•
✉️ من رسائل البوت:
ما شاء الله ولا قوة إلا بالله، حفظكم الله وأمسك عليكم النِعم..

السلام عليكم ورحمة الله وبركاته
الحمد لله دا حصِيلة شهرين ونص من الإلتزام ب "أوراد السنة واقفة عليك بكام؟!"

الحمد لله رُزقت المداومة على النوافل كاملة من أول يوم الحمد لله، وعلى قيام الليل يومياً الحمد لله كنت بادئة بركعتين والوتر الحمد لله في زيادة سواء في عدد الركعات أو في القراءة بحاول أقرأ ب 100 آية في أغلب الأوقات الحمد لله

في وِرد القرآن الحمد لله كنت في الأول بحاول اثبت جزء دلوقتي الحمد لله 3 أجزاء واحياناً أكتر

الأذكار الحمد لله كنت عايزة اثبت ألفية صلاة على النبي كل يوم في البداية الحمد لله دلوقتي ربنا فتح عليا في باب الذِكر من واسع كرمه ما بين استغفار وتسبيح وأذكار الصباح والمساء وأذكار بعد الصلاة وقبل النوم، و وِرد التهليل الحمد لله مش فاكرة يوم فوته بعد إنقطاع سنين الحمد لله

الصيام الحمد لله مكنتش دايمًا بصوم الإثنين والخميس بس كنت كل ما بقدر بصوم و كنت بختار الأيام اللي يجتمع فيها يوم الإتنين والخميس مع الأيام البِيض

الحمد لله رُزقت بنعم كثيرة منها حفظ قرآن والمجاهدة في إصلاح الصلاة و وِرد من السُنة الحمد لله بكرم من ربنا

من المُعينات اللي فادتني كتير:
• الإستعانة بالله عز وجل وكثرة الدعاء بالتوفيق لإتمام الأوراد كاملة والزيادة والفترة الأخيرة ببدأ اليوم بوِرد من الحوقلة

• المكابدة والمجاهدة أهون بكثير من الحرمان من نعم الله
المجاهدة صعبة مفيش اختلاف على دا بس أفضل من إني أُحرم من فضل ربنا وكرمه سبحانه وتعالى، غير إن لذة قهر النفس في أخر اليوم بعد ما وُفقت لإتمام أغلب أورادك تُنسيك ألم المجاهدة

• ما قل وكفى خيرٌ مما كثر وألهى
من القواعد النافعة جدًا والله لمَن عمل بها، العبرة مش إني اسمع 20 درس في اليوم واشترك في 3 أو 4 دورات في نفس الوقت ولا انتفع بما فيهم واشتت نفسي، لكن والله درس في الأسبوع واتقنته كويس أفضل بكثير

• الصبر وعدم استعجال الإيمان
واحدة واحدة بتوفيق ربنا والصبر والمجاهدة هتلاقوا نتيجة تعبكوا ولكن دا مش من يوم وليلة لازم شوية وقت

ربنا يوفقنا جميعًا للخير ويعلمنا ما ينفعنا ويبارك لنا فيه ويزيدنا علمًا نافعاً ويهدينا إلى ما فيه الخير والصلاح اللهم آمين

•

ما شاء الله ولا قوة إلا بالله..