.

مو بس الضرب والاهانات المستمرة تسبب عقد نفسية

شايفين الي يخلون الطفل شماعة مشاكلهم؟

حتى لو بدون اي ضرب وارقى لبس واحسن اكل

واقصد بي الطفل الصغير الي بعده ماعنده فلاتر ومايكدر يمنع تاثير الكلام عليه،

تكوم وتكعد وتكول هو شطيح حضي غير من خلفتكم

هو اني جنت اخبل بس جبتكم راح الجمال راح الجسم

اويلي حضي اني شحصلت منهم

لو تخلي الطفل كبالها وتبقى تشكي وتبجي لاي سبب

لو من اي مشكله تصير بين الاب والام يبدون يصرخون باسوا العبارات الي تتهتم الاطفال بسوء العلاقة بيناتهم

والي تداري الطفل بس كله بالمنيه واني سويت وكبرت وعلمت !!

كلها تخلي عند الطفل شعور بان هو شخص سئ يؤذي من حوله وخصوصا الي يحبهم وان هو لايستحق الاشياء الجيده وانما كل شئ جيد حصل له قابله اذى من طرف اخر

يعيش وهو ينظر لنفسه بنظرة دونية

والاسوا من كل ماسبق هو ان تبدي تبتزه عاطفيا حتى لو كبر، وتبدي تكله اذا تزوج فلانه يعني انو تريد تجلطني وتطيح حظي

وتبدي مسرحيات الاغماء والتعب والهستريا عند سماع اي مخطط يريد يسوي ابنها / بنتها وهو مو على مرامها

بدل النقاش العقلاني والحوار البناء يكون التعامل كله ابتزاز عاطفي ومحاولات للسيطرة حتى لو على حساب مصلحة الابن والبنت

واذا انت صدك تحبني ادخل فلان كلية وارفع راسي بين الناس! ووووو تطول القائمة ولاتنتهي

وهاي الكلمات والسخط والابتزاز الي يوجه للانسان من الطفولة الى ان يكبر مو مره ومرتين وانما اسلوب حياة يتبعه الكثير للاسف

وصدق من قال ، اذى اللسان احد من السيف 🗡️

د.اسماء

.

.