Bu safargi “Kelajak soati” darslari xavfsiz hayot mavzusida bo‘ldi. Bog‘cha, maktab, OTM kesimida tashkil etilayotgan darslarga qiziqish, hamkorlik takliflari kengayib borayotgani quvonarli holat.

Masalan, birgina bog‘chalarning o‘zida bu safargi mavzularni tashkil etishda Maktabgacha va maktab ta’limi vazirligiga eng yaqin hamkor Ichki ishlar vazirligi Jamoat xavfsizligi departamenti Yo‘l harakati xavfsizligi xizmati bo‘ldi. YHXX jamoasi xodimlari respublikamizning barcha hudud, tumanlaridagi MTT’ga borib, dars o‘tib berdi.

Bolajonlarga ko‘chada harakatlanishda nimalarga e’tibor berish kerakligi, xavfsizlik qoidalari oddiy, sodda tilda, amaliy mashg‘ulot va qiziqarli kontentlar yordamida tushuntirildi. Hududlarda olingan videolarni jamlagan mana bu rolikni ko‘rib, jarayon qanday tashkil etilganini his etishingiz mumkin.

Farzandlarimiz xavfsizligi barchamiz uchun juda muhim masala. Bunda ota-onalar, maktabgacha ta’lim tashkilotlari, YHXX bilan hamkorlikda ishlashining samarasi katta. Albatta, bu mavzu bitta mashg‘ulot bilan cheklanmaydi. Noyabr oyi MTT’da xavfsizlik oyligi hisoblanadi. Mashg‘ulotlar davom etadi, oy davomida bolajonlarga ko‘chalarda harakatlanish, bunda nimalarga e’tibor berish kerakligi haqidagi qoidalar tushuntiriladi.

Shu o‘rinda hamkor tashkilotlardan ham minnatdormiz. Kelgusi darslarimizda ham bu an’analar davom etadi. Umuman olganda Prezidentimiz tashabbusi bilan barcha bog‘cha, maktab, OTM’da tashkil etilayotgan mazkur darslar ta’lim hamda boshqa sohalar, ziyolilar, jamoatchilik o‘rtasida mustahkam ko‘prik vazifasini bajarmoqda.

“Kelajak soati”ni kuzatib boring. Loyihaning ijtimoiy tarmoq sahifalari:

Instagram | Telegram | Youtube

#YUNESKO #tashabbuslar

Bugun Prezidentimiz Shavkat Mirziyoyev Samarqandda o‘tayotgan YUNESKO Bosh konferensiyasi 43-sessiyasining ochilish marosimida nutq so‘zladi.

Davlatimiz rahbari nutqida ta’lim sohasiga oid muhim tashabbuslarni ilgari surdi.

Prezidentimiz ma’lum qilganidek, respublikamizda YUNЕSKOning 8 ta kafedrasi, 24 ta hamkor maktabi faoliyat ko‘rsatmoqda. Toshkent va Farg‘ona YUNЕSKOning ta’lim shaharlari Global tarmog‘idan joy oldi. Shuningdek, yuzlab madaniy meros obyektlari ilg‘or texnologiya va xalqaro standartlar asosida restavratsiya qilindi.

“Samarqanddagi Bosh konferensiya doirasida yurtimizda qator qo‘shimcha tadbirlar o‘tkaziladi. Jumladan, ko‘hna Buxoroda ilk marta zamonaviy san’at biyennalesi bo‘lib o‘tmoqda, poytaxtimizda YUNЕSKO shafeligida Maktabgacha ta’limni rivojlantirish mintaqaviy markazi ochiladi, Abu Rayhon Beruniy nomidagi YUNЕSKO – O‘zbekiston xalqaro mukofotining sovrindorlarini taqdirlaymiz, muzeylar faoliyatida sun’iy intellektning o‘rni va ahamiyatiga bag‘ishlangan xalqaro anjuman tashkil etilmoqda, oliy ta’lim sohasidagi kvalifikatsiyalarni tan olishga oid Global konvensiyaga ham qo‘shilamiz”, dedi Prezidentimiz.

Davlatimiz rahbari Jahon professional ta’lim sammitini o‘tkazish, “Sun’iy intellekt – maktab” namunaviy loyihasini amalga oshirish, Sun’iy intellekt etikasi bo‘yicha xalqaro ekspertlar anjumanini o‘tkazish kabi muhim tashabbuslarni taklif etdi.

Ma’lumot uchun: konferensiya so‘nggi 40 yil ichida ilk bor YUNЕSKO Bosh qarorgohidan tashqarida – ko‘hna va hamisha navqiron Samarqand zaminida bo‘lib o‘tmoqda.

@hilola_umarova

Prezidentimiz Shavkat Mirziyoyev “Kasbiy ta’lim tizimida boshqaruv samaradorligini oshirish chora-tadbirlari to‘g‘risida”gi Farmon va “Kasbiy ta’lim tizimida islohotlarni amalga oshirish chora-tadbirlari to‘g‘risida”gi Qarorni imzoladi. Sohaga oid yangiliklar talaygina.

Kasbiy ta’lim tizimini 2030-yilga qadar isloh qilishning asosiy maqsadli ko‘rsatkichlari belgilandi. Ular: xalqaro va qo‘shma ta’lim dasturlari joriy etilgan texnikumlar sonini kamida 250 taga; 9-sinf bitiruvchilarining kasbiy ta’lim bilan qamrovini amaldagi 29 foizdan 50 foizga; kasbiy ta’lim tizimida dual ta’lim ulushini amaldagi 9 foizdan 40 foizga; kasbiy sertifikatga ega ishlab chiqarish ta’limi ustalari ulushini 30 foizga; xorijda malaka oshirish va stajirovka o‘tash dasturlarida ishtirok etgan pedagoglar sonini 100 nafardan 2 500 nafarga yetkazish.

Farmonga ko‘ra, Oliy ta’lim, fan va innovatsiyalar vazirligi huzurida Kasbiy ta’lim agentligi tashkil etildi. Agentlik markaziy apparati boshqaruv xodimlarining cheklangan shtatlar soni 70 ta etib belgilandi. Ushbu shtat birliklari Oliy ta’lim, fan va innovatsiyalar vazirligi tizimidan 30 ta, Maktabgacha va maktab ta’limi vazirligi tizimidan 25 ta, Kambag‘allikni qisqartirish va bandlik vazirligi huzuridagi Kasbiy ko‘nikmalar markazining 15 ta shtat birligi hisobidan shakllantiriladi.

Agentlik:

➖ texnikumlar faoliyatini muvofiqlashtirish va kasbiy ta’lim sohasini boshqarishga mas’ul bo‘ladi;

➖kasbiy ta’lim dasturlari mazmuni, malaka darajalari, o‘qitishning minimal muddatlari, bitiruvchilar bilimini baholash mezonlari hamda o‘quv-metodik ta’minotga talablarni belgilaydi.

➖Kambag‘allikni qisqartirish va bandlik vazirligi tomonidan “vaucher” tizimi bilan qamrab olinmagan shaxslarni kasbga o‘qitadi.

➖Migratsiya agentligining xorijiy ish beruvchilar ehtiyojidan kelib chiqib bergan buyurtmalari asosida fuqarolarni kasbga va xorijiy tillarga o‘qitadi.

Dual ta’limni rivojlantirish bo‘yicha ham bir qancha o‘zgarishlar bor. 2026/2027-o‘quv yilidan boshlab dual ta’lim shaklida tahsil olayotgan o‘quvchilarga maxsus platforma orqali stipendiya to‘lash yo‘lga qo‘yiladi. Har oylik stipendiya BHM bir baravari miqdorida to‘lanadi.

Texnikumlar Ta’lim sifatini ta’minlash milliy agentligi tomonidan yuritiladigan milliy reyting natijalari asosida rag‘batlantiriladi. Milliy reyting 2026-yildan boshlab har o‘quv yili yakuni bo‘yicha yuritiladi hamda unda eng yuqori o‘rinni egallagan 50 ta texnikumning har biri BHM 3 000 baravari miqdorida rag‘batlantiriladi. 2026-yildan boshlab har yili texnikumlar o‘quvchilari o‘rtasida O‘zbekiston Respublikasi Prezidenti sovrini uchun “Kasbiy mahorat milliy tanlovi” o‘tkaziladi.

Shuningdek, Prezidentimiz qarori bilan 2030-yilga qadar texnikumlar faoliyatini tugatish, ularga tegishli yer uchastkalari, bino va inshootlar hamda boshqa ko‘chmas mulk obyektlarini xususiylashtirishga moratoriy joriy etildi.

Ikkala hujjatdagi o‘zgarish, yangiliklarni bitta postda jamlash imkonsiz. Hurmatli tizim xodimlari, soha vakillari hujjatlar bilan batafsil tanishib chiqing, tushunib-o‘zlashtirib oling. Vazirliklar saytlari, ijtimoiy tarmoqlarida ham batafsil ma’lumotlar doimiy tarzda e’lon qilib boriladi.

@hilola_umarova