دۆزەخ ناسراو و بەهەشت نەناسراو:
تێپەڕین لە خۆلۆمەیی و ترس لە گۆڕان

خۆلۆمەیی یەکێک لە ڕەوشتە باوەکانی مرۆڤەکانە؛ کاتێ تاک شکست و هەڵەکانی خۆی زیادلەئەندازە هەڵدەسەنگێنێ و باری قورسی تاوان یان ناهومێدی وەئەستۆ دەگرێ.

🔷ئەو بۆچوونە زۆرتر لەگەڵ ترس لە گۆڕان و نەناسراوی ئاوێتەیە، چونکە مێشک و زەینی مرۆڤ بەشێوەی سروشتی شتگەلی نەناسراو و نوێ بە هەڕەشە دەزانێ، تەنانەت ئەگەر هەر ئەو هەڕەشەیە توانای باشتر کردنی ژیانی ئەوی هەبێ . هەر بەو هۆیە، دۆزەخی ناسراو هەمیشە ئاسوودەتر لە بەهەشتی نەناسراو دێتە بەرچاو.

🔷مێشک و زەینی ئێمە بۆ مانەوە(بەقا) درووست کراوە وه هەر شتێکی کە چاوەڕواننەکراو بێ، لەوانەیە بە مەترسییەکی پەنگ خواردووی بزانێ.

🔷کەچی، تەنانەت هەلومەرجی ناخۆش و ناسراو، لەبۆ مێشک و زەین ئاسوودەتر لە گۆڕانکاری ئەرێنی و نەناسراو دێتە بەرچاو. خۆلۆمەیی ئەم خۆڕاگرییە سروشتییە بەهێز دەکا، چونکە کاتێ تاک بەردەوام خۆی بە تاوانبار دەزانێ یان تواناییەکانی خۆی بە کەم دەزانێ، ئازایەتی و ورەی پێویست لەبۆ چالاکی بەرەو نەناسراو کەم دەبێتەوە.

🔷 بەو حاڵە،ئەگەر تاک ئاگایانە فێر ببێ وێنە و سەرمەشقەکانی زەینی خۆی بناسێ و ئامانجە گەورەکان بە هەنگاوی چکۆلە دابەش بکات هەلی تێپەڕین لە ترس و خۆلۆمەیی مەیسەر دەبێ.

🔷 جووڵەی لەسەرەخۆ بەرەو گۆڕان، هەستی هەڕەشە و ترساندن کەم دەکاتەوە و زەین و مێشک ئامادەی ئەزموونی شتایەکی نوێ دەکا.

🔷 ڕاهێنانی ئامادەبوونی دەزبەجێ و قەبووڵ کردنی هەستەکانیش یارمەتی دەدەن کە زەین و مێشک لەهەمبەر نەناسراو کەمتر بەرەنگاری بکا و تاک بتوانێ بە ئارامییەکی زیاتر وەشوێن ڕێگای گەشە کردنی خۆی بکەوێ.

🔷دڵسۆزی لەگەڵ خۆت و سەرنج دان بە شکستەکان بەناوی بەشێک لە ڕێڕەوی فێربوون، کلیلی تێپەڕبوون لە دۆزەخی ناسراو و گەیشتن بە بەهەشتی نەناسراوە

🔷کاتێ تاک فێر دەبێ لەباتی لۆمە، خۆی هان بدا و هەلەکان ببینێ، دەتوانێ بوێری پێویست بۆ گۆڕان و جووڵە بەرەو داهاتووی باشتر بدۆزێتەوە.

🔷لەو ڕەوگەیە، زەین و مێشک ئۆقرە دەگرێ و نەناسراو ئیتر هەڕەشە نابێ، بەڵکوو هەڵێک لەبۆ گەشە کردن و وەرچەرخانی کەسی و تایبەتی دەبێ.


✍نەستەرەن ماهوور
وەرگێڕان:کامیل ئاغابەیگ پوور
۸ی ڕەزبەری۲۷۲۵ی کوردی

🆔 @zsirwa

🆔 @CheshtiMjewriKurdistan

t.me/joinchat/AAAAAEFe4_k6Lu_fEpqJIg
چێشتی مجێوری كوردستان

گەڕانی شەوانم
15

ئەمشەو ئازیز ، هەر ئەمشەو بەر لەوەی بچمەوە ناوخۆم ، بەر لەوەی ڕێکەوم بەرەو دیاری خەیاڵ و خەونە ڕەنگینەکانی ئەو هەموو نووستنەی بە تۆوە نەبێت بینینیان هیچێکە تا ئەمشەویش ، هاتمە بەر دەرگای لێدانێکی تر لە دڵت ، بانگ کردنێکی پەنامەکی تر و گەڕانەوەیەکی تەنیا ، نازانم ئەمشەو بۆ لێم دوور نەبوویت ، بۆ کە ئەمویست خۆم بنێرمەوە بەرەو دیدارێکی ئەسپاییت تۆ پێت ئەوتم چۆن و لە کوێوە ، کوێت ببینم هەمووی تۆم بینیوە ، کوێت بگرم تا بتوێمەوە بە تەواوی لەشتا ، ئەمشەو گیانە بێتاقەتتر لە هەموو تەمەنم دووری کارێکی پێمکرد هیچ غەریبێک بە غەریبی نەکردبێت ، هیچ ئاشقێک ئاوەها دەردی بە دڵی ئەشقا نەکردبێ ، گیانە  تۆ ماندوویت من بۆ بێ دەنگ لێی بکەوم ، تۆ لێم بێزاریت من بۆ زیاتر ڕقت پێ نەدەم تا بە نرخی گیان پێم بفرۆشیتەوە ، گیانە ئەمشەو بۆم دەرکەوت بێ تۆ هیچ مەعنایەک ڕەنگ بە بوونم نادەن ، زانیم وەک ئەو هەموو جارەی زانیومە تۆ ناتوانی چرکەیەکیش بۆ خۆت بیت تا من مابم ، با باوەشێکی تریش بتبا ، با دڵێکی تریش بئاڵۆزێتە گیانت و بتبات ، با ساڵانێکی زۆر دوورتریش لە گەیشتنێکی ئاشقانە بەولاتریش بڕۆیت ، هەر لێرەیت ، هەر ئەو کلیلەیت بێ تۆ کرانەوەم مەحاڵە ، بێ تۆ مەعناکان خۆیشیان بۆ ناکرێتەوە سەر زمانێکی تر ، بێ تۆ ئەرێ بێ تۆ چیم وتووە درۆیەکن لەگەل خۆیانا کراون ، چیم نووسیوە خڵەتاندنێکن ئاشکرا بوونیش پەشیمانیان ناکاتەوە ، ئەرێ گیانە تۆ هەموو چاوێکی بە گشت ڕوانینەکانا ، تۆ زمانێکیت تەواوی تەرجەمەکان لێت تێئەگەن ، ژنێکیت هەموو گەرمییەکان تۆ ئەیان توێنیتەوە و منیش هیچ ، دەی ئیتر هیچ ، چ بڵێم وەک تۆ نەبێت .
#هەوراز_چاوگی


🆔 @zsirwa

🆔 @CheshtiMjewriKurdistan

t.me/joinchat/AAAAAEFe4_k6Lu_fEpqJIg
چێشتی مجێوری كوردستان