الشهيد محمد معين أحمد

بلغ من العمر 17 عامًا، كتبت أخته في رسالة لمنصتنا:

"محمد حبيبي الضحوك، المتسامح، اللي القعدة معه كانت تشرح الروح. مستحيل حدا يزعل منه، دايمًا يضحك، ويطيب خاطر الكل. كبر قبل عمره، صار شب الكل يحبه، طوب الأرض بتحبه، والله من فوق بحبه. كان صاحب الطير، ويفهم بالطير، يعرف كل شخص، ويعرف كيف يحكي مع كل قلب. حبيب الجميع، الله يرضى عليه ويتقبله. استُشهد بين حضني وغاب الجمال عن الدنيا من بعده".

تاريخ الإستشهاد: 2025/7/21

#شهداء_غزة

الشهيدة ميرا محمد السقا

كتبت ابنة عمها في رسالة لمنصتنا:

"ميرا السقا عمرها 8 سنوات، كانت بالجنوب وفي يوم كانت بدها تروح مع امها على السوق وفجأه رن تلفون امها كان والدها لميرا امها ضلت تكلمه وميرا طلعت تستنى امها على باب الحاصل تلعب مع صاحباتها وكان في تلاتة مطلوبين ورموا عليهم صاروخ وميرا كانت جنبهم واستشهدت هي وماسكة ايد صاحبتها تصاوبت بسدرها وضلت عايشة، بالإسعاف استشهدت".

تاريخ الإستشهاد: 2024/8/1

#شهداء_غزة

الشهيد يوسف رأفت منصور

ولد بتاريخ 1996/2/6 ، كتب صديقه في رسالة لمنصتنا:

“يوسف كان صاحب صاحبه، معطاء ببزخ، هادي رايق ما بيعرف يقول لحدا لأ، كنت دائمًا أقله أنت إنسان مرضّي بيرضي الكُل وبساعد الكُل، غالي على قلوب كل الناس يلي حوليه محبوب ما بيأذي إنسان بحب الحياة ودائمًا على لسانه كلمة الحمدلله، بحب أهله كثير ومتعلق فيهم راح مع امه وخواته وأخوه استـ، شهـ دوا سوا علشان ربنا عارف قديه يوسف ما بقدر من دونهم، راح يوسف الطموح الجدع صاحب الكُل راح وارتاح من هم الدنيا وشقاها".

تاريخ الاستشهاد: 2025/7/8

#شهداء_غزة