة و السلام ..

🌸 اللهم صل علي سيدنا مُحَمَّد

🌸 كان في نبي كريم اسمه عيسى ابن مريم عليه السلام

🌸 والرسول ده كان معجزة من معجزات الله عز وجل لأن ربنا خلقه من أم بدون أب وده محصلش قبل كده خالص ولا هيحصل بعد كده كمان

🌸 وكان سيدنا عيسى طفل جميل كل الناس بيحبوه

🌸 ولما كبر كان شاب مطيع بيسمع كلام ربنا ومش بيعمل حاجة تزعله

🌸 وربنا اختاره علشان يكون نبي ورسول لبني إسرائيل

🌸 وبدأ سيدنا عيسى عليه السلام يلف البلاد علشان يخلي الناس تعبد ربنا لوحده ويسمعوا كلامه

🌸 ولكن الناس رفضت تسمع كلام سيدنا عيسى إلا شوية صغيرين أوي

🌸 أخذ سيدنا عيسى الناس اللي آمنت معاه علشان يلفوا بقية البلاد ويخلوا الناس يعبدوا ربنا لوحده ويسمعوا كلامه

🌸 وكانوا المسلمين اللي مع سيدنا عيشى بيساعدوه في الدعوة لله

🌸 وفي يوم من الأيام سيدنا عيسى قال للناس المؤمنين إيه رأيكوا نصوم كلنا لمدة ٣٠يوم

🌸 وبعد لما تخلصوا الصيام تطلبوا من ربنا أي حاجة انتوا عايزنها

🌸 وفعلا صاموا كلهم وهما مسافرين لحد ما وصلوا إلى صحراء كبيرة مفيهاش زرع ولا مية

🌸 وتعبوا من شدة الجوع والعطش وقالوا لسيدنا عيسى إحنا سمعنا الكلام وصومنا

🌸 يا ترى ربنا دلوقتي هيحقق لينا كل اللي إحنا هنطلبه؟

🌸 فرد عليهم سيدنا عيسى وقال أيوه اطلبوا اللي انتوا عايزينه

🌸 فقالوا إحنا عايزين ربنا ينزل علينا مائدة من السماء عليها أكل كتير أوي ومائدة يعني سفرة أو ترابيزة عليها أكل

🌸 فسيدنا عيسى قالهم بس ده طلب غريب هيخليكوا تبطلوا تشتغلوا وتعمدوا إن الأكل بينزل من السماء جاهز من غير تعب

🌸 لأن المسلم لازم يشتغل علشان ربنا يوسع رزقه

🌸 وأصحاب سيدنا عيسى اللي ربنا سماهم الحواريين قالوا لسيدنا عيسى إحنا عارفين الكلام ده كويس بس إحنا من ٣٠يوم صايمين وجعانين أوي

🌸 وكمان عايزين نكون مطمئنين إن ربنا هيستجيب دعوتنا زي ما إنت وعدتنا

🌸 ودي هتكون معجزة من عند ربنا وهتخلي الناس تسمع كلامك وتآمن بيك بسرعة

🌸 فلما اتأكد سيدنا عيسى إنهم مؤمنين وإن طلبهم ده مش غلط دعا ربنا وقال اللهم يا مالك الملك أنزل علينا مائدة من السماء علشان تكون عيد لينا ومعجزة تخلي الناس تصدقنا و ارزقنا وأنت خير الرازقين

🌸 فأستجاب ربنا لدعاء سيدنا عيسى وأنزل المائدة من السماء

🌸 بس ربنا سبحانه وتعالى قال لسيدنا عيسى اللي هيكفر بعد ما يشوف المائدة بعينه أنا هعذبه عذاب شديد مفيش حد اتعذبه قبل كده

🌸 وقف سيدنا عيسى هو والحواريين مستنيين نزول المائدة

🌸 وبعد شوية شاف سيدنا عيسى الملائكة وهما نازلين بمائدة كبيرة من السماء عليها أكل كتير أوي محدش أكله قبل كده

🌸 فسيدنا عيسى حمد ربنا وشكره على النعمة الكبيرة دي وقال للحواريين اشكروا ربنا علشان ربنا يزيدكم من فضله

🌸 واكلوا كلهم وشبعوا وعجبهم الأكل جدا و زاد إيمانهم بربنا وصدقوا سيدنا عيسى

🌸 وعرفوا إن ربنا قادر على كل شيء

🌸 وكانوا كل لما يشوفوا حد يحكوا له على اللي حصل و ده خلى عدد المؤمنين يزيد

🌸 واستفدنا من القصة دي إن المسلم لازم يعبد ربنا لوحده ويسمع كلامه ويخلي الناس اللي حواليه هي كمان تعبد ربنا ويفكرهم بالصلاة والصوم زي ما عمل سيدنا عيسى مع الحواريين

🌸 وان ربنا بيستجيب الدعاء وخصوصا بعد العبادة

🌸 واتعلمنا إن ربنا قادر على كل شيء وان الحاجات اللي بنشوفها صعب تحقيقها ربنا قادر إنه يحققها بسهولة

🌸 بس المهم نشتغل ونبعد عن الكسل ونعبد ربنا صح

🌸 ولما ربنا يدينا نعمة نقول للناس عليها علشان الناس تحب ربنا وتعرف إن ربنا كريم وبيستجيب لكل دعاء وطلب وأي حاجة بنحتاج لها

🌸 ومعادنا بكرة إن شاء الله مع قصة المسيح الدجال

🌸 تصبحوا على خير يا حلوين

🌸 وصل اللهم وسلم على محمد
🌸🍃🌸🍃🌸🍃
إقرأ 📚 وانشر 📬 تُؤْجَرْ
‏@seerawqass