Vashingtonda o’tgan “C5+1” formatidagi sammit media jamoamizdagi har bir odamni tobladi.
Shu vaqtgacha qancha tadbirlarda ishlagan bo’lsam, bu safar faoliyatim davomida ilk marta fotoekipirovkalarimni siyosiy muloqotlar o’tadigan bino eshigi tashqarisida qoldirib, 2 ta telefon bilan ichkariga kirdim. Sammit tartib-qoidalariga asosan faqatgina 1 nafar rasmiy fotograf ishlaydigan bo’ldi. Mening chekimga esa iloji boricha sifatliroq kadrlarni telefonda tayyorlash tushdi. Boshida juda qo’rqdim, tizimda ism-familiyam topilmagach, ichkariga kirishdan umidimni uzdim. Ammo Oq uy xodimi “Let me check one more time”, deb byuroga kirib ketdi. Birozdan so’ng qo’limga pasportimni tutqazib “I have bad news”, dedi. Pasportni ochsam, ichida ruxsat beyji. Uning yuzida esa tabassum. Hazillashibdi, tizimda ismim chiqdi va yugurib tekshiruvga kirib ketdim. Aziza opa hayajon va havotir bilan “Madina, narsalaringni oldim, havotirlanma”, deb eshik tagida kutib turardi.
Tekshiruvchi xodim:
- Your president?
- Shavkat Mirziyoyev
- Your delegation’s photographer is a woman? Unusual. Come in
- Thank you!
Bizni “Yashil xona”ga olib kirishdi. Eshik tagida kim birinchi bo’lib chiqsa, shu odam asosiy zalda eng zo’r syomka pozitsiyasini oladi. Ya’ni chaqqon va abjirlargina. Hamma eshik tagida, ofitserlar ortga chekinib ichkariga kirishni so’rashadi. Oq uyda foto va videoga taalluqli ayrim qoidalar borligi sabab bizni ichkariga olib kirgan inspektordan so’radim: “Can I take a photo?”, “Yes!”. Rasm oldimu, tezroq eshikka yaqinlashishimiz kerakligini angladim. Eshiklar ochildi, jurnalistlar-u tasvirchilar asosiy zalga qarab katta tezlikda yugurdik.
Kirgach, xayolimda faqat bir fikr: “OMG, tezroq kontent yasab uzatishim zarur!”. Uzunroq maxsus zinachani topib, ustiga chiqib oldim. Yuzlarini faqat xorij matbuotiyu, saytlarida ko’rgan AQSh siyosatining hozirgi davr muhim figuralari bir stol atrofida jam edi. Ularning qarama-qarshi tomonida esa Markaziy Osiyo davlatlari yetakchilari. Prezidentimizni izlab Trampning qarshisidan topdim.
Qisqa vaqtda ko’proq kadr olib chiqishim kerak. Rejalarimni bajarib, Aziza opa postlarida yozgandek, o’yladim “professional fotograf sifatida shuncha yil tadbirlarda tarbiyalab kelib, ishonib, bugun mana shu qisqa tarkibdan joy berib shunday katta va muhim tadbirni yoritishga olib kirgan o’z ishining ustalaridan minnatdor bo’lishim kerak”. Prezident xotin-qizlarga ishonish, muhim vazifalarni topshirish haqida nutqlarida ko’p gapiradilar. Prezidentimizning Poollarida ularning har bir tadbirlarini tarixga muhrlab yurish katta faxr 💪 Markaziy Osiyo davlatlari yetakchilari media jamoalari orasida aynan bizning jamoada yagona female photographer bo’lish yetkazib berish mushkul tuyg’u ☺️
Yana katta tadbirlarda ko’rishguncha! 💪
0
Показать ещё
