ኑሮ ከበደኝ በማለት ከመንትያ ልጆቿ መካከል አንደኛዋን የአንድ አመት ከ6 ወር ልጅ በድንጋይ ደብድባ የገደለችው እናት በእስራት ተቀጣች

‎በደቡብ ምዕራብ ኢትዮጵያ ህዝቦች ክልል በካፋ ዞን አዲዮ ወረዳ ሜራ ቀበሌ ውስጥ የወንጀል ድርጊቱ ተፈጽሟል።ተከሳሽ ገነት መንግስቱ በሜራ ቀበሌ ግንቦት 5 ቀን 2017 ዓ.ም ከጠዋቱ 2:00 ሰዓት የ1 ዓመት ከ6 ወራት ልጇን ጭካኔ በተሞላበት ሁኔታ የግድያ ወንጀል መፈፀሟን የደቡብ ምዕራብ ኢትዮጵያ ህዝቦች  ክልል ፖሊስ ኮሚሽን የህዝብ ግንኙነትና ኮሙኒኬሽን ዳይሬክተር ኢንስፔክተር ደጀኔ አሰፋ ለብስራት ሬዲዮ ተናግረዋል ።

የአዲዮ ወረዳ ፖሊስ ግለሰቧን በቁጥጥር ስር በማድረግ በምርመራው እንዳረጋገጠው ግለሰቧ ከምትኖርበት ሜራ ቀበሌ ወደ አዲስ አበባ ለስራ ሄዳ ባለችበት በማርገዟ ምክንያት ተመልሳ በመምጣት መንታ ሴት ልጆችን በሰላም እንደወለደችና በፍቅርና በእንክብካቤ ለአንድ አመት ከስድስት ወር ስታሳድግ መቆየቷን ፖሊስ አረጋግጧል።ይሁንና የኑሮ ሁኔታ እየከበዳት ሲሄድ ከሁለቱ አንደኛዋን ለማስወገድ በማሰብ ልጇን  ከተኛችበት አንስታ አቅፋ አቅራቢያዋ ወደ ጫካ በመዉሰድ ጭንቅላቷን ላይ በድንጋይ ሁለት ጊዜ በመምታት ህይወቷ እንዲያልፍ ማድረጓን ግለሰቧ ለፖሊስ በሰጠችው የእምነት ቃል አረጋግጧል።

የወረዳው ፖሊስ የምርመራ መዝገቡን በማደራጀት ክስ እንዲመሰረትባት መዝገቡን ለዓቃቤ ህግ ያስተላልፉል።የካፋ  ዞን ፍትህ መምሪያ የልዩ ልዩ ወንጀሎች ዐቃቤ ህግ ከአዲዮ ወረዳ ፖሊስ የደረሰውን የምርመራ መዝገብ መነሻ በማድረግ ግለሰቧን የኢ.ፌ.ዲ.ሪ የወንጀል ህግ 540 ላይ የተደነገገውን ተላልፋ በመገኘቷ በፈፀመችው ሰዉ የመግደል ወንጀል ክስ መስርቶባት ካፋ ዞን ከፍተኛ ፍርድ ቤት በማቅረብ ፍረድ ቤቱ የዐቃቤ ህግ ምስክሮችን ካደመጠ በኋላ ተከሳሿን ጥፋተኛ በማለት የጥፋተኝነት ብይን ሰጥቷል።

‎በዚሁ መሰረት የካፋ ዞን ከፍተኛ ፍርድ ቤት ጥቅምት 25 ቀን 2018 ዓ.ም ባስቻለው የወንጀል ችሎት ተከሳሽ ገነት መንግስቱ በ10 አመት እስራት እንድትቀጣ ዉሳኔ ማስተላለፉን ኢንስፔክተር ደጀኔ አሰፋ ጨምረዉ ለብስራት ሬዲዮ ተናግረዋል ።

ሳምራዊት ስዩም

@ETHIONEWS433 @ETHIONEWS433