Vazirlik ma’lumotiga ko‘ra, 24–28 noyabr kunlari mamlakat bo‘ylab joylashgan mahalliy mehnat va bandlik bo‘limlarida chet ellik ishchilarni jalb qilishning 5-bosqichi uchun arizalar qabul qilinadi.
Bu bosqichda jami 9 326 nafar chet ellik ishchi qabul qilinadi. Soha bo‘yicha taqsimot quyidagicha:
●Ishlab chiqarish sanoati: 6 530 nafar
●Kema qurilishi: 250 nafar
●Qishloq xo‘jaligi va chorvachilik: 940 nafar
●Baliqchilik: 832 nafar
●Qurilish: 178 nafar
●Xizmat ko‘rsatish sohasi: 596 nafar
Agar biror sohada ishchi talabi yuqori bo‘lsa, vazirlik qo‘shimcha 32 000 nafargacha kvota orqali taqsimotni moslashtirishini bildirgan.Vazirlikka ko‘ra, chet ellik ishchilarni kompaniyalarga taqsimlashda xavfsizlik, ishchi boshqaruvi, yashash sharoiti kabi ko‘rsatkichlar asos qilib olinadi. Ishchilarga xavfsiz mehnat sharoiti yaratmaydigan, qonun buzadigan yoki avariya oqibatida o‘lim holati qayd etilgan kompaniyalar salbiy baho oladi.
Chet ellik ishchi jalb qilmoqchi bo‘lgan kompaniyalar avval 7 kun davomida mamlakat ichidan ishchi topishga harakat qilishi shart. Shundan so‘nggina yaqinidagi mehnat bo‘limiga borib yoki Work24 saytida ariza topshirishi mumkin.
Ruxsatnoma natijalari 12 dekabr kuni e’lon qilinadi.Ruxsat olgan korxonalarga ruxsatnomalar 15–22 dekabr kunlari topshiriladi.
Mehnat vazirligi ushbu jarayon kichik va o‘rta korxonalardagi ishchi tanqisligini sezilarli darajada kamaytirishiga ishonch bildirdi.