Xivada o‘tkazilgan Xalqaro investitsiya forumi doirasida Avstraliyaning Allied Green Ammonia kompaniyasi rahbari bilan kelishuv imzolanibdi. Xorazm viloyati hokimligi matbuot xizmati xabariga ko‘ra, Avstraliya kompaniyasi 5,9 mlrd (ha, salkam olti milliard!) dollar investitsiya kiritib, Xorazmda ekologik toza aviayoqilg‘i ishlab chiqarmoqchi ekan.

5,9 mlrd dollar nimaligini tasavvur qilishingiz uchun, masalan, Xorazm viloyatining 2024-yil yakunlari bo‘yicha yalpi hududiy mahsuloti hajmi 51 trln 261 mlrd so‘mni tashkil etgan, bu hozirgi dollar kursida taxminan 4,2 mlrd dollar, degani. Ha, Avstraliyaning bitta kompaniyasi Xorazm viloyatiga uning bir yillik daromadidan ham ko‘proq investitsiya kiritmoqchi (ha, to‘g‘ri, birdan, bir kunda kiritmaydi shuncha pulni. Agar kiritsa).

Ba’zi manbalarda bu kelishuv Allied Biofuels kompaniyasi bilan imzolangani ta’kidlangan ekan. Allied Green Ammonia bilan kelishuv imzolangani aytilgan xabarlarda ham, Allied Biofuels bilan kelishuvga erishilgani yozilgan yangiliklarda ham ikkinchi tomon vakili (aniqrog‘i, rahbari) sifatida Benedikt Alfred ko‘rsatilgan, suratlarda bizning kotakonlar bilan qo‘l ushlashib, kulishib turgan ham o‘sha, Benya aka.

Manbalarda Allied Biofuels'ni “xorijiy kompaniya” deb yozishganiga, avvaliga, uni chet eldagi shu nomli kompaniya deb o‘ylabman. Aslida ta’sis shakli shunaqa ekan, ya’ni, O‘zbekistondagi (2025-yil 28-iyulda ochilgan) xorijiy korxona, ofisi ham Toshkentning Islom Karimov ko‘chasida. Allied Green Ammonia esa haqiqatan ham Avstraliyada, haqiqatan ham bor ekan shunday kompaniya (qayerdadir 8 mlrd dollarlikmikin loyihalar ham qilayotganmishmiyey; ishqilib).

Allied Green Ammonia'ning LinkedIn sahifasida tarmoqning yetti foydalanuvchisi o‘zini shu kompaniyaga aloqador deb ko‘rsatibdi. Ular orasida, masalan, Amir Aziz bor (u hatto Saida Mirziyoyeva bilan suratga ham tushgan ekan), Pokistondan to Meksikagacha bo‘lgan joylarda ishlagan Shoh Navoz Xon bor, Pokistonning Gujarot universitetida o‘qigan Ajmal Kristofer bor, ko‘p yillar Pokistondagi “Fatima” kompaniyasida ishlagan Horun Idris ham bor; Muhsin Hassan o‘zi haqidagi chuqurroq ma’lumotlarni ochiqlamagan ekan hali.

Meni bitta narsa hayron qoldirdi — Xorazmga Xorazmning yalpi hududiy mahsulotidan ham kattaroq summada investitsiya kiritmoqchi bo‘layotgan mazkur Avstraliya kompaniyasi vakillari Xorazm viloyati hokimi bilan uchrashuvga (suratda) nega arabcha liboslarda kelgan?

Avvalroq Toshkent ko‘chalarida bank xodimlari, hokim yordamchilari, hududiy bandlik bo’limi xodimlari va boshqalar odamlardan Soliq mobil dasturi orqali o‘zini o‘zi band qilishni so‘rab yurgani haqida material ham chiqqandi: https://www.gazeta.uz/oz/2025/08/18/self-employed/

Afsonaviy sport sharhlovchisi Nikolay Ozerov “kolxozimizda bo‘layotgan bu g‘alati ishlar”ni ko‘rganida, ehtimol: “Bunday bandlik raqamlari bizga kerak emas!”, deb yuborgan bo‘lardi.

Odamlar o‘zi xohlab, bir tayinli ish bahona o‘zini o‘zi band qilishi — zo‘r, lekin bu imkoniyatni rasmiylar o‘zini o‘zi aldash vositasiga aylantirgani — yomon. Yolg‘on — juda yomon.

Bank xodimlarining qo‘li bilan qalbaki ish o‘rinlari tashkil etilayotgani haqidagi kechagi postdan keyin yana bir-ikki murojaatlar bo‘ldi:

“Bankirlarga ishsizlarni ish bilan ta’minlash yuklab qo‘yilgani — o‘ta xunuk holat, bunga yig‘lash kerak. Bankir ishsizni ish bilan ta’minlaydi, soliqdan ro‘yxatdan ham o‘tkazadi, soliq bazasida ko‘rinishi uchun solig‘ini ham to‘lab beradi. Ishsizlikni kamaytirishning yangicha usuli”.

Boshqa bir obunachi bu “to‘y” faqat bank xodimlariga emas, balki, masalan, oliy ta’lim muassasalarining xodimlariga ham kelganini yozgan:

“Bu masalada nafaqat bankirlar, hatto OTM o‘qituvchilari ham qiynalyapti. OTM bitiruvchilarining bandligi 100 foiz ta’minlanishi kerak, deb — xuddi bankirlarniki kabi sxemada — bitiruvchilar tanish firmalarga 0,25 stavka bilan ishga kirgizilyapti”.

Obunachilardan biri qiziq holat haqida yozibdi. Ya’ni, odamlarni ishli qilish kampaniyasi shu qadar avj olibdiki, boshqa ishga kirish uchun bir ishdan bo‘shab, bir-ikki kun ishsiz qolgan odamga: “Sizni ish bilan ta’minladik”, deb aytishga ham qo‘l tegmay, darrov biror joyga xodim qilib qo‘yishayotgan ekan:

“Jonga tegdi bu soxta hisobotlar, aslida yo‘q ish o‘rniga band qilishlar…

Avgustda boshqa bir ishga harakat qilib yurganimda eski ishimdan bo‘shadim. Yangi ish uchun hammasi hal bo‘lib, endi buyruq chiqadigan vaqtda kadrlar bo‘limi: “Siz bo‘shamagan ekansiz”, deb qoldi. Qarasam, meni qay bir go‘rdagi fermer xo‘jaligiga oddiy ishchi qilib tiqib qo‘yishgan ekan.

Jinnimi bular, tushunmay qoldim. Shunaqa yo‘l bilan millionlab ish o‘rinlari yaratishganmi, kim bilsin. Shu tariqa “tepa”ga “5-6 mln aholining bandligi ta’minlandi”, degan hisobot boradi-da? Boshog‘riq, asabbuzarlik va sansalorlikdan boshqa bir so‘mlik foydasi yo‘q bu ishlarning”.

Bir kishi shunday holatning tasdig‘iga skrinshot (quyida) ham yuboribdi: “Mana isboti - meni ham qaysidir fermerga ishga kirgazib qo‘yishgan, keyin bo‘shatishgan”.

Oriat Dono’ga jonli efirga chiqdik :) https://www.youtube.com/live/7Gjv0Cu55kY?si=MnFfu0Kr6f0IF1UB

O‘zbekiston yaqin kelajakda mamlakat hududida joylashgan “cloud” xizmatlarning ulkan quvvatlariga ega bo‘ladi.

Bu xorijiy serverlarga bog‘liq bo‘lmagan suveren raqamli infratuzilmani qurish imkonini beradi. Mahalliy IT-kompaniyalar jismonan O‘zbekistonda joylashgan mahalliy quvvatlar asosida o‘z mahsulotlarini, shu jumladan sun’iy intellekt sohasidagi mahsulotlarini rivojlantirishlari mumkin bo‘ladi.

O‘zbekistondagi data-markazlar qurilishi bilan Saudiyaning DataVolt kompaniyasi shug‘ullanmoqda. Avvalroq ushbu maqsadlar uchun 6,5 milliard dollargacha sarmoya kiritilishi ma’lum qilingandi. Uzum raqamli ekotizimi mahalliy ma’lumot markazlarining birinchi foydalanuvchisi bo‘ladi. Bu haqda O‘zbekistonda boshlangan ICT Week haftaligi doirasida kelishuvga erishildi. O‘zbekistonda zamonaviy lokal bulutli serverlarning qurilishi biznes, sanoat va davlat xizmatlari samaradorligini oshirish imkonini beradi.

DataVolt butun dunyo bo‘ylab ma’lumotlar markazlarini rivojlantirishga faol sarmoya kiritmoqda. Qiymati 100 milliard dollardan ortiq bo‘lgan Vision investitsiya guruhining bir qismi sifatida DataVolt AQSH, Hindiston va Saudiya Arabistonidagi loyihalarda, jumladan, shov-shuvli NEOM utopik shahar loyihasida ishtirok etmoqda.