Одинахон Муҳаммад Содиқ:
"Ота-онанинг фарзандга берадиган энг муҳим нарса тарбия, энг азиз нарса эса гўзал хулқидир
!"
❓ Оналар нега фарзандларимиз билан тил топиша олмаяпмиз? Нега уларга тарбия беришда қийинчиликларга дуч келяпмиз? Нега бу қийинчиликлар бизни тушкунликка тушириб қўйяпти?
Бугунги кунда онажонларимиз ўртасида бу каби муаммолар жуда кўп учраётгани сир бўлмай қолди...
Бугун, 4 октябрь куни «Регистон оналар мактаби»да устоза Одинахон Муҳаммад Содиқ билан мактаб ота-оналари иштирокида «Фарзанд тарбиясида онанинг ўрни» мавзусида ўтказилган учрашувда иштирок этарканман, юқоридаги саволларга батафсил жавоб олдим десам, муболаға бўлмайди.
«Шундай муаммолардан қийналганингизда ўзингизга бир савол бериб кўринг:
– Биз нима мақсадда фарзанд кўрдик?
– Биз фарзанд тарбиялашга тайёрмидик?
Аллоҳ таоло бизга улуғ неъматини ато қилди, истаса, уни бизга бермас эди. Аммо ундай бўлмади. Хўш, унда биз зиммамиздаги масъулиятни адо қилдикми ёки шунга интиляпмизми? Саволга жавобни ўзингиздан қидириб кўринг.
Аксарият оналаримиз болалари билан келиша олмаётганидан кўп шикоят қилишади. Улар билан суҳбатлашиш асносида, афсуски, асосий муаммо оналаримизнинг болаликдан олган тарбиясига бориб тақалиши маълум бўляпти...»
Дарҳақиқат, ота-онанинг фарзандга берадиган энг муҳим нарса тарбия, энг азиз нарса эса гўзал хулқидир. Қиёматда ҳам тарозида энг оғир келадигани кишининг ахлоқидир. Набий соллаллоҳу алайҳи васаллам: «Тарозига ҳусни хулқдан кўра оғирроқ қўйиладиган нарса йўқ», деб марҳамат қилганлар. Албатта, фарзандимизнинг хулқи гўзал, муомаласи чиройли бўлса, биз ҳам қийналмаймиз.
«Болаларимизга чиройли, гўзал хулқ бериш борабарида доимий равишда уларга меҳр улашиш ҳам шу замоннинг долзарб муаммосидир.
Ҳадиси шарифда Расулуллоҳ соллаллоҳу алайҳи васаллам: «Раҳмлиларга Роҳман раҳм қилади. Ердагиларга раҳм қилинг, сизга осмондаги Зот раҳм қилади», деганлар. Болаларимизга меҳр берсак, бу ҳақни мукаммал адо этсак, ишимизда ҳам, ризқимизда ҳам барака бўлади.
Фарзандингиз бағрингизда оналик тафтини ҳис қилиб яшасин. Телефон қуввати тугаса, қувватлагич билан уни яна қувватлантирасиз. Фарзандимиз ҳам бағримиздан, тафтимиздан ўша қувватлагич мисоли куч олиб яшашсин!..»
Устоз бу мавзуда жуда кўп фойдали, зарур тавсияларни бердилар. Болалар билан суҳбатлашиб туришга, уларни эшитиб, улар билан бирга вақти-вақти билан ўйнаб, сайр қилиш ҳам мароқли тарбия усулларидан эканини эслатиб ўтдилар. Учрашув сўнггида Одинахон Муҳаммад Содиқ оналаримизнинг қизиқтирган саволларига жавоб бердилар.
🌹Одинахон Муҳаммад Содиқ «Регистон оналар мактаби" жамоаси томонидан "МИЛЛАТ ОНАСИ" фахрий нишони билан тақдирландилар.
Мактабдаги бугунги учрашув ҳар жиҳатдан онажонлар учун манфаатли бўлди, дея оламан.
✍️Райҳона
@BintuSodiq
0
Показать ещё
