#Jamoatchilik_nima_deydi

Мубашшир Аҳмад – бу исм сўнгги вақтларда миллат, дин ва давлатнинг шарафи у учун аҳамиятли бўлган ҳар қандай зиёли ва ҳар қандай ватандош тилида жаранглаётган, қалбида зиммиллаб турган исмдир…

Айниқса устознинг волидалари, ака-укалари ва яқинлари учун…

Мубашшир Аҳмад шахсан камина учун устоз, мураббий, самимий дўст, дарддош ака ҳамда дин ва умматга хизмат йўлида жонкуяр сарбон ва камтар йўлдошдир!

Миллат учун эса бир вақтлар Мовароуннаҳрнинг шон-шуҳратини кўкка кўтарган, башарнинг цивилизациясида жиддий роль ўйнаган, номлари бугунга қадар яшаб келаётган буюк алломалар ва мутафаккирлар, илм-фан асосчиларининг давомчиси, ҳаётий тимсолидир.

Давлат учун эса устоз Мубашшир Аҳмад Исломнинг васатий таълимотларининг ҳақиқий тамсилчиси, ҳақиқий мусулмон зиёли, жамиятда толерант, ватанпарвар, ислоҳотчи, Исломнинг мусаффо ҳақиқатларини илм-у амалида намоён қила олган, энг асосийси халқ ва давлат орасида самимият кўприги бўла оладиган, тажрибали саноқли уламолардан биридир.

Шу пайтгача устознинг ҳар бир суд жараёнини ёритиб бориш, судланувчи ва оқловчиларига ўз ҳақ-ҳуқуқини ҳимоя қилиш учун берилаётган имкониятлар қалбимизга бироз таскин бериб келаётган бўлса-да, бироқ сўнгги суд мажлисида айбномалар асоссиз экани исботланишига қарамай, устозга нисбатан давлат қораловчиси томонидан сўралган 7 йиллик қамоқ жазоси мутлақо ҳақсизлик, мантиқсизлик ва қасддан қилиниётган адолатсизликдир.

Кечиктирилаётган судда ўқиладиган ҳукм нафақат ўзбек халқининг ҳақиқий маърифатпарвари, етук диний олими, зиёли фарзанди Мубашшир Аҳмад домла устидан, балки миллатнинг қанчадан қанча зиёлилари қалбидаги ишонч ва умиди, айниқса, халқаро башариятнинг олий қадриятлари, инсоний виждон, давлат ва миллат обрў-эътибори, қадриятлар муқаддаслиги, дунё кўз ўнгида бегуноҳ ўлдирилган ва ўлдирилишда давом этаётган Ғазолик минглаб гўдаклар ва аёлларнинг қадру-қиймати, энг асосийси янги Ўзбекистоннинг ислоҳотлари ва адолати устидан ҳам ўқиладиган ҳукмдир…

Ўйлайманки, судья жаноблари бу тарихий масъулиятни жиддий ҳис этадилар.

Умидимиз бор!

Давлат адолати тажаллий этади ва устозга озодлик берилади, ИншааАллоҳ!

Абдулқодир Азҳарий – Исломий илмлар мударриси, ижтимоий фаол

@MubashshirAhmad

Томоша қилинг 👉 https://youtu.be/lXacZZHRSl0

©️Azon Global

#Jamoatchilik_nima_deydi

Мен Мубашшир Аҳмад билан шахсан учрашмаганман. Лекин инсонга қилмишлари билан баҳо бериш керак. Азон ТВни ташкил этиб, ёшларни илмсиз дин(дорлик) ботқоғидан олиб чиқишга, зиё тарқатишга интилганликлари мен учун жуда муҳим сифат.

Суд мажлиси ва қўйилган айблар юзасидан ҳеч нарса айта олмайман, чунки малакам етарли эмас. Фикрим шуки, бизнинг мамлакатда экстремистик бўлмаган фикрлар ва уларнинг эгалари таъқиб қилинмаслиги керак.

Умид қиламанки, суд барча фактларни инобатга олиб, Конституциямиз нормалари доирасида сўз эркинлигини ҳимоя қилади.

Абдулла Абдуқодиров – иқтисодчи, Стратегик ислоҳотлар агентлиги директори ўринбосари

@MubashshirAhmad