'हिटमॅन'चा 'नंबर वन' संघर्ष: वय फक्त आकडा आहे, जिद्द महत्त्वाची!
वय वर्षे ३८... क्रिकेटमध्ये हे वय निवृत्तीचे मानले जाते. याच वयात, जेव्हा अनेकजण तुमची कारकीर्द संपल्यात जमा करतात, तेव्हा भारताचा कर्णधार रोहित शर्माने एक अशक्य वाटणारा विक्रम केला आहे. ऑस्ट्रेलियाविरुद्धच्या मालिकेत शानदार शतक झळकावून, रोहित शर्मा आपल्या १८ वर्षांच्या आंतरराष्ट्रीय कारकिर्दीत पहिल्यांदाच ICC एकदिवसीय क्रमवारीत (ODI Rankings) जगातील अव्वल क्रमांकाचा फलंदाज (No. 1 Batsman) बनला आहे.
ही फक्त एक बातमी नाही, हा MPSC आणि सरळसेवा भरतीची तयारी करणाऱ्या प्रत्येक विद्यार्थ्यासाठी एक धडा आहे.
परिस्थिती काय होती?
काही आठवड्यांपूर्वीपर्यंत रोहित शर्मावर टीका होत होती. त्याचा 'फॉर्म' गेला, तो धावा करत नाही, २०२७ च्या विश्वचषकात तो नसेल, आता त्याने निवृत्त व्हायला हवे... अशा अनेक चर्चांना उधाण आले होते. टीकाकारांनी त्याला जवळपास नाकारले होते.
ही परिस्थिती स्पर्धा परीक्षेच्या विद्यार्थ्यांसारखीच नाही का?
दोन-तीन 'अटेम्प्ट' (Attempt) अयशस्वी झाले, 'प्री' निघाली पण 'मेन्स' राहिली, किंवा मुलाखतीतून परत आलो की, आजूबाजूचे लोक, नातेवाईक आणि कधीकधी आपलेच मित्र म्हणायला लागतात, "आता बस कर," "तुझं काम नाही," "दुसरी नोकरी बघ," "वय वाढत चाललंय."हा तोच क्षण असतो जिथे ९९% लोक हार मानतात.
'हिटमॅन'ने काय केले?
रोहित शर्माने या टीकेला शब्दांनी उत्तर दिले नाही. त्याने टीकेला किंवा स्वतःवरील दबावाला स्वतःवर हावी होऊ दिले नाही. त्याने आपले लक्ष फक्त खेळावर केंद्रित ठेवले. जेव्हा संधी मिळाली, तेव्हा ऑस्ट्रेलियाविरुद्ध त्याच जुन्या, धडाकेबाज शैलीत शतक ठोकले आणि सर्व टीकाकारांची तोंडे बंद केली.
त्याने फक्त सामना जिंकला नाही, तर तो जगातील 'नंबर वन' बनला. त्याने हे सिद्ध केले की, संघर्ष करण्याची तयारी असेल, तर यश कोणत्याही वळणावर मिळू शकते.
MPSC/सरळसेवा विद्यार्थ्यांनी काय शिकावे?
आता MPSC आणि सरळसेवा भरतीचे वेळापत्रक जाहीर झाले आहे. हीच तुमची 'वर्ल्ड कप' फायनल आहे. या प्रवासात तुम्ही
रोहित शर्माकडून ३ गोष्टी शिकू शकता:
१. चिकाटी
रोहितला नंबर वन बनण्यासाठी १८ वर्षे लागली. यश लगेच मिळत नाही. तुम्ही दोन, तीन किंवा चार वर्षांपासून अभ्यास करत असाल, पण हार मानू नका. तुमचा शेवटचा प्रयत्न हा तुमचा सर्वोत्तम प्रयत्न असू शकतो.
२. टीकेकडे दुर्लक्ष
लोक बोलणारच. तुमच्या अपयशावर हसणारे आणि तुमच्या क्षमतेवर शंका घेणारे अनेक 'टीकाकार' तुमच्या आजूबाजूला असतील. त्यांचे ऐकत बसलात तर खचून जाल. रोहितप्रमाणे, तुमचे लक्ष फक्त तुमच्या 'अभ्यासावर' (Performance) ठेवा.
३. वय हा फक्त आकडा आहे
रोहितने वयाच्या ३८ व्या वर्षी ते मिळवले, जे त्याला २८ व्या वर्षीही मिळाले नव्हते. स्पर्धा परीक्षेतही तसेच आहे. "माझे वय वाढले," "माझ्यापेक्षा कमी वयाचे लोक पोस्ट मिळवत आहेत" (जसे रोहितपेक्षा ज्युनियर शुभमन गिल आधी नंबर वन होता), या विचारांनी खचून जाऊ नका. तुमची वेळ नक्की येईल, फक्त संयम आणि जिद्द सोडू नका.
मित्रांनो, परिस्थिती कितीही विरोधात असो, लोक कितीही तुमच्या क्षमतेवर शंका घेत असोत, स्वतःवरचा विश्वास गमावू नका. रोहित शर्मा जर ३८ व्या वर्षी 'शून्यातून' पुन्हा 'नंबर वन' होऊ शकतो, तर तुम्हीही या शेवटच्या काही महिन्यांत प्रामाणिक प्रयत्न करून तुमची 'पोस्ट' नक्कीच मिळवू शकता.
तुमच्या बॅटमधून (पेन) निघणारा प्रत्येक 'रन' (गुण) महत्त्वाचा आहे. टीकाकारांना उत्तर तुमच्या शब्दांनी नव्हे, तर तुमच्या 'निकालाने' द्या!
📝समाधान निमसरकार
0
Показать ещё
