الإعلانات قادمة للتلاجات 😶

سامسونج أعلنت إنها هتبدأ تعرض إعلانات على شاشات ثلاجاتها الذكية Family Hub. الإعلانات هتظهر لما التلاجة تكون في وضع الخمول، والمستخدم يقدر يقفل إعلان معين ومش هيشوفه تاني.

التحديث ده هيوصل للتلاجات عن طريق النت، ومفيش طريقة توقف الإعلانات إلا لو التلاجة اتفصلت عن النت، وده معناه إن بعض المميزات الذكية هتتعطل.

سعر التلاجات دي غالي أصلا وبيوصل لـ 3,500 دولار، فمش منطقي حد يدفع المبلغ ده وبرده يتعرضلهم إعلانات!

تطبيق Signal دلوقتي أصبح بيدعم عمل نسخة احتياطية من الشات الخاص بيك ☁️

تطبيق المحادثات المشفرة لأول مرة هيدعم النسخ الاحتياطي بشكل مجاني لكامل تاريخ الرسائل + آخر 45 يوم من ملفات الميديا. لو عاوز تخزن كل ملفات الميديا بتشترك في خدمة مدفوعة بـ 2$ شهريا.

البيانات بيتم تخزينها مشفرة بالكامل حتى بياناتها الوصفية، وبيتم توليد مفتاح لاستعادة البيانات بيكون موجود فقط على موبايلك.

شركة مايكروسوفت نشرت من شوية تنبيه عن حدوث قطع في بعض كابلات الإنترنت البحرية اللي بتمر عبر البحر الأحمر وإنه هيكون فيه تأثير على خدماتها السحابية Azure.

الكابلات دي بتمر عبر مصر وبتربط أوروبا بآسيا وإفريقيا، والمنطقة دي جزء من المنطقة اللي بيتم مهاجمتها من الحوثيين 🤔