موشح للأربعين ( والدمع بعيونهه )


هاي زينب ... والدمع بعيونهه
گوم ياعباس نزل ضعونهه


گوم نزلهه يسبع الگنطره
زينب امن الشام اجت للمگبره
وبضهرهه اسياط خولي امكسره
والحبل خله اثر بمتونهه
هاي زينب ... والدمع بعيونهه


الحبل بمتونهه شخله الحبل
زينب امن الشام ردت عالهزل
خارجيه اخلافك يگلهه النذل
والسبيه اعداكم يسمونهه
هاي زينب ... والدمع بعيونهه


الچانت ابجالك اسمهه ام الخدر
شافت اشكال المصايب باليسر
گوم لختك وانفض اتراب الگبر
ياعجيد الراي شوف شلونهه
هاي زينب ... والدمع بعيونهه


ياعجيد الراي شوف شحالهه
يابس امن اصوابكم دلالهه
اجت بالگوه تجر اذيالهه
اتصيح حيهم رادت اتلاگونهه
هاي زينب ... والدمع بعيونهه


اتصيح حيهم وين اخوتي وعزوتي
جايه امن الشام والكم جيتي
حيلي مهدوم وثجيله هضمتي
عن هضمهه واجب تنشدونهه
هاي زينب ... والدمع بعيونهه


واجب اتگولون يامية هله
امدللتكم هاي ردت ناحله
عال بيهه ودولباهه حرمله
ياحسافه الغاليه تعوفونهه
هاي زينب ... والدمع بعيونهه


ياحسافه امن ايدكم زينب تضيع
تنشد اعله حسين ووليده الرضيع
اليوم اجتكم جايبه الراس الگطيع
تعتب وحسبالهه تسمعونهه
هاي زينب ... والدمع بعيونهه


عاتبتكم والعتب بيمن يفيد
لانحر عدكم ولاعدكم وريد
وگفوها بمجلس الظالم يزيد
خاب رجواها وجميع ضنونهه
هاي زينب ... والدمع بعيونهه



✍شاعرة اهل البيت
الملة ام هجران العمارچيه
غير مبري الذمه من يحذف اسم الشاعرة او ينسب الرثاء لشخص اخر


https://t.me/amhejran12345

لطمية للأربعين ( حسبالي اشوفه )


حسبالي اشوفه      حسبالي اشوفه
لبن امي اجيت بشوگ     حسبالي اشوفه
واشلون اعوفه      واشلون اعوفه
واشلون ارد للدار     واشلون اعوفه


حسبالي اشوف حسين     وبلهفه اگله
من الحبل والسوط      بمتوني عله
نومك بنص الگاع     موش بمحله
واعتاب اليه اوياك      بالك تمله
مابيه اروفه      مابيه اروفه
جرح الگلب وجاع     مابيه اروفه


جرح الگلب وجاع      مابيه اضمده
حسبالي ابو السجاد      يگعد واگعده
واحچيله عالذباح     سبني وتعده
ذاك الشمل ياحيف      ماي وتبده
والشام اطوفه     والشام اطوفه
مايرضه اطب ليزيد     والشام اطوفه


مايرضه اطوف الشام     وادخل مجالس
للطف رجعت اليوم      دلالي يابس
لابيه نهضه وحيل     لاعندي واهس
سلبوا من حسين     حتى الملابس
بسكينه خوفه      بسكينه خوفه
من اليسر والضيم     بسكينه خوفه


من اليسر والضيم     مرعوبه بته
راس الغريب حسين      جبته الرگبته
لاني الحچيت اوياه     لاني السمعته
حامي الضعن عباس     صحته وندهته
گطعوا چفوفه     گطعوا چفوفه
عالمشرعه العدوان      گطعوا چفوفه


عالمشرعه العدوان     گطعوا يمينه
واگبالي بس الراس     ماهيه عينه
من اهد يوم الطاح     وحشه الضعينه
بس العليل اوياي     يجهر ونينه
شاهر اسيوفه      شاهر اسيوفه
يفتر علينه البين     شاهر اسيوفه



✍شاعرة اهل البيت
الملة ام هجران العمارچيه
غير مبري الذمه من يحذف اسم الشاعرة او ينسب الرثاء لشخص اخر


https://t.me/amhejran12345