#جديدددددد

#موعضه او نعي عن الام




بلعين حط امك يلبعدها اوياك
وديربالك تغلط بيوم وياها

رحمه الوالده الك ربك ايكول
هواي داريها وجازي رباها

شيلها اعلراس وافديلها العين
والف هنياله الابد ما زعلاها

مثل ما تعبت وسهرت اعليك
ردلها التعب بأحسان وارعاها

كون امك سعيده بتالي السنين
بفعالك تفتخر وتقر عيناها

احذر لا تطيح دمعه من اعيونها
حنينه الوالده وينفع دعاها

اذا رايد الجنه والله يرضه اعليك
خلي امك بعينك و دﯗر رضاها

تسوه الدنيا كلها والكون والبيه
وموحلوه الحياة صدكني بلاها

حلات البيت بي ام وحضن دافي
مثل شمعه واتنور الدار بضواها



#للشاعرة_زينب_المالكي

#من ديوان ثوب الحزن الخاص للحبايب


غير مبري الذمة لكل من يتلاعب بلقصايدة والكلمات ويحذف اسم الشاعره



https://t.me/amadamalmalke2

#جديددددد

#قصيدة ثكيله للأم








ضمي العبايه ابسـاع ضـميـها
تـلـكيـن من امج عـطر بيـــها

كلمـا تحـــن اعـيونج
شمريها فوك امتونج
ضمي العبايه // ضمي العبايه

..............

هاي العبايه البيها من امج حنان
ذكرى ضلت من بعد ذاك الزمان
البيت خالي من الحنينه وكل مكان

هيهات تغفى اجفونج
شمريها فوك امتونج
ضمي العبايه // ضمي العبايه

..........

الفاكده امها ولا تنام اعيونها
تبجي محد ناشداها اشلونها
وزركه من كثر اللطم يمتونها

وياهو اليكلها اشلونج
شمريها فوك امتونج
ضمي العبايه // ضمي العبايه

.................

منهو الينشادها ويشوف اشبيها
مهضومه تبجي وياهو المبجيها
ومكسور خاطرها الهضم ماذيها

والاهـل ميفكدونج
شمريها فوك امتونج
ضمي العبايه // ضمي العبايه
....................


لو ضاك خلكج وامج اتريديها
طلعي العبايه وعلصدر خليها
تشمين كل عطر المحنه اعليها

الله يكون ابـعونـج
شمريها فوك امتونج
ضمي العبايه // ضمي العبايه

.....................

الله يساعدها التضل اوحيده
امرافكه النوح وعله امها اتزيده
وادي النجف كلش دروبه ابعيده

مره بسنه ايودونج
شمريها فوك امتونج
ضمي العبايه //ضمي العبايه

...........


#للشاعرة_زينب_المالكي

#من ديوان ثوب الحزن الخاص للحبايب


غير مبري الذمة لكل من يتلاعب بلقصايدة والكلمات ويحذف اسم الشاعره



https://t.me/amadamalmalke2