Emin Əmrullayev: "Peşə təhsili sahəsinə dövlət tərəfindən ayrılan vəsait ilbəil artır"

“Peşə təhsili üzrə 2026-cı ilin dövlət büdcəsində 125,5 milyon manat vəsait nəzərdə tutulub. Bu, 2025-ci illə müqayisədə 23,3 milyon manat və ya 29 faiz artım deməkdir. Hazırda 76 peşə təhsili müəssisəsində yüksəldilmiş ixtisas tədrisi həyata keçirilir”.

Milli Məclisdə bu gün keçirilən iclasda çıxış edən nazirin sözlərinə görə, peşə təhsili müəssisələrinə qəbul olunan tələbələrin sayı son illərdə iki dəfə artıb: “Ümumilikdə tələbə qəbulu 27 min nəfəri ötüb. Onların 23,7 mini, yəni 84,3 faizi dövlət sifarişi əsasında təhsil alır."

Bunu Milli Məclisdə bu gün keçirilən iclasda elm və təhsil naziri Emin Əmrullayev deyib.

Nazir bildirib ki, məktəbəqədər təhsilə cəlb olunan uşaqların sayının artması çox sevindirici haldır. Sadəcə, məktəbəqədər müəssisələrə gedən uşaqların nailiyyətlərini təxminən 11–12 ildən sonra, yəni həmin uşaqlar buraxılış imtahanlarına gələndə müqayisə etmək mümkün olacaq, amma ilkin təhlillər hələlik aparıla bilməz.

Nazir Emin Əmrullayev: "Təhsildə keyfiyyətin formalaşmasına iki əsas amil təsir göstərir – müəllimin peşəkarlığı və ailə mühitinin rolu"

“Uşağın təhsilə münasibətinin formalaşmasında ailə və ev mühiti az rol oynamır. Valideynin təhsilə yanaşması, uşağın öyrənməyə motivasiyası prosesin uğuruna birbaşa təsir edir. Ona görə də biz yalnız məktəb daxilində deyil, ailə mühitində də təhsilə dəyər verən bir mədəniyyəti təşviq etməliyik”.

Milli Məclisin iclasında müəllim əməyinin təşkili və yeni iş modeli barədə məlumat verən nazir Emin Əmrullayev bildirib ki, məqsəd müəllimlər üçün daha rəqabətli, dayanıqlı və ədalətli əmək sistemi formalaşdırmaqdır:
“Yeni model müəllimləri məcbur etməyəcək, tamamilə könüllü və rəqabətə əsaslanacaq. Bu sistemdə müəllimlər daimi işlə təmin olunacaq və onların əməyinin qarşılığı daha yüksək olacaq. Belə müəllimlərin dərs yükü həftədə 18–24 saat təşkil edəcək. Qalan vaxtlarını isə onlar metodik hazırlıq, şagirdlərlə fərdi iş, layihələrdə iştirak kimi fəaliyyətlərə sərf edəcəklər”.

Emin Əmrullayev: “Təhsil sahəsində ən vacib məsələlərdən biri infrastruktur quruculuğudur”.

Milli Məclisdə noyabrın 13-də keçirilən iclasda çıxış edən nazirin sözlərinə görə, 2003–2025-ci illər ərzində 3600-dən çox məktəb binası tikilib və ya əsaslı təmir olunub:
“Bu tədbirlər nəticəsində 1,3 milyondan çox şagirdin təhsil şəraiti əhəmiyyətli dərəcədə yaxşılaşdırılıb. Təkcə 2025-ci ildə dövlət vəsaiti və sahibkarlıq təşəbbüsləri hesabına 47 təhsil müəssisəsində tikinti-quraşdırma işləri aparılıb, 20 təhsil müəssisəsində əsaslı təmir başa çatdırılıb”.

O qeyd edib ki, dövlət vəsaiti hesabına 9 yeni təhsil müəssisəsi istifadəyə verilib, 4 müəssisədə isə təmir-bərpa işləri davam etdirilir. Sahibkarların dəstəyi ilə 2 yeni məktəb binası tikilib, 8 təhsil müəssisəsində təmir işləri həyata keçirilir.

2026-cı ilin dövlət büdcəsində təhsil xərcləri üçün 5 milyard 15 milyon manat vəsaitin ayrılması nəzərdə tutulur.

"Bu, ümumi büdcənin 8,3 faizini təşkil edir. Sözügedən rəqəm 2025-ci illə müqayisədə 85 milyon manat və ya 1,7 faiz çoxdur.
Son 5 il ərzində dövlət büdcəsindən təhsil sektoruna ayrılan vəsait 1,6 dəfə artıb. Bu artımlar, əsasən, təhsil sahəsində çalışanların sosial rifahının yaxşılaşdırılması və əməyin ödənişi ilə bağlı xərclərin maliyyələşdirilməsinə yönəldilib".

Bu barədə Elm və təhsil naziri Emin Əmrullayev noyabrın 13-də Milli Məclisdə Aqrar siyasət, Ailə, qadın və uşaq məsələləri, Elm və təhsil komitələrinin birgə iclasında çıxışı zamanı məlumat verib.