لطمية للاربعين (مهضومات اجيناك)


ياعباس مهضومات اجيناك
فك الباب خل نتسامر اوياك


فك الباب خل نگعد سويه
اشلون تنام عينك ياشفيه
اجت بت والدك زينب سبيه
امهدم حيلهه واتريد ملگاك
ياعباس مهضومات اجيناك


امهدم حيلهه وردت تشوفك
زينب مارضت تمشي وتعوفك
تگول بياكتر دفنو اچفوفك
وصاحت ياحسافه الرمل ضماك
ياعباس مهضومات اجيناك


صاحت ياحسافه اتضمك الگاع
انته الجندلت فرسان واسباع
چا كون العمر ينشره وينباع
بعنه اعمارنه وبيهه اشتريناك
ياعباس مهضومات اجيناك


انبيع اعمارنه ونشريك بيهه
وزينب يابطل تنطيك اديهه
اگعد شوفهه وانشد عليهه
عامي اعيونهه امصابك وفرگاك
ياعباس مهضومات اجيناك


عامي عيونهه بمصابك البين
اجت وتصيح دلوني السبع وين
گلهه اشبيچ خويه وليش تبچين
ونزل اضعون خطارك عله اهواك
وياعباس مهضومات اجيناك


نزل اضعون خطارك بهيده
ملگاك الحلو زينب تريده
نايم ليش ياصنگر البيده
چا وين الكفاله والوعد ذاك
ياعباس مهضومات اجيناك


چا وين الكفاله وذيچ الوعود
انته الماتعطلك عين وزنود
زينب هاي للطف ردت اردود
جابتلك دمع واخذ الدمع هاك
ياعباس مهضومات اجيناك



✍شاعرة اهل البيت
ام هجران العمارچية
غير مبري الذمه من يمسح اسم الشاعرة او ينسب الرثاء لشخص اخر

https://t.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

حماسيه للأربعين


اجت زينب .. اجت زينب .. الكربله حزنانه
جابت الراس .. جابت الراس .. اتوصّله الجثمانه
❥━──➸➽❥💔❥━──➸➽❥💔
اجت زينب بت علي اويه اضعونهه
كون اهلهه الساعه يتلكونهه
ركد منهه الحيل ويه اعيونهه
على الناكه .. على الناكه .. امهدهده او نحلانه
جابت الراس .. جابت الراس .. اتوصّله الجثمانه
❥━──➸➽❥💔❥━──➸➽❥💔
اجت يم اكبور اهلهه بس تصيح
نوبه تعثر علكبر نوبه تطيح
اجت تشكي عند اهلهه او تستريح
امنلمصايب .. امنلمصايب .. والهضم ذبلانه
جابت الراس .. جابت الراس .. اتوصّله الجثمانه
❥━──➸➽❥💔❥━──➸➽❥💔
اجت زينب بت علي يم الكفيل
اتكله يلوالي امنلشفته دخيل
اوياي تدري بس يتامه والعليل
اتصيح عباس .. اتصيح عباس .. كافلي ما جانه
جابت الراس .. جابت الراس .. اتوصّله الجثمانه
❥━──➸➽❥💔❥━──➸➽❥💔
يا كفيلي شلون علشاطي نمت
وانه وي ذباح اخيي غربت
ابالي صوتي عليك يلكافل صحت
يا كفيلي .. يا كفيلي .. امخدره تدري آنه
جابت الراس .. جابت الراس .. اتوصّله الجثمانه
❥━──➸➽❥💔❥━──➸➽❥💔
كوم يلي اوياك اجيت الكربله
وابيمينك كومتني امدلله
هسه يم كبرك يراعي المرجله
جيت لحسين .. جيت لحسين .. او جايبه رضعانه
جابت الراس .. جابت الراس .. اتوصّله الجثمانه
❥━──➸➽❥💔❥━──➸➽❥💔

*تـــمت والـــــفضـــ🤲ـــل لله تعالى*
*بقلم ✍ الشاعره أم محمد الكناني*
*صاحبه ديوان📚أقل الوفاء في مصائب كربلاء*
*❌لايجوز شرعاً وغير مبرء الذمه كل من يحذف أسم الشاعره وينسب القصيده اله علماً أن القصيده قد سجلت بدفتر الزهراء عليها السلام❌*

https://t.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

فزاعيه للاربعين

يحادي النوك عالخوان مر بيه
ازور حسين وانصبله اربعينيه
.................
يم كبر الذبيج ارجوك وديني
اريد عليه اون ويسمع ونيني
مشتاكه عله الخوان تدريني
واكله من اليسر ردت المسبيه
....... . .
من بعد السبي ردت الحزنانه
ومشتاك الدليل ينوح لخوانه
راحت والاخو مانصبت احزانه
وضلت نارها بالكلب سعريه
..........
ردت لبن ابوها بضيمها تكله
تمنت يكعد الوالي وتسولفله
ياهظم الوكت كل حيل ماخله
اكعد شوفني من الضيم محنيه
..........
تمر بحسين وترد عله كافلها
تكعد عالكبر ودموعها تهلها
ياخوان روحي الضيم نحلها
شلون ايام صعبه مرت عليه
..........
هذا حالها وهايه مأ سيها
يشيعه بالدمع كومو نواسيها
بصرخات الحزن زينب نلاكيها
ندك عالراس والدمعات مجريه

✍أم زينب كربلاء غير مبري الذمه من ياخذ الكلام وينسبه له او يحذف الاسم

https://t.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

فزاعيه للاربعين


رديت من درب اليسر
تعبانه هاي لعايله


والحيل كاضي يالگمر
بحزاني خلصت العمر
مانمت الليل الي اليمر
والراس ويه العايله


غدراني عذبني الوكت
والدمعه من دم وتكت
تعبانه روحي هالگضت
والعين لجلك هامله


عباس انهظ كافلي
رديت خويه لمحملي
لاانت لاگامو هلي
خلصانه خويه وناحله


والراس جبته يالكفل
ياريت يمك هم اظل
مفگود مني جم طفل
هاي لاراضي ام البله


اشكيلك اهموم الگلب
گطعيت جم درب بدرب
ماتگعد تگوم شعجب
رديت ظيم محمله


خادمة الزهراء والسيده رقيه ع
✍️الشاعره ام زهراءالفاطميه
لايجوزحذف الاسم أسم الكتاب لبيك يازهراء الجزءالثالث
٧صفر/ سنة هجري ١٤٤٧نسالكم
الدعاءلي ولوالدي🙏🙏 اللهم عجل
لوليك الفرج 🙏🙏

https://t.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

قصيده ثقيله للاربعين لسان حال السيده زينب عليها السلام
=========


جيتك للگبر بحزان

من الهظم محنيه

راح الحيل خويه حسين

صرت امشي اعلى عوچيه

=========

محنيه الضهر ياخوي وتوچه اعلى عصاتي

حسرات شكثر بلروح
تذوب اجبال حسراتي

اگعد خل اسولفلك
كل هظمي ومعاناتي

وحگ شيبك يماي العين اجيتك حيل مابيه

➖➖👁️‍🗨️➖➖

جيت مگبعه بهموم
ودرب الشام تعبني

گوم وناشد اعلى الحال
ماتگعد يخال ابني

دهري مانصح وياي
بفگد الوالي دولبني

رديت بهظم يحسين
نحيله بدمعه مجريه

➖➖👁️‍🗨️➖➖

شسولفلك يبعد الروح صعبه حيل سالفتي

ماضن بعد عله وظيم مثل احزاني وعلتي

تهدم اجبال خويه حسين لو تسمع بعد ونتي

وجًرن حيل خويه حسين لچمات الدهر بيه

➖➖👁️‍🗨️➖➖

اريد اعتب على الكفال وادري للعتب يسوه

فراگك ياشريچ الروح يخويه بحالي شسوه

على نهر المنايا هناك نسينه چلمة الخوه

اصبر والصبر ياخوي يبيد الحيل تاليه

➖➖👁️‍🗨️➖➖

انشد عن مصاب البين يمن تجري وي انفاسيى

الهوه لو مر يضي العين يجرح گلبي وحساسي

الزمن مارحم بيه دوم ظالم ياهلي وقاسي

هلي راحو ضحايه هناك بلطف وكت ظهريه


=========
خادمة ال البيت الحجيه ام علي البصره نسألكم الدعاء

الحجيه ام علي البصره بخدمة خدام الحسين عليه السلام
لانجيز حذف اسم الحجيه ام علي من قصائدها
او ينسب الكلمات لنفسه
غير مبرء للذمه امام الله والزهراء ع

https://t.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك