ይህ ዘመን ከመቸውም በላይ ቤተ ክርስቲያን በምንፍቅና የተፈተነችበት ዘመን ነው፡፡ ምእመናን ቀርቶ አገልጋዮችም ብሎም መዋቅሮቻችን ሳይቀር በእጅጉ በምንፍቅና ማእበል እየተመቱ ምእመናንም በእጅጉ የተጎዱበት፣ ቤተ ክርስቲያንም የተጎዳችበት ወቅት ነው፡፡ ይሁን እንጅ ለዚህ ዝግጁ ያልሆነ የቤተ ክርስቲያን መዋቅር በነበረበት ወቅት ቀድሞ ችግሩን በመረዳትም ፈጣን የአጸፋ መልስ በመስጠትም ከማኅበራት ባሻገር ሰንበት ትምህርት ቤቶች ተጠቃሽ ናቸው፡፡ በተለይ ከቅርብ ጊዜ ወዲህ ከመገፋፋት ወጥቶ በጋራ በመሥራት፣ በሚዲያ የመጣውን በሚድያ በመመለስ የአፅራረ ቤተ ክርስቲያንን ክፉ የሐሰት ትምህርትና የሐሰት ትርክት በማክሸፍ ለቤተ ክርስቲያን አንደበት ሆነዋል፡፡
መ) መልካም አስተዳደርን በተመለከተ፡- ቤተ ክርስቲያን ሌላኛው ተግዳሮቷ መልካም አስተዳደር ነው፡፡ የሥልጣኔ ባለቤት የነበረች ሕግን ከነሥርዓቱ ለዓለም ያወረሰች ቤተ ክርስቲያን እጅግ ከተፈተነችባቸው ፈተናዎች መካከል ዋናው መልካም አስተዳደር ነው፡፡ በጥቂቱም ቢሆን ይህንን ችግር ከሚጋፈጡ ጥቂት አካላት መካከል ሰንበት ትምህርት ቤቶች ዋነኞቹ ናቸው፡፡
ዛሬ ላይ የሰበካ ጉባኤ ምርጫ ሲሆን የልማት ጉዳዮችን በተመለከተ የሀብትና የቅርስች ምዝበራ ሲደረግ፤በብዙ መልኩ እስከመታሰር እስከ መደብደብ የደረሰ ትግል በማድረግ ለቤተ ክርስቲያን ክብርና ጥቅም የሚታገሉ ሰንበት ትምህርት ቤቶችና ሰንበት ተማሪዎችን ማየት ልብን በሐሴት ይሞላል፤ ተስፋ እንዳንቆርጥም ያደርጋል፡፡
ጠቅለል አድርገን ስንመለከተው የሰንበት ትምህርት ቤቶች አስተዋፅኦ በርካታ ነው፡፡ ከውጭ ወራሪ ከውስጥ ሰርሳሪ ቤተ ክርስቲያንን ለመታደግ የሚያደርጉትን ትግል ማበረታታትና ዕውቅና መስጠት ይገባል፡፡ ይህ ማለት ግን ከላይ እንደጠቆምነው ሰንበት ትምህርት ቤቶቻችን ካላቸው ዕምቅ አቅም አንጻር መድረስ ከነበረባቸው ደረጃ ፤ማሳካት ከነበረባቸው ግብ ደርሰዋል ብለን አናምንም፡፡
ወስብሐት ለእግዚአብሔር

ከዚህ በኋላ እንደ ልጇ በ፫ኛው ቀን ተነሥታ መላእክት እየዘመሩላት ወደሰማያት ስታርግ ሐዋርያው ቶማስ ከሀገረ ስብከቱ በደመና ተጭኖ ወደ ኢየሩሳሌም ሲመለሰ ዕርገቷን በማየቱ መላእክት «እመቤትህ እርሷ ናት፤ስገድላት» አሉት፤ እርሱም «ወፈቀደ ይደቅ እምደመናሁ ይላል፤ ከደመናው ሊወድቅ ወደደ» ምክንያቱም ቀድሞ የልጇን ትንሣኤ፤ ዛሬ ደግሞ የእርሷን ትንሣኤ ለማየት ብሎ ነው፡፡ እመቤታችንም «ትንሣኤየን ያየህ አንተ ነህ ሌሎቹ አላዩም» ብላ ሐዋርያት ገንዘው የቀበሩበትን የሐር ግምጃ ሰጥታ አጽናንታ ሰደደችው፡፡
ቅዱስ ቶማስ ኢየሩሳሌም ሲደርስ የእመቤታችን ነገር እንዴት ሆነ ብሎ ጠየቃቸው፤እነርሱም አግኝተው እንደቀበሯት ነገሩት፤ እርሱም ያየውን ምሥጢር በልቡ ይዞ «ሞት በጥር፤ በነሐሴ መቃብር፤ ለሰሚውም አያምር፤ ይህ እንዴት ይሆናል?»፤ ቢላቸው ቅዱስ ጴጥሮስ «ድሮም አንተ ተጠራጣሪ ነህ፤ማን ያርዳ የቀበረ፤ ማን ይናገር የነበረ እንዲሉ፤ ገንዘን የቀበረን እኛ እያለን እንዴት ትጠራጠራለህ» ብለው ወደ መቃብሯ ሄደው መቃብሯን ቢከፍቱት ባዶ ሆኖ አገኙት፡፡ በዚህ ተደናግጠው ተያዩ፤ በዚህ ጊዜ ቅዱስ ቶማስ «አታምኑኝም ብዬ ነው እንጂ እመቤታችን ተነሣች፤ ዐረገች፤ ይኸው ምልክቱ» ብሎ ገንዘው የቀበሩበትን ሰበን አሳያቸው፤ እነርሱም አምነው ሰበኗን ለበረከት ተካፈሉት፡፡
በዓመቱ ነሐሴ ፩ ቀን ሐዋርያት በመንፈሰዊ ቅናት ተነሳስተው «ቶማስ ትንሣኤዋን አይቶ እኛ ሳናይ እንዴት ይቀርብናል» በማለት ነሐሴ ፩ ቀን ሱባኤ ጀምረው በ፲፮ኛው ቀን የሐዋርያትን ሱባኤ ተቀብሎ እመቤታችንን መንበር ጴጥሮስን ተራዳኢ፣ ካህን እስጢፋኖስን ሠራዔ ዲያቆን አድርጉ ቀድሶ አቅርቧቸዋል፡፡ ከዚያ ጊዜ በኋላም ከነሐሴ ፩ እስከ ፲፭ ቀን «ጾመ ፍልሰታ» ተብሎ ሁሉም የኦርቶዶክስ ተዋሕዶ ሃይማኖት ተከታይ ይጾመዋል፡፡
የጾሙና የትንሣኤዋ በረከት ተካፋይ ያድረገን፤ አሜን፡፡