ዘመናዊ  የጨቅላ ሕፃናት ማቆያና የእናቶች ማረፍያ  የማስፋፊያ ግንባታ ቦታ ርክክብ ተደረገ::
*//*
ነሔሰ 03/2017

በሀዋሳ ዩኒቨርስቲ የህክምናና ጤና ሳይንስ ኮሌጅ (ሀዩ-ህጤሳኮ) ዘመናዊ የጨቅላ ሕፃናት ማቆያና የእናቶች ማረፍያ ባለሁለት ወለል ዘመናዊ የማስፋፊያ  ሕንፃ ግንባታ ቦታ ርክክብ  ተደርጓል።

በሀዩ-ህጤሳኮ የሕፃናት ህክምና ክፍል ኃላፊ ስፔሻሊት ሃኪም እና የሀዋሳ ዩኒቨርስቲ "Saving Littile lives 360 (SLL 360) ፕሮግራም  ዋና አስተባባሪ ዶ/ር  መቅደስ ሺፈታ እንደገለጹት የማስፋፊያ ግንባታው የሚካሄደው በ "NEST360 Global Alliance" ዓለም አቀፍ ለጋሽ ተቋማት  በተመደበ $174,000 (አንድ መቶ ሰባ አራት ሺህ) የአሜሪካን ዶላር ነው።

የሀዩ-ህጤሳኮ ተ/ቺፍ ኤክስክዩቲቭ  ዳይሬክተር ዶ/ር ክብሩ ክፍሌ በበኩላቸው  ኮሌጁ  ከሚሰጣቸው መጠነሰፊ የመማር ማስተማርና የህክምና አገልግሎቶች አኳያ ከፍተኛ የቦታ መጣበብ ያለበት በመሆኑ የማስፋፊያ ግንባታው ነባር ቤቶችን በማፍረስ የሚካሄድ መሆኑን ገልፀዋል።

በአሁኑ ወቅት ከተለያዩ  አካባቢዎች  ሪፈር ተብለው ወደ ሆስፒታሉ የሚመጡ ያለጊዜያቸው የሚወልዱ እናቶች ቁጥር እየጨመረ መምጣቱን የገለጹት ዶ/ር ክብሩ ግንባታው ሲጠናቀቅ ለሕፃናትና እናቶች ምቹ የእንክብካቤና ማረፍያ ክፍሎች የሚዘጋጅ ከመሆኑም በላይ አገልግሎቱን በእጥፍ ለመጨመር  እንደሚያስችል ተናግረዋል።

ዶ/ር ክብሩ አክለውም በመንግስት ከሚደረገው ጥረት ጎን ለጎን ከውጭ ሀገር መጥተው ሆስፒታሉን ከጎበኙ በኋላ የኅብረተሰቡን  መሠረታዊ  የጤና ተግዳሮቶች ለማቃለል በማሰብ የገንዘብ እርዳታ ላደረጉ በተለይም ለ"NEST360" አባላት ከፍተኛ ምስጋና አቅርበዋል።
ሀዋሳ ዩኒቨርሲቲ
ሁሌም ለልህቀት!