ЖПКда шахсни терговда, гувохлантиришда яланғочлаш билан боғлиқ бир неча алоҳида талаблар мавжуд. Қуйида ушбу нормаларга эътиборли бўлинг.

🔹 Далилларни тўплаш, текшириш ва баҳолаш жараёнида фуқароларнинг, шунингдек корхоналар, муассасалар ва ташкилотларнинг ҳуқуқлари ва қонуний манфаатларини қўриқлаш таъминланиши керак. Шу мақсадда тергов ёки суд ҳаракатлари билан боғлиқ ишларни бажараётганда, суриштирувчи, терговчи, прокурор, судья ва ишда мутахассис ёки эксперт сифатида иштирок этаётган шифокорлардан бошқа шахсларнинг ўзга жинсдаги шахсни яланғоч қилиб ечинтириш чоғида ҳозир бўлишлари тақиқланади. (88-моддаси)

🔹 Шахсни ечинтириб яланғочлаш ёки унинг баданидаги тирналган, шилинган, қонталаш жойларни аниқлаш билан боғлиқ бўлган гувоҳлантириш суриштирувчи, терговчи ёки суднинг топшириғига биноан шифокор ёхуд бошқа мутахассис тиббий ходим томонидан ўтказилиши белгиланган. Гувохлантириш ечинтириб яланғочлаш билан боғлиқ бўлса, алоҳида хонада шифокор ёки бошқа мутахассис томонидан, гувоҳлантирилаётган шахснинг жинсидаги холислар иштирокида ўтказилади. (146 ва 445-моддалар)

🔹 Эксперт текшируви учун намуналар олиш яланғоч бўлишни ёки алоҳида касб махоратини талаб этадиган бўлса, суриштирувчи, терговчи ёки суднинг топшириғига биноан намуналарни шифокор ёки бошқа тиббий мутахассис олиши белгилаб қўйилган. Шифокор, бошқа мутахассис, холислар намуна олинувчи шахс билан бир жинсда бўлишлари лозимлиги қайд этилган.(189 ва 196-моддалар)

🔹 Шахсий тинтув ўтказишда шахсни яланғочлаш лозим бўлса, шахсий тинтув жараёнини видеоёзув орқали қайд этиш тақиқланган. (224-модда).

👉 @bahodirahmedoff

Тошкент шахар хокимлиги берган маълумотга кўра, жорий йил бошидан бери белгиланмаган жойларга чиқинди ташлаганлик учун 1 млрддан ортиқ жарима ундирилибди.

Асл воқелик бўйича ишланса, рақамлар бундан ҳам катта бўлади.

👉 @bahodirahmedoff

Бугунги 1 октябр - устоз ва мураббийлар куни билан устозларимизни муборакбод этаман.

Юриспруденция ҳам бошқа кўплаб соҳалар каби устозларсиз ўрганишни иложи йўқ. Бу соҳада меҳнат қилаётган соҳанинг жонкуярларини, шунингдек бошқа соҳаларда ҳам шогирдларга илм бераётган устозларни чин юракдан табриклайман!

Тергов ҳаракатларида видеоконференцалоқа режими жуда кам қўлланилувчи жараён бўлса керак. ЖПКда унинг техник талаблари қандай?

ЖПК 91-1-модда:
"Тергов ҳаракатларини видеоконференцалоқа режимида ўтказишда фойдаланиладиган техник воситалар ва ускуналар қуйидаги минимал талабларга жавоб бериши зарур:

тасвир сифати бўйича — ўлчами 1920×1080, секундига 50 та кадр;
овоз сифати бўйича — частота диапазони 100-12 000 Гц;
ахборот хавфсизлигини таъминлаш бўйича — VPN ҳимояланган алоқа каналидан фойдаланган ҳолда".

Қачон ўтказилади? Тергов ҳаракатлари қуйидаги ҳолларда видеоконференцалоқа режимида ўтказилади:
1) шахснинг жиноят ишини тергов қилаётган органга ёки тергов ҳаракати ўтказилаётган жойга соғлиғининг ҳолатига ёки бошқа узрли сабабларга кўра бевосита келиш имконияти бўлмаганда;
2) жиноят процесси иштирокчиларининг хавфсизлигини таъминлаш зарурати туғилганда;
3) кечиктириб бўлмайдиган тергов ҳаракатлари ўтказилганда;
4) тергов ҳаракатини ўтказиш қийинлашиши ёки ортиқча харажатлар келтириб чиқариши мумкинлиги ҳақида асосли сабаблар мавжуд бўлганда.

👉@bahodirahmedoff👈

2022 йил 22 сентябрда.Д. ўзига тегишли бўлган
низодаги хонадоннинг бир қисмини О.га сотганлиги тўғрисида нотариал тартибда олди-сотди шартномаси расмийлаштирилган.

Сўнгра икки ўртада низо чиққан. Даъвогар Д. жавобгар О. билан низодаги хонадоннинг бир қисмини сотиш тўғрисидаги олди-сотди шартномаси фуқаролар И. ва Р.лар ўртасидаги қарзга олинган пулнинг қайтарилиши кафолати сифатида гаров тариқасида (олди-сотди шартномаси) тузилганлиги, жавобгар О. билан ўрталарида пул олди-бердиси бўлмаганлигини ёзиб судга мурожаат қилган.

ФКнинг 124-моддасига кўра, юридик оқибатлар туғдириш нияти бўлмаган ҳолда, номигагина тузилган битим (қалбаки битим) ўз-ўзидан ҳақиқий эмасдир. Агар битим бошқа битимни ниқоблаш мақсадида тузилган бўлса (кўзбўямачилик битими), тарафлар ҳақиқатда назарда тутган битимга доир қоидалар қўлланилади. Шунингдек, ҳеч қайси тараф шартномада келтирилган мажбуриятларини ҳам бажармаган.

Шу қоидага асосан хонадон олди-сотди шартномаси номигагина тузилган битим дея ҳақиқий эмас деб топилган. Бундай битимни юридик кучи йўқ дея қарорга келинган.

Даъво фуқаролик ишлари бўйича Зангиота туманлараро судининг 2023 йил 16 майдаги ҳал қилув қарори билан қаноатлантириш рад этилган. Тошкент вилоят суди фуқаролик ишлари бўйича судлов ҳайъати апелляция инстанциясининг 2023 йил 12 июлдаги ажрими билан ҳал қилув қарори ўзгаришсиз қолдирилган. Ушбу хужжатлар бекор қилинган ва янгидан қарор қабул қилинган.

👉@bahodirahmedoff👈