Азизҷони Раҳмоналӣ, сокини 34-солаи ш.Душанбе, аз ҷониби кормандони ШВКД-1 дар н.Фирдавсӣ, бо гумони қаллобӣ дастгир гардид.
Номбурда аз шаҳрвандон бо ваъдаҳои гуногун маблағҳои калони пулӣ гирифта, онҳоро фиреб додааст.
Аз ҷумла, аз як нафар сокини пойтахт бо ваъдаи ба тиҷорат машғул шудан, дар умум 146-ҳазор сомонӣ гирифта, онро ба манфиати шахсиаш сарф намуда, ба ҷабрдида зарари калони пулӣ расонидааст.
Айни замон нисбати Азизҷони Раҳмоналӣ бо моддаи 247 Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, тафтишот идома дорад.

Дастгир гардидани мард барои куштори пиисар

Зимни баргузор намудани чорабиниҳои оперативӣ-ҷустуҷӯӣ аз ҷониби кормандони милитсия марди 40-солаи сокини шаҳри Турсунзода бо гумони қасдан расонидани зарари вазнин ба саломатӣ дастгир карда шуд. 
Гумонбаршаванда 26-уми июли соли 2025, тахминан соати 10:00, писари ноболиғи 15-солааш барои содир намудани ҷинояти дуздии маблағҳои пулиаш дар ду ҳолат, бори аввал моҳи майи соли 2025 ба миқдори 800-сомонӣ, бори дуюм аввали моҳи июли соли 2025 ба миқдори 600-сомонӣ гумонбар донистааст. Барои ошкор ва иқрор намудан бо истифодаи зӯроварӣ писари ноболиғашро ба воситаи нақлиёти  тамғаи “Тико”, савор карда ба ҷойи беодам, ба заминҳои ҳудуди ҷамоати деҳоти Навободи шаҳри Турсунзода бурда аз ноқили тахминан 2 (ду) метра истифода бурда аз пойи писараш баста, самти дигари ноқили мазкурро дар қафои воситаи нақлиёташ баста тахминан 100-метр кашола кардааст.
Дар натиҷа ҷабрдида ҷароҳати вазнин ҷисмонӣ бардошта дар манзили истиқоматиаш ба ҳалокат мерасад. 
Нисбати гумонбаршаванда бо қисми 3 моддаи 110 Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, тафтишот идома дорад.

Санаи 28 июли соли 1858 ҳамчун рӯзи оғози истифодаи дактилоскопия дар таърихи криминалистика шинохта мешавад.
Нахустин маротиба нақши ангуштро як намояндаи маъмурияти бритониёӣ дар Ҳиндустон — Уилям Гершел ҷорӣ кард. Ҳангоми кор дар идораи давлатӣ, ӯ мушоҳида намуд, ки бархе аз сокинони маҳаллӣ бо номи дигарон кӯшиши гирифтани кӯмакпулӣ мекарданд.
Барои пешгирӣ аз чунин ҳолатҳо, Гершел қарор дод, ки дар квитансияҳои пардохтӣ ва дафтари махсус аз шаҳрвандон нақши ангушт гирифта шавад. Ин амал натанҳо қаллобиро коҳиш дод, балки заминаи илмии дактилоскопия-санъати шинохти шахс тавассути нақши ангуштро гузошт.
Ҳамин тавр, аз ҳамин рӯз дактилоскопия ҳамчун усули боэътимоди муайянсозии шахс дар соҳаи ҷиноятшиносӣ (криминалистика) ворид гардид ва то имрӯз дар тамоми ҷаҳон васеъ истифода мешавад.

Нашри эълонҳои бардурӯғ дар бораи ба иҷора додани манзили истиқоматӣ, ба яке аз усулҳои маъмулии қаллобон табдил ёфтааст. Гарчанде қаблан милитсияи пойтахт чандин нафарро бо чунин ҷурм дастгир намуда, шаҳрвандон огоҳонида шуда бошанд, ҳам ҳанӯз содиршавии чунин ҷиноятҳо ба қайд гирифта мешаванд.
Аз ҷумла, Ҳасанова Нилуфар, сокини 25-солаи ноҳияи Рӯдакӣ аз ҷониби кормандони ШВКД-1 дар н.Сино бо ҳамин шакли қаллобӣ дастгир карда шуд. Номбурда дар саҳифаи интернетии «Сомон-ТҶ», эълони бардурӯғ нашр намуда, аз шаҳрвандон барои иҷораи манзили истиқоматӣ ҳамчун пешпардохт тариқи ҳамёни электронӣ маблағҳои гуногун гирифта, ба манфиати худ сарф намудааст.
Зимни санҷиш муайян карда шуд, ки Ҳасанова Н., бо истифода аз рақамҳои зерин: 013388282, 938380590, 115116550, 985500860, шаҳрвандонро фиреб додааст. Нафароне, ки аз ӯ ҷабр дидаанд, тавассути рақамҳои 018-02-02-02 ба милитсияи пойтахт муроҷиат намоянд.

Санаи 25 июли соли 2025, тақрибан соати 22:30 дақиқа, дар маҳаллаи Гулбутта ҷинояти авбошӣ содир шуд.
Ҳамчун гумонбар Қодиров Равшан сокини 50-солаи ш.Душанбе дастгир гардид.
Дар натиҷаи тафтишоти пешакӣ муайян карда шуд, ки номбурда дар натиҷаи муноқишаи байниоилавӣ, шаҳрвандон Абдусамадова Каромат ва Абдусамадов Фахриддинро латукӯб намуда, бо истифода аз корд ба онҳо ҷароҳати ҷисмонӣ расонидааст.
Вобаста ба ҳодисаи мазкур аз ҷониби кормандони ШВКД-1 дар ноҳияи Фирдавсӣ бо моддаи 237 Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, мавриди тафтишоти пешакӣ қарор дорад.
Бо таҳлили сабабу омилҳои содиршавии ин ҷиноят, Раёсати ВКД дар шаҳри Душанбе шаҳрвандонро ба эҳтироми ҳамдигарӣ ва пос доштани ҳуқуқу арзишҳои оилавӣ даъват мекунад.

Нисбати нафароне, ки барои содир намудани ҳуқуқвайронкуниҳои гуногун, махсусан оворагардию талбандагӣ бо Қарори Суд ҷазо дар намуди ҳабси маъмурӣ татбиқ гардидааст, ба иҷрои корҳои манфиатноки ҷамъиятӣ сафарбар карда шуданд.
Ҳадаф аз ин иқдом, ки ислоҳи афроди қонуншикан ба шумор меравад, аллакай самаранокии худро дар амал нишон дода истодааст.
Минбаъд низ, ба таври ҳамешагӣ нафароне, ки ба ҳабси маъмурӣ маҳкум гардидаанд, ба иҷрои корҳои ободонию тамизкорӣ сафарбар карда мешаванд.